ევროპულმა საბჭომ საქართველოსთან დაკავშირებით გადაწყვეტილება გამოაქვეყნა, რომელშიც ნათქვამია, რომ საბჭო საქართველოში ბოლო დროს განვითარებული მოვლენებით შეშფოთებულია.
რა წერია დოკუმენტში
● ევროკავშირის ლიდერების დასკვნით, ე.წ. რუსული კანონი კანდიდატის სტატუსის მინიჭების შესახებ ევროკომისიის რეკომენდაციაში მითითებულ ნაბიჯებთან მიმართებაში უკუსვლას წარმოადგენს.
● ევროპული საბჭო მოუწოდებს საქართველოს ხელისუფლებას განმარტოს საკუთარი განზრახვები და შეცვალოს ამჟამინდელი მოქმედებების კურსი, რომელიც საფრთხეს უქმნის საქართველოს ევროკავშირის გზას და რომელიც დე ფაქტო აჩერებს ქვეყნის ევროკავშირში გაწევრიანების პროცესს.
● ევროპული საბჭო მოუწოდებს ხელისუფლებას, რომ შეწყდეს სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტებისა და ჟურნალისტების მიმართ დაშინების, მუქარისა და ფიზიკური თავდასხმის მზარდი შემთხვევები.
საბჭო კვლავ აღნიშნავს, რომ ნებისმიერი ქვეყნისთვის, რომელიც ევროკავშირში გაწევრიანებისკენ მიისწრაფვის, არსებითია იმ ღირებულებებისა და პრინციპების პატივისცემა, რომელსაც ევროკავშირი ეფუძნება.
● ევროპული საბჭო მოუწოდებს საქართველოს ხელისუფლებას უზრუნველყოს, რომ საპარლამენტო არჩევნები შემოდგომაზე იყოს თავისუფალი და სამართლიანი და მხარს უჭერს პარტნიორების მხრიდან არჩევნებზე გრძელვადიან და მოკლევადიან სიღრმისეულ დაკვირვებას.
● საბჭო ასევე აცხადებს, რომ სიტუაციაზე ყურადღებით დაკვირვებას განაგრძობს. ამასთან, კვლავ ადასტურებს ურყევ მხარდაჭერას საქართველოს ტერიტორიული მთლიანობის მიმართ. ის კიდევ ერთხელ გამოხატავს მტკიცე სოლიდარობას საქართველოს მოსახლეობისადმი და მზაობას, განაგრძოს მისი მხარდაჭერა ევროპული მომავლისკენ მიმავალ გზაზე.
“ევროპული საბჭო კიდევ ერთხელ ადასტურებს თავის ურყევ მხარდაჭერას საქართველოს ტერიტორიული მთლიანობის მიმართ. იგი იმეორებს თავის ურყევ სოლიდარობას ქართველ ხალხთან და მზადყოფნას განაგრძოს ქართველების მხარდაჭერა ევროპული მომავლისკენ მიმავალ გზაზე.” – წერია განცხადებაში.
აღსანიშნავია, რომ ევროპული საბჭოს სხდომის დასკვნაში საქართველოში დემოკრატიული უკუსვლის საპასუხოდ ბლოკის საპასუხო ზომებზე საუბარი არ არის. თუმცა, 24 ივნისს, საგარეო საქმეთა მინისტრების პრესკონფერენციაზე, რომელიც ბრიუსელში გაიმართა, ევროკავშირის უსაფრთხოების საკითხებში უმაღლესმა წარმომადგენელმა, ჯოზეფ ბორელმა თქვა, რომ ევროკავშირის საგარეო საქმეთა მინისტრების უმრავლესობის აზრით, საქართველოს მთავრობა ქვეყანას ევროკავშირს აშორებს და თუ მთავრობა ამ პოლიტიკას არ შეცვლის, საქართველოს გზა ევროკავშირისკენ არ განვითარდება.
ბორელის თქმით, კანონის მიღების გამო, შემცირდება პოლიტიკური კონტაქტები საქართველოს ხელისუფლებასთან, ასევე გაიყინება მხარდაჭერა მთავრობისათვის და გადაიხედება ევროპული საკრედიტო დაფინანსების ხაზები.
ბორელმა კვლავ ხაზგასმით აღნიშნა, რომ რუსული კანონის მიღება საქართველოს ევროკავშირთან დაახლოების ნაცვლად, აშორებს.
