ევროსასამართლომ აზერბაიჯანი კიდევ 118 ათასი ევროთი დააჯარიმა
ევროპის ადამიანის უფლებათა სასამართლომ აზერბაიჯანთან დაკავშირებული მორიგი გადაწყვეტილება გამოაქვეყნა. სასამართლომ სარჩელების უმრავლესობა დასაბუთებულად ცნო და აზერბაიჯანს მოსარჩელეებისთვის კომპენსაციის სახით, საერთო ჯამში, 118 ათას ევროზე მეტის გადახდა დააკისრა.
- ევროსასამართლომ აზერბაიჯანი კიდევ შვიდ საქმეზე დააჯარიმა
- ქართულ-აფხაზური კონფლიქტი: გამოსავალი არ ჩანს, არც დიალოგის სურვილი. ხედვა სოხუმიდან
- ნავალნის დაკავების გამო ევროკავშირმა და აშშ-მ რუსეთის ოფიციალურ პირებს სანქციები დაუწესა
„მედიამონიტორინგის ინსტიტუტი“ აზერბაიჯანის წინააღმდეგ
აზერბაიჯანელმა ჟურნალისტმა მეჰმან ალიევმა, ასევე, სამირ ისმაილოვმა და ემინ ჰუსეინოვმა აზერბაიჯანის მთავრობის წინააღმდეგ შეიტანეს სარჩელი და განაცხადეს, რომ ქვეყნის იუსტიციის სამინისტრომ მათ 2009 წელს უარი უთხრა „მედიამონიტორინგის ინსტიტუტის“ დარეგისტრირებაზე.
სამინისტროსგან უარის მიღების შემდეგ, მოსარჩელეებმა ქვეყნის შიგნით ყველა სასამართლო ინსტანციას მიმართეს, თუმცა, სასამართლოებმა სამინისტროს გადაწყვეტილება ძალაში დატოვეს.
ამ საქმეზე ევროსასამართლომ მიიჩნია, რომ დაირღვა მოსარჩელეთა უფლება გაერთიანების შესახებ. 12-დან თითოეულ მოსარჩელეს სახელმწიფომ უნდა გადაუხადოს 4500 ევროს ოდენობის კომპენსაცია, იურიდიული მომსახურებებისთვის კი – 6000 ევრო.
სხვა სიტყვებით რომ ვთქვათ, ამ საქმეზე აზერბაიჯანის ხელისუფლება დაჯარიმდა 60 ათასი ევროთი.
გაერთიანების უფლების კიდევ ერთი დარღვევა
საქმეზე „ელჩინ აბდულაევი და სხვები აზერბაიჯანის წინააღმდეგ“, სასამართლომ ასევე მოსარჩელეთა გაერთიანების უფლების დარღვევა დაადგინა.
გადაწყვეტილების თანახმად, აზერბაიჯანის მთავრობა 13 მოსარჩელეს, საერთო ჯამში, 28 060 ევროს გადაუხდის.
ამ საქმეზე მოსარჩელეებმა – აბდულაევმა და ნურმამედოვმა განაცხადეს, რომ მათ დააფუძნეს „აივ/შიდსისა და ტუბერკულოზით დაავადებულთა რეაბილიტაციისა და დაცვის ცენტრი“, მაგრამ იუსტიციის სამინისტრომ უარი უთხრა რეგისტრაციაზე. შემდეგ კი, სასამართლოს ყველა ინსტანციამ ძალაში დატოვა სამინისტროს გადაწყვეტილება.
ლაპშინს 30 ათას ევროს გადაუხდიან
დაკმაყოფილდა ბლოგერის, ალექსანდრ ლაპშინის სარჩელი აზერბაიჯანის წინააღმდეგ. ევროპის ადამიანის უფლებათა სასამართლომ გადაწყვიტა, რომ მოსარჩელესთან დაკავშირებით დაირღვა ევროპის ადამიანის უფლებათა კონვენციის (არსებითი და პროცედურული) მეორე მუხლი (სიცოცხლის უფლება).
აზერბაიჯანის ხელისუფლება ლაპშინს კომპენსაციის სახით 30 ათას ევროს გადაუხდის.
ისრაელის, რუსეთისა და უკრაინის მოქალაქე ალექსანდრ ლაპშინი მთიან ყარაბაღში აზერბაიჯანის ხელისუფლების ნებართვის გარეშე შესვლისათვის დააკავეს. ამის შემდეგ, მას თავისუფლება აღუკვეთეს და გარკვეული დროის შემდეგ გაათავისუფლეს.
