ევროპარლამენტარები და ყოფილი პრეზიდენტები - ვინ აწერს ხელს სააკაშვილის მხარდამჭერ წერილს

მიხეილ სააკაშვილის მხარდასაჭერად, ევროპარლამენტარ ანა ფოტიგას ინიციატივით შედგენილ წერილს, 72 ხელმომწერი ჰყავს. ევროპარლამენტარებთან ერთად, ხელმომწერებს შორის არიან ლიეტუვის სეიმის წევრები, ყოფილი პრეზიდენტები, ცნობილი პოლიტიკური და საზოგადო მოღვაწეები. წერილს ტელეკომპანია “ფორმულა” ავრცელებს.

ხელმომწერები აცხადებენ, რომ სააკაშვილის პატიმრობა უნდა შეწყდეს მანამ, სანამ ის არ წარსდგება სამართლიანი სასამართლო პროცესის წინაშე. 

● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?

“პოლიტიკურად მოტივირებული მართლმსაჯულების ეპოქა საბოლოოდ უნდა დასრულდეს საქართველოში. ეს ნათლად იყო ნათქვამი ევროკავშირისა და ამერიკის შეერთებული შტატების მედიააცით მიღწეულ  19 აპრილის შეთანხმებაში, რომელიც მოგვიანებით უარყო ქართულმა ოცნებამ.

პრეზიდენტი სააკაშვილი უნდა გათავისუფლდეს, რათა გზა გაუხსნას სტაბილურობისკენ მიმართულ ეროვნულ შეთანხმებას, რომელიც მიზნად ისახავს საქართველოში კრიზისის დასრულებას და იმ კურსის აღდგენას, რომლის ნახვაც ქართველ ხალხს სურს თავისი ერის მომავლისთვის”, – ვკითხულობთ წერილში.

წერილში ასევე ნათქვამია, რომ 2003 წლის ვარდების რევოლუციის შემდეგ, საქართველოს ახალმა მთავრობამ მხარი დაუჭირა რეფორმებს, რომლებიც მიმართული იყო დასავლური უსაფრთხოების, ეკონომიკური და პოლიტიკური ინტეგრაციისკენ, რაც ქართველ ხალხს სურდა:

“ახლა, როცა თითქმის 20 წელი გავიდა, უკვე ადვილია დაივიწყო ამ წლებში მიღწეული  მნიშვნელოვანი პროგრესი. ჯერ კიდევ ბევრი სამუშაო იყო შესასრულებელი, როდესაც რუსეთი შემოიჭრა საქართველოში 2008 წელს.

2012 წელს ამომრჩეველმა გადაწყვიტა, რომ დრო იყო სხვა მმართველ პარტიას ჰქონოდა შანსი განეხორციელებინა მართლმსაჯულების საჭირო რეფორმები და წინსვლა სრული დასავლური ინტეგრაციისკენ.“

წერილზე ხელმომწერები აღნიშნავენ იმასაც, რომ მაშინდელმა პრეზიდენტმა მიხეილ სააკაშვილმა მნიშვნელოვანი როლი შეასრულა რეგიონალური პრეცედენტის შექმნაში: მან ჩაატარა თავისუფალი და სამართლიანი არჩევნები, რამაც მის პარტიას დამარცხება მოუტანა და ხელისუფლების მშვიდობიანი, დემოკრატიული გადაცემის გზით ძალაუფლება ახალ მთავრობას გადაულოცა.

“2021 წლის პირველ ოქტომბერს პრეზიდენტი სააკაშვილი დაბრუნდა საქართველოში და ის მაშინვე დააპატიმრეს იმ სასჯელისთვის,  რომლისთვისაც იგი დაუსწრებლად იყო გასამართლებული.

ცნობილია, რომ ბრალდება პოლიტიკურად მოტივირებულია. სააკაშვილი ერთ-ერთი იყო იმ ათეულობით ყოფილ ჩინოვნიკთა შორის, რომლებიც მათმა მემკვიდრეებმა გაასამართლეს.

მიუხედავად ამისა, ბრალდება საერთაშორისო დონეზე არასდროს იყო აღიარებული და ის არავის დაუკავებია, ან არ გადაუწყვეტია მისი ექსტრადირება მაშინ,  როცა ის აგრძელებდა მუშაობას და მოგზაურობას საზღვარგარეთ, რადგან ეს ბრალდებები აღიარებული იყო პოლიტიკური დევნის დადგენილი მოდელის ნაწილად,” – წერია განცხადებაში.

● უკრაინული მიშა
● ხუთი ნიშანი, რომელიც მიუთითებს, რომ საქართველოში თვითმმართველობა არ არის
● თავისუფლება მიშას: რას ფიქრობენ ექსპერტები ბოლო ცხრა წლის ყველაზე ხალხმრავალ აქციაზე

ევროპარლამენტარების თქმით, სააკაშვილის დაპატიმრება ემსახურება მხოლოდ პოლიტიკური კრიზისის გაღრმავებას, რომელსაც საქართველო აწყდება წლების განმავლობაში უკიდურესი პოლარიზაციის შედეგად, რაც გამოწვეულია თავისუფალი პრესის კონტროლის, ჟურნალისტების, ოპოზიციური პოლიტიკოსების, აქტივისტების და თვით უცხოელი დიპლომატების დაშინებისა და ფარული თვალთვალის მცდელობებით. ასევე, მართვაში პოლიტიკური ოპოზიციისთვის სივრცისა და რესურსების შეზღუდვით:

“ყოველი დღე, როდესაც საქართველოს მთავრობა აგრძელებს პოლიტიკურად მოტივირებულ დევნას და მისი პოლიტიკური კონკურენტებისა და წინამორბედების დაპატიმრებას, არის კიდევ ერთი დღე, რომელიც აუარესებს საქართველოში უკიდურესი პოლიტიკური პოლარიზაციის ციკლს, რაც შეუძლებელს ხდის პოლიტიკური ძალების ერთიანობას სტრატეგიული ეროვნული პრიორიტეტების ირგვლივ.“

ხელმომწერების განმარტებით, საქართველოში არ არსებობს მართლმსაჯულების სისტემისადმი საზოგადოების ნდობა და სწორედ ამიტომ, საერთაშორისო დაკვირვების გარკვეული ელემენტი უნდა შეიქმნას, რათა ხელი შეუწყოს დაძაბულობის განმუხტვას პროცესის წინსვლისთვის.

განცხადებას ხელს აწერენ:

1. ვალდის ზატლერსი – ლატვიის ყოფილი პრეზიდენტი;
2. ვიქტორ იუშენკო – უკრაინის ყოფილი პრეზიდენტი;
3. კარლ ბილდტი – შვედეთის ყოფილი პრემიერი და ყოფილი საგარეო საქმეთა მინისტრი;
4. ანა ფოტიგა – ევროპარლამენტარი;
5. იაცეკ ცარიუშ ვოლსკი – ევროპარლამენტარი;
6. ანტონი ლეგუტკო ლიჟარდი – ევროპარლამენტარი;
7. რაფაელე ფიტო – ევროპარლამენტარი;
8. ელჟბიეტა რაფალსკა – ევროპარლამენტარი;
9. კარლო ფიდენცა – ევროპარლამენტარი;
10. ვიტოლდ იან ვაჟიკოვსკი – ევროპარლამენტარი;
11. ლადისლავ ილჩიც – ევროპარლამენტარი;
12. ელჟბიეტა კრუკი – ევროპარლამენტარი;
13. დაჩე მელბარდე – ევროპარლამენტარი;
14. რობერტს ზილე – ევროპარლამენტარი;
15. ბეტა მაჟურეკი – ევროპარლამენტარი;
16. ჩარლი ვეიმერსი – ევროპარლამენტარი;
17. სერჯიო ბერლატო – ევროპარლამენტარი;
18. ადამ ბილანი – ევროპარლამენტარი;
19. ბოგდან რჟონკა – ევროპარლამენტარი;
20. რაფაელე სტანკანელი – ევროპარლამენტარი;
21. დომინიკ ტარჟინსკი – ევროპარლამენტარი;
22. ჰერმან ტერჩი – ევროპარლამენტარი;
23. ვერონიკა ვრეჩიონოვა – ევროპარლამენტარი;
24. ანა ზალევჟსკა – ევროპარლამენტარი;
25. კოსმა ზლოტოვსკი – ევროპარლამენტარი;
26. პატრიკ ტომაჟ ჯაკი – ევროპარლამენტარი;
27. ჟბიგნიუ კუჟმიუკ – ევროპარლამენტარი;
28. რასა იუკნევიჩიანე – ევროპარლამენტარი;
29. რაფაელ გლუკსმანი – ევროპარლამენტარი;
30. რაიმუნდას ლოპატა – საქართველოსთან პარლამენტთაშორისაი ურთიერთობების ჯგუფის თავმჯდომარე, ლიეტუვის სეიმის წევრი;
31. ჯონას ჯარუტისი – ლიეტუვის სეიმის წევრი;
32. ჟიგიმანტას პავილიონისი – საგარეო ურთიერთობების კომიტეტის თავმჯდომარე, ლიეტუვის სეიმი;
33. ლაურინას კაშიუნასი – ლიეტუვის სეიმის წევრი;
34. ლაიმა ლუჩია ანდრიკიენე – ლიეტუვის სეიმის წევრი;
35. არმინას ლიდეკა – ლიეტუვის სეიმის წევრი;
36. ალგირდას ბუტკევიჩიუსი – ლიეტუვის სეიმის წევრი;
37. ვალენტინას ბუკაუსკას – ლიეტუვის სეიმის წევრი;
38. ლუკას სავისკასლიეტუვის სეიმის წევრი;
39. რომუალდას ვაისკუსი – ლიეტუვის სეიმის წევრი;
40. ანდრიუს ვიშნიაუსკას – ლიეტუვის სეიმის წევრი;
41. რიმანტე სალასევიჩიუტე – ლიეტუვის სეიმის წევრი;
42. ლაიმა ნაგიენე – ლიეტუვის სეიმის წევრი;
43. ალგირდას სისას – ლიეტუვის სეიმის წევრი;
44. კესტუტის ვილკაუკასი – ლიეტუვის სეიმის წევრი;
45. ემანუელის ჟინგერისი – ლიეტუვის სეიმის წევრი;
46. ალგირდას სტონჩაიტისი – ლიეტუვის სეიმის წევრი;
47. ვალდემარას ვალკიუნასი – ლიეტუვის სეიმის წევრი;
48. ტომას ტომილინასი – ლიეტუვის სეიმის წევრი;
49. სილვა ლენგვინიენე – ლიეტუვის სეიმის წევრი;
50. რიმა ბაშკიენე – ლიეტუვის სეიმის წევრი;
51. ლინა იონაუსკასი – ლიეტუვის სეიმის წევრი;
52. ედიტა რუდელიენე – ლიეტუვის სეიმის წევრი;
53. ვილია თარგამაძე – ლიეტუვის სეიმის წევრი;
54. კესტუტის მასიულისი – ლიეტუვის სეიმის წევრი;
55. რიტა ტამასუნიენე – ლიეტუვის სეიმის წევრი;
56. პაულე კუჟმიჩიენე – ლიეტუვის სეიმის წევრი;
57. მიხაილ კამინსკი – პოლონეთის სენატის სპიკერის მოადგილე;
58. პაველ ფიშერი – საგარეო ურთიერთობების, თავდაცვისა და უსაფრთხოების კომიტეტის თავმჯდომარე ჩეხეთში;
59. ერიკ კროსი – ესტონეთის პარლამენტის წევრი;
60. ვიტის იურკონისი – ვილნიუსის უნივერსიტეტის ლექტორი;
61. მარიუს ლაურინავიჩიუსი – დამოუკიდებელი ანალიტიკოსი ლიეტუვაში;
62. ბენ ჰოჯესი – ევროპაში აშშ-ის ჯარის ყოფილი გენერალი; 
63. დენიელ ჰამილტონი – კონსერვატიული პარტია, დიდი ბრიტანეთი;
64. ვალბურგა ჰაბსბურგ დაგლასი – შვედეთის პარლამენტის ყოფილი წევრი;
65. გაბრიელა ჰაბსბურგი – საქართველოს ყოფილი ელჩი გერმანიაში;
66. ვლადიმერ კარა-მურზა – რუსი ოპოზიციონერი პოლიტიკოსი;
67. ეკა ტყეშელაშვილი – საგარეო საქმეთა ყოფილი მინისტრი;
68. დავით სიხარულიძე – თავდაცვის ყოფილი მინისტრი;
69. ბათუ ქუთელია – საქართველოს ყოფილი ელჩი აშშ-ში;
70. ელენე ხოშტარია – პოლიტიკოსი;
71. თორნიკე გორდაძე – პარიზში პოლიტიკური მეცნიერებების ინსტიტუტის პროფესორი;
72. შოთა ღვინერია – საქართველოს ყოფილი ელჩი ნიდერლანდებში.

საქართველოს მესამე პრეზიდენტი მიხეილ სააკაშვილი პროტესტის ნიშნად მე-18 დღეა, შიმშილობს. პირადი ექიმის ინფორმაციით, მისი მდგომარეობა დამძიმებულია.

მიხეილ სააკაშვილი თბილისში 1 ოქტომბერს დააკავეს, მას შემდეგ, რაც იგი ფარულად დაბრუნდა სამშობლოში.

მესამე პრეზიდენტის წინააღმდეგ საქართველოში რამდენიმე სისხლის სამართლის საქმეა აღძრული, ერთ საქმეზე იგი უკვე გასამართლებულია და ექვსი წლით თავისუფლების აღკვეთა აქვს მისჯილი. ძებნილის სტატუსის მქონე ექს-პრეზიდენტი დაკავებისთანავე რუსთავის 1212 საპყრობილეში გადაიყვანეს. იმავე საღამოს მან შიმშილობა დაიწყო.