გამოქვეყნდა სომხურ-აზერბაიჯანული ერთობლივი ფილმი ყარაბაღის კონფლიქტის შესახებ

9-წლიანი მუშაობის შემდეგ, გამოქვეყნდა და თავისუფლად ხელმისაწვდომია უნიკალური დოკუმენტური ფილმი ყარაბაღის კონფლიქტის შესახებ – „წრის ნაწილები“. ფილმი აზერბაიჯანელმა და სომეხმა ჟურნალისტებმა და ექსპერტებმა დიდ ბრიტანეთში მოქმედი სამშვიდობო ორგანიზაცია Conciliation Resources-ისა და მისი პარტნიორების მხარდაჭერით გადაიღეს.

ფილმის სრული ვერსია, ქრონოლოგიური პრინციპით, სამ ნაწილად არის გაყოფილი და მოგვითხრობს ყარაბაღის კონფლიქტის შესახებ, სხვადასხვა მხარეს მყოფი თვითმხილველების, ექსპერტებისა და პოლიტიკოსების პირით.

ვერსია, რომელიც ონლაინ 12 მაისიდან არის ხელმისაწვდომი, სამივე ნაწილს აერთიანებს და მოგვითხრობს მოვლენების შესახებ, შედარებით მოკლედ – 1 საათსა და 15 წუთში.

„იდეა მრავალწლიანი ერთობლივი მუშაობის შედეგად დაიბადა: შეგვექმნა ფილმი, ორი ნარატივის, ორი მიდგომის, ორი ისტორიის გაერთიანებით და გვეცადა მათი დაახლოება.

ეს სარისკო იდეა იყო, მან ძალიან დიდი ძალისხმევა, ძალიან დიდი დრო, ძალიან ბევრი რესურსი და ძალიან ბევრი ემოცია მოითხოვა.

და საბოლოოდ, მაინც გამოვიდა“, – ამბობს ნუნე სარქსიანი, ფილმ „წრის ნაწილების“ პროექტის მენეჯერი.

„როდესაც მონაწილეობა შემომთავაზეს, მაშინვე მომეწონა პროექტის იდეა. მნიშვნელოვანი გამოცდილება მქონდა, არა მხოლოდ ჩვენი, არამედ სხვა ეთნიკური და კონფესიათაშორის კონფლიქტების გაშუქების.

ეს პროექტი ძალიან მნიშვნელოვანი და სასარგებლო ჩანდა, რომელში მონაწილეობაც იქნებოდა არა მხოლოდ საინტერესო, არამედ პრესტიჟულიც. ნამდვილად ძალიან მინდოდა წვლილი შემეტანა ყარაბაღის კონფლიქტის ქრონიკის შექმნაში, განსაკუთრებით, ორივე მხრიდან პროპაგანდისა და გაყალბების მცდელობის ფონზე, რამდენად პათეტიკურადაც არ უნდა ჟღერდეს, საერთაშორისო აუდიტორიამდე მიგვეტანა ობიექტური ინფორმაცია ჩვენი კონფლიქტის შესახებ“, – აცხადებს ფილმის პირველი ნაწილის სცენარის ავტორი, შაჰინ რზაევი.

26 წლის წინ, 12 მაისს, სომხეთსა და აზერბაიჯანს შორის მთიან ყარაბაღში ზავი დაიდო. მას წინ უძღოდა ექვსწლიანი ძალადობა. თუმცა, მიუხედავად იმ დროიდან გაუჩერებელი მოლაპარაკებებისა, სამშვიდობო შეთანხმება მაინც ვერ გაფორმდა. სომხები და აზერბაიჯანელები დარჩნენ ჩაკეტილები გაჭიანურებულ კონფლიქტში, რომელსაც ბოლო არ უჩანს.