გაეროს უშიშროების საბჭომ რუსეთს საქართველოს ტერიტორიიდან ჯარების გაყვანისკენ მოუწოდა

გაეროს უშიშროების საბჭომ დაგმო საქართველოში რუსეთის შეჭრა

გაეროს უშიშროების საბჭომ 14 აგვისტოს დახურულ სხდომაზე რუსეთ-საქართველოს კონფლიქტის საკითხი და რუსეთის მიერ საქართველოს ოკუპირებულ ტერიტორიებზე არსებული ვითარება განიხილა. რუსეთ-საქართველოს ომის მე-16 წლისთავთან დაკავშირებით მათ ერთობლივი განცხადება გააკეთეს. განცხადების ავტორები არიან გაეროს უშიშროების საბჭოს წევრები: (მათ შორის სამი მუდმივმოქმედი) საფრანგეთი, იაპონია, მალტა, სლოვენია, დიდი ბრიტანეთი, ამერიკის შეერთებული შტატები და მომავალი წევრები დანია და საბერძნეთი.

განცხადების ტექსტი ფრანჩესკა გატიმ, გაეროში მალტის მუდმივი წარმომადგენლის მოვალეობის შემსრულებელმა, წაიკითხა. მისი თქმით, 2008 წლის აგვისტოში საქართველოში რუსეთის შეჭრამ გამოავლინა რუსეთის პოლიტიკის უფრო აგრესიული ტენდენცია თავისი მეზობლებისა და ევროპის უსაფრთხოების არქიტექტურის მიმართ.

“როგორც დღეს ჩვენ, ყველანი ვხედავთ, რუსეთის ფედერაციის მიერ უკრაინის წინააღმდეგ არაპროვოცირებული და გაუმართლებელი აგრესიით, რუსეთი აგრძელებს ამ გზას”, – აღნიშნა გატიმ.

• აფხაზეთის ომი. როგორ დაიწყო და განვითარდა კონფლიქტი – ქრონოლოგია
• 16 წელი აგვისტოს ომიდან. ვინ რა თქვა ამ დღეს – მნიშვნელოვანი განცხადებები

მან გაეროს უშიშროების საბჭოს სახელით კიდევ ერთხელ მტკიცედ დაადასტურა საქართველოს დამოუკიდებლობა, სუვერენიტეტი და ტერიტორიული მთლიანობა მის საერთაშორისოდ აღიარებულ საზღვრებში და დაგმო რუსეთის ფედერაციის მიერ საქართველოს ტერიტორიული მთლიანობის განგრძობით უხეში დარღვევა. ასევე გამოხატა შეშფოთება, რომ რუსეთი დღემდე არ ასრულებს 2008 წელს ევროკავშირის შუამავლობით ხელმოწერილი შეთანხმებით ნაკისრ ვალდებულებას ცეცხლის შეწყვეტისა და თავისი ძალების გაყვანის შესახებ საომარი მოქმედებების დაწყებამდე არსებულ ხაზზე.

“ჩვენ ასევე ვგმობთ რუსეთის უხეშ შეჭრას და უკანონო სამხედრო ყოფნას აფხაზეთსა და ცხინვალის/სამხრეთ ოსეთის რეგიონებში, რაც ეწინააღმდეგება გაეროს წესდებას. ეს რეგიონები საქართველოს განუყოფელი ნაწილია”, – აღნიშნულია განცხადებაში.

გატიმ ასევე თქვა, რომ რუსეთი დგამს ნაბიჯებს ამ რეგიონების ანექსიისკენ, რაც გამოიხატება ორივე რეგიონის რუსულ პოლიტიკურ, სამხედრო, სასამართლო, ეკონომიკურ და სოციალურ სფეროებში ჩართვით, მათ შორის, ინტეგრაციის შესახებ ხელშეკრულებების ხელმოწერით სტრატეგიულად მნიშვნელოვანი ბიჭვინთის კურორტის, სოხუმის აეროპორტისა და ოჩამჩირის პორტის რუსეთის ფედერაციისთვის გადაცემით, არაკანონიერი ე.წ. არჩევნების ჩატარებით, მათ შორის, 2024 წლის მარტში საპრეზიდენტო არჩევნების ჩატარებით აფხაზეთსა და ცხინვალში, ხოლო 2024 წლის ივნისში სამხრეთ ოსეთის რეგიონში ჩატარებული საპარლამენტო არჩევნებით.

• “ქართული მხარის პროვოკაცია” – ოცნება აგვისტოს ომთან დაკავშირებით განცხადებას ავრცელებს
• საგარეო უწყებამ არ უპასუხა მიმართვას, ევროსაბჭოში რუსული აგრესიის მსხვერპლთა ფონდის შექმნაზე – საია
• „ქართული ოცნება ეყრდნობა შავ ფულს”, – ჰელსინკის კომისია

“ჩვენ ვგმობეთ რუსეთის მუდმივ პროვოკაციებს საქართველოს ტერიტორიაზე, მის ტერიტორიულ წყლებსა და საჰაერო სივრცეში წვრთნების გაგრძელებას, ოჩამჩირეში მუდმივი საზღვაო ბაზის შექმნისთვის გადადგმულ ნაბიჯებს, რაც მნიშვნელოვან საფრთხეს უქმნის საქართველოს და, უფრო ფართოდ, შავი ზღვის რეგიონის უსაფრთხოებას, ასევე, მავთულხლართებისა და სხვა ხელოვნური ბარიერების აღმართვის პროცესის გააქტიურებას, რომელიც ყოფს საქართველოს შიდა რეგიონებს, ადგილობრივი მოსახლეობის უკანონო დაკავებასა და გატაცებას“, – განაცხადა გატიმ.

განცხადებაში გაეროს უშიშროების საბჭომ დაგმო საქართველოს მოქალაქეების, დავით ბაშარულის, გიგა ოთხოზორიას, არჩილ ტატუნაშვილის, თამაზ გინტურისა და ვიტალი კარბაიას მკვლელობა, ასევე აღნიშნა, რომ დღემდე არავინ დასჯილა აფხაზეთის რეგიონში რუსეთის სამხედრო ბაზაზე ირაკლი კვარაცხელიას მოკვლის საქმეზე. აქვე აღნიშნულია ადამიანის უფლებათა ევროპული სასამართლოს გადაწყვეტილება, რომელმაც 2021 წელს ექვს შემთხვევში დაადასტურა რუსეთის ფედერაციის პასუხისმგებლობა ადამიანის უფლებების დარღვევაში, მათ შორის მშვიდობიანი მოქალაქეების მკვლელობაში, სამხედრო მოსამსახურეთა წამებასა და არაადამიანურ მოპყრობასა და ღირსების შელახვაში.

განცხადების ტექსტში ასევე საუბარია ეთნიკური ქართველების დისკრიმინაციასა და მოსახლეობის მშობლიურ ენაზე განათლების აკრძალვაზე, ქართული კულტურული მემკვიდრეობის მიზანმიმართულ დაზიანებაზე.

გაეროს უშიშროების საბჭომ დაგმო საქართველოში რუსეთის შეჭრა