"იმედგაცრუებულები ვართ" - ევროპარლამენტში საქართველოში მედიის თავისუფლებაზე იმსჯელეს
ევროპარლამენტში საქართველოში მედიის თავისუფლებაზე იმსჯელეს
“იმედგაცრუებულები ვართ”, “ნიკა გვარამია”, “სანქციები”, “ბიძინა ივანიშვილი”, “5 ივლისი”, “საქართველომ უკან დაიხია” – ძირითადად ეს სიტყვები ისმოდა დღეს ევროპარლამენტში, სადაც საქართველოში მედიის თავისუფლებასა და ჟურნალისტთა უსაფრთხოებაზე მსჯელობდნენ.
ევროპარლამენტში სიტყვით გამოსვლისას დეპუტატმა ანა ფოტიგამ განაცხადა, რომ დღეს საქართველოს ციხეში სხედან “ყველაზე გამოჩენილი ადამიანები”, ისეთები, როგორიცაა მესამე პრეზიდენტი მიხეილ სააკაშვილი და ნიკა გვარამია, დღევანდელი დებატების ერთ-ერთი სუბიექტი. დეპუტატის თქმით, “ისინი მოგვმართავენ ჩვენ, საქართველოს საუკეთესო მეგობრებს” – მიუხედავად იმისა, რომ კრიტიკულად არიან განწყობილი არსებული მთავრობის მიმართ – და ითხოვენ კანდიდატის სტატუსის მინიჭებას, რომ არ მოხდეს საქართველოს მოსახლეობის დასჯა და მიტოვება:
“შეხედეთ, რა ხდება უკრაინაში. მე თვითონ ვებრძოდი კომუნისტურ რეჟიმს და ვგრძნობ იმას, რასაც გრძნობს ყველა ქართველი. მივანიჭოთ სტატუსი საქართველოს, ისევე როგორც უკრაინას და მოლდოვას.”
ჩეხეთის წარმომადგენელი მარკეტა გრეგოროვა კი ამბობს, რომ ისინი იმედგაცრუებული არიან იმით, რომ საქართველოს მთავრობა ჩართულია მედიის დევნაში.
მისივე განმარტებით, საქართველოში მედიის მდგომარეობა ძალიან მძიმეა, რადგან ჟურნალისტები არიან ძალადობრივი თავდასხმის, დაშინების, მუქარის მსხვერპლი. როგორც დეპუტატი აღნიშნავს, მრავალია ჟურნალისტების დევნის შემთხვევები და სისხლის სამართლის გამოძიება მედიის მფლობელების ან მედიაში მომუშავეების წინააღმდეგ.
ლიტვის ყოფილი პრემიერმინისტრი და ევროპარლამენტის წევრი, ანდრიუს კუბილიუსი აცხადებს, რომ მედიის თავისუფლება საქართველოს მთავრობის პოლიტიკის მსხვერპლია.
კუბილიუსის თქმით, ქართველი ხალხი იმსახურებს იყოს ევროპული ოჯახის ნაწილი, მაგრამ ამისთვის არ არის საკმარისი მხოლოდ ხალხის სურვილი, საჭიროა, ქვეყანამ დააკმაყოფილოს მოთხოვნები – დემოკრატია, მედია თავისუფლება, კანონის უზენაესობა:
“ეს არ არის პირველი შემთხვევა, როდესაც პოსტკომუნისტური სახელმწიფოები მსგავსი პრობლემის წინაშე დგანან: 1999 წელს სლოვაკეთი მოლაპარაკებებზე არ იყო, რადგან მაშინდელი პოპულისტი პრემიერმინისტრი, ვლადიმირ მეჩიარი მედია თავისუფლებასა და დემოკრატიულ ღირებულებებს ანადგურებდა. სლოვაკელმა ხალხმა გადაირჩია ეს მთავრობა. მე ვურჩევდი საქართველოს ხელისუფლებას არ გაიმეორეს ვლადიმერ მეჩიარის შეცდომა.”
ევროპარლამენტარი მირიამ ლექსმანი კი პირდაპირ მოითხოვს, საქართველოს ევროპულის გზის მხარდასაჭერად ივანიშვილს სანქციები დაუწესდეს.
“აუცილებელია დამოუკიდებელი სასამართლოსთვის შესაბამისი რეფორმები გატარება, რათა შეწყდეს პოლიტიკური პოლარიზაცია და დემოკრატიის უკუსვლა. საქართველოს ევროპული გზის მხარდასაჭერად მნიშვნელოვანია ოლიგარქ ბიძინა ივანიშვილისთვის სანქციების დაწესება, საქართველოს პოლიტიკასა და ეკონომიკაში მისი დესტრუქციული როლისთვის”, – აღნიშნა ლექსმანმა.
ესტონელი დეპუტატის, მარინა კალიურანდს თქმით, საქართველომ დემოკრატიულ რეფორმებში სისწრაფე დაკარგა.
“მე მოვუწოდებ ქართველ პოლიტიკოსებს, მმართველი პარტიიდან, ისევე, როგორც ოპოზიციიდან – მიიღეთ დღევანდელი დებატები, როგორც უკანასკნელი გამოსაფხიზლებელი მოწოდება”, – განაცხადა კალიურანდმა.
ევროპარლამენტის დეპუტატმა შვედეთიდან კარინ კარლსბრომ სიტყვით გამოსვლისას აღნიშნა, რომ საქართველოს სურვილი იყო ევროპული ოჯახი, მაგრამ ხელმძღვანელობამ მიდგომა შეცვალა:
“კანდიდატმა ქვეყანამ უნდა აიღოს ძალიან სერიოზული პასუხისმგებლობა. არავინ არ უარყოფს, რომ საქართველოს ადგილი არის ევროპაში, რომ სიტყვების თავისუფლება არის ერთ-ერთი ფუნდამენტური საკითხია ევროკავშირში და ეს კარგად იცის საქართველოს მთავრობამ.”
17 ივნისს, ევროკომისია საქართველოს შესახებ მოსაზრებას (Opinion) გამოაქვეყნებს. სწორედ ამ მოსაზრების საფუძველზე, რომელსაც შემდეგ ევროკომისია 24-25 ივნისის სამიტზე, ევროკავშირის წევრი ქვეყნის ლიდერებს წარუდგენს, ევროკომისიამ უნდა მიიღოს გადაწყვეტილება, მიანიჭებს თუ არა საქართველოს კანდიდატი ქვეყნის სტატუსს.
ევროკომისია მოსაზრებას ევროკავშირის კითხვარის საფუძველზე ამზადებს. კითხვარი საქართველომ ორ ნაწილად შეავსო და გააგზავნა. ჯამში, ქვეყანამ, ევროკომისიის 2700-მდე შეკითხვას უპასუხა. კითხვარის პირველ ნაწილში 369, მეორეში კი 2 300-ზე მეტი შეკითხვა იყო.
საქართველოს შემთხვევაში, ექსპერტები ელიან, რომ რეზოლუცია კრიტიკული იქნება, რაც დღევანდელმა დღემაც დაადასტურა – ეს იყო პირველი თემა, რომელზეც ევროპარლამენტარებმა იმსჯელეს.
საქართველომ, უკრაინამ და მოლდოვამ ევროკავშირის წევრობის კანდიდატობაზე განაცხადა ერთად შეიტანა. ევროკავშირში გაწევრიანების განაცხადი საქართველომ 3 მარტს წარადგინა. 11 აპრილს კი ევროკავშირისგან თვითშეფასების კითხვარის პირველი ნაწილი მიიღო. კითხვარები მიიღეს უკრაინამ და მოლდოვამაც.
მმართველი პარტია “ქართული ოცნების” თავმჯდომარე ევროკავშირში გაწევრიანების შესახებ ამბობს, რომ საქართველო ყველა პარამეტრით უსწრებს უკრაინას და მოლდოვას.
