მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას
საქართველოს ყოფილი პრემიერ-მინისტრი გიორგი გახარია, რომელიც 18 თებერვალს საკუთარი სურვილით გადადგა პრემიერის თანამდებობიდან, ამბობს, რომ აქტიურ პოლიტიკაში დარჩება და უახლოეს მომავალში საზოგადოებას საკუთარ პოლიტიკურ გეგმებს გააცნობს.
„დღეს განვაცხადე, რომ მე ვრჩები საქართველოს პოლიტიკაში. ამჟამად მე ვმუშაობ იმისთვის, რომ განვსაზღვრო ჩემი პოლიტიკური დღის წესრიგი. საჭიროა პოლიტიკური პოლარიზაციის აღმოფხვრა და რეალური დღის წესრიგის შექმნა ევროპული მომავლისთვის”, – წერს გახარია ტვიტერზე.
Today I declared that I am staying in politics of #Georgia. Currently I am working on defining my political agenda. 🇬🇪 needs elimination of political polarization and elaboration of the real agenda for its European future.
— Giorgi Gakharia (@GakhariaGiorgi) March 22, 2021
გახარიას გადადგომის მიზეზი გახდა გუნდთან არსებული უთანხმოება ყველაზე რეიტინგული ოპოზიციური პარტიის, “ნაციონალური მოძრაობის” თავმჯდომარის, ნიკა მელიას დაპატიმრების თაობაზე. გახარია მელიას დაკავების წინააღმდეგი იყო.
მანამდე პოლიტიკაში აქტიურად დარჩენის სურვილი გახარიამ პირველად ტელეკომპანია “ფორმულასთან” ეთერში გაამჟღავნა:
„არსად წასვლას არ ვაპირებ, უფრო მეტიც, არც პოლიტიკიდან არ წავალ“, – უთხრა გახარიამ ტელეკომპანია “ფორმულას” 22 მარტს.
ექსპერტების შეფასებები: “ქართულ პოლიტიკაში რეალურად იწყება ტექტონიკური ძვრები”
გიორგი გახარიას გადადგომისთანავე დაიწყო მსჯელობა მის პოლიტიკურ მომავალზე.
ანალიტიკოსების და პოლიტიკოსების უმრავლესობა თანხმდებოდა, რომ ყოფილი პრემიერი პოლიტიკაში დარჩებოდა. განსხვავებული იყო გახარიას მომავალი პოლიტიკურ მიზნების შეფასება – ერთნი ფიქრობენ,. რომ ყოფილ პრემიერს აქვს რესურსი რეალურ მესამე ძალად იქცეს ქვეყანაში და მიიმხროს ის მრავალრიცხოვანი ამომრჩეველი, რომელსაც არც ხელისუფლება მოსწონს და არც ოპოზიციას უჭერს მხარს.
სხვები კი ფიქრობენ, რომ გახარია მილიარდერ ბიძინა ივანიშვილის მორიგი პოლიტიკური პროექტია, რომელმაც რეიტინგდაკარგული მმართველი გუნდი “ქართული ოცნება” უნდა ჩაანაცვლოს.
ექსპერტები ნაწილი ფიქრობს, რომ რაც უნდა იყოს მისი მიზანი, დამოუკიდებელი პოლიტიკური აქტივობის დასაწყებად გახარიას საკმაოდ კარგი სასტარტო პირობები აქვს.
ეს პირველ რიგში არის მისი რეიტინგი – გადადგომის მომენტისთვის იგი საქართველოში ყველაზე რეიტინგული პოლიტიკოსი იყო. („საერთაშორისო რესპუბლიკური ინსტიტუტის“ (IRI) მიერ 2020 წლის აგვისტოში ჩატარებული კვლევით, გახარიას გამოკითხულთა 63 პროცენტი უჭერდა მხარს. იზრდებოდა მისი საქმიანობის მიმართ დადებითი შეფასება – NDI-ის მიერ 2021 წლის იანვარში გამოქვეყნებული კვლევის მიხედვით, მის საქმიანობას 46 პროცენტი დადებითად აფასებდა. 2019-ში მხოლოდ 21 პროცენტი).
გახარიას სასარგებლოდ მუშაობს ასევე ის ფაქტი, რომ “ქართულ ოცნების” მხარდამჭერთა მნიშვნელოვანი ნაწილი იმედგაცრუებული მმართველი ძალის მოღვაწეობით, თუმცა არც ოპოზიციას უჭერს მხარს.
“გახარია „ქართულ ოცნებას“ ამომრჩეველთა ძალიან სოლიდურ ნაწილს წაართმევს. ქართულ პოლიტიკაში რეალურად იწყება ტექტონიკური ძვრები ამომრჩევლის გადანაწილების და გააქტიურების თვალსაზრისით,” – ამბობს ექსპერტი ხათუნა ლაგაზიძე რადიო “პალიტრასთან” ინტერვიუში.
ექსპერტის თქმით, “გახარიას აქვს ქარიზმა როგორც პირად ურთიერთობებში, ასევე ამომრჩევლებთან ურთიერთობაში და გამოსვლების დროსაც”.
ლაგაზიძის აზრით, გახარიას აქვს რესურსი ამომრჩეველი არა მარტო მმართველ გუნდს, არამედ ოპოზიციასაც წაართვას:
„ოპოზიციისთვისაც გახარიას გამოჩენას ერთგვარად ცივი შხაპის ეფექტი ექნება. ამავე დროს, ოპოზიციისთვის ეს არის რეალურად ბოლო შანსი, რომ გამოფხიზლდნენ, საკუთარი შეცდომები გაანალიზონ, დაუბრუნდნენ ამომრჩევლის წიაღს, გაცდნენ ტელეეკრანის ჩარჩოებს იმიტომ, რომ ბოლო თვეების მანძილზე თითქმის არ გვინახავს ჩვენ ხალხთან გასული და ხალხთან მისული პოლიტიკოსი,” – ამბობს ლაგაზიძე.
პოლიტოლოგის აზრით, ერთადერთი პარტია, რომელსაც გახარიას პოლიტიკაში დაბრუნებით ამომრჩევლის დაკარგვა არ ემუქრება, „ნაციონალური მოძრაობაა“.
“დანარჩენმა ოპოზიციურმა პარტიებმა, ამომრჩეველთა შენარჩუნებისთვის, გაასმაგებულად უნდა იმუშაონ,” – მიიჩნევს იგი.
„ნაციონალურ მოძრაობას“ ჰყავს თავისი მყარი ამომრჩეველი და მე ვფიქრობ, რომ ეს ამომრჩეველი „ნაციონალური მოძრაობის“ ირგვლივ უფრო ჩადუღაბდება, რადგან გახარიას სახით ისინი რეალურ საფრთხეს დაინახავენ პოლიტიკურ ველზე ახალი მოთამაშის შემოსვლით,” – ფიქრობს ექსპერტი.
ექსპერტი გიორგი ხუხაშვილი მიიჩნევს, რომ გახარია ქართულ პოლიტიკაში უნდა დაბრუნდეს და ეს პოლიტიკას ნამდვილად სჭირდება.
პოლიტოლოგი გია ხუხაშვილი ასევე ფიქრობს, რომ გახარიას პოლიტიკურ სცენაზე გამოჩენა მნიშვნელოვან ცვლილებებს გამოიწვევს:
„ჩვენ ჩახარშული ვართ გარკვეულ ნეგატიურ ორპოლუსიანობაში. ალტერნატიული პოლიტიკური ცენტრები სჭირდება ქვეყანას იმისთვის, რომ რაღაც პოლიტიკური დინამიკა ავკრიფოთ და წარსულსა და აწმყოს შორის არჩევანის ამარა არ ვიყოთ. ასევე, იყოს მომავლის საინტერესო შეთავაზებები, გახარიამ გარკვეული პოლიტიკური კაპიტალი დააგროვა და საინტერესო იქნება მისი დაბრუნება“, – განაცხადა ხუხაშვილმა „რუსთავი 2“-ის ეთერში.
მისი თქმით, გახარიას ეჭვის თვალით შეხედავს როგორც ოპოზიცია, ისე მმართველი გუნდი:
“ცხადია, ოპოზიცია იტყვის გახარიაზე, რომ ის ბიძინას პროექტია.
მაგრამ უფრო საინტერესო და შეიძლება ითქვას კომიკური ის არის, რომ იგივეს იფიქრებენ კობახიძე-ღარიბაშვილიც.”
ხუხაშვილის პროგნოზით, ყოფილი პრემიერი ყველაზე მეტ ამომრჩეველს “ქართულ ოცნებას” წაართმევს და ასევე ე.წ. კონსტრუქციულ ოპოზიციასაც.
პოლიტიკოსების გამოხმაურებები:
მმართველ გუნდში არ იზიარებენ ექსპერტების პროგნოზს, რომ შესაძლოა, გახარიას პოლიტიკურ გუნდში “ქართული ოცნების” მოქმედმა წევრებმა გადაინაცვლონ:
„მე არ გამიგია, რომ ვინმეს ქართული ოცნებიდან წასვლა უნდა, გადანაცვლება გახარიას ახალ პოლიტიკურ ჯგუფში, თუმცა გზაც ხსნილია, თუ ვინმე ასე გადაწყვეტს,” – ამბობს გია ვოლსკი – ქართული ოცნების ერთ-ერთი ლიდერი.
ოპოზიციაში გახარიას გამოჩენას ფრთხილი კომენტარებით შეხვდნენ.
“ევროპული საქართველოს” წარმომადგენელი სერგი კაპანაძე ამბობს, რომ იმ შემთხვევაში, თუ გახარია გადაწყვეტს პოლიტიკური ძალის შექმნას, მას გარკვეულ კითხვებზე მოუწევს პასუხის გაცემა:
„ძალიან ბევრ კითხვაზე აქვთ პასუხი გასაცემი, მათ შორის, 20 ივნისთან დაკავშირებით, მათ შორის, ბოლო პერიოდში გავრცელებულ ინფორმაციასთან, როგორ ხდებოდა სუს-ის გამოყენება პოლიტიკური ოპონენტების წინააღმდეგ, როგორ ხდებოდა უკანონო მოსმენები. ასევე, ძალიან ბევრ პრობლემაზე, რომელიც ამ ქვეყანაშია, პირადად პასუხისმგებელია ბატონი გახარია, ამიტომ თუ მას უნდა პოლიტიკაში დარჩენა, ეს რა თქმა უნდა, მისი გადასაწყვეტია, აუცილებლად მოუწევს ამ კითხვებზე პასუხის გაცემა“, – განაცხადა კაპანაძემ.
მესამე ძალად არ განიხილავს გახარიას „ნაციონალური მოძრაობის“ წევრი ხატია დეკანოიძე:
„გახარია მესამე ძალად არ მიმაჩნია. რადგან მისი დამოკიდებულება სამართლიანობისადმი, მისი დამოკიდებულება მთლიანად საქართველოს მოქალაქეებისადმი, არ იმსახურებს დადებით შეფასებას“.
ყოფილ პრემიერს ხელისუფლების სატელიტად მიიჩნევს “ლოლოს” წარმომადგენელი ფიქრია ჩიხრაძე:
„მე ვფიქრობ, რომ ის ვერ იქნება ქართული ოცნებისგან დამოუკიდებელი ფიგურა, ის იქნება უფრო მაშველი რგოლი ქართული ოცნების იმედგაცრუებული ამომრჩევლისათვის, იმიტომ, რომ ისინი ხედავენ მძიმე მდგომარეობაში მყოფ პოლიტიკურ ძალას და უნდათ, რომ ვიღაც ახალი საყრდენი იპოვონ და, შესაძლოა, სწორედ ასეთი საყრდენის ფუნქცია უნდათ, რომ მიანიჭონ გახარიას ფიგურას”.
