ევროკომისია: ქართული დიპლომატიური პასპორტის მფლობელებს EU-ში სამოგზაუროდ ვიზა დასჭირდებათ
ევროკავშირის სანქციები
ევროკომისიამ მიიღო გადაწყვეტილება, წარადგინოს წინადადება, რომლის მიხედვით ევროკავშირთან უვიზო მიმოსვლის შეთანხმება ქართველი დიპლომატების შემთხვევაში შეჩერდეს. როგორც ევროკომისიის საიტზეა განმარტებული, თუ საბჭომ მიიღო ეს წინადადება, ქართველ დიპლომატებს, მაღალჩინოსნებს და მათი ოჯახის წევრებს, რომლებსაც აქვთ დიპლომატიური და ოფიციალური პასპორტები, ევროკავშირში გამგზავრებისთვის ვიზა დასჭირდებათ.
სავიზო რეჟიმის გამარტივება, როგორიცაა განაცხადის ხანმოკლე დრო, დაბალი სავიზო მოსაკრებლები და ნაკლები დოკუმენტების წარდგენის მოთხოვნა, ასევე აღარ გავრცელდება დიპლომატიური და ოფიციალური პასპორტების მფლობელ ქართველებზე.
ევროკომისია განმარტავს, რომ თუ საბჭომ გადაწყვეტილება მიიღო, წევრ სახელმწიფოებს შესაბამისი ზომების მიღება მოუწევთ. ეს კი ნიშნავს, რომ თანამშრომლობის პრინციპის შესაბამისად, საქართველოს მიერ გაცემული დიპლომატიური, სამსახურებრივი/ოფიციალური პასპორტების და სპეციალური პასპორტების მფლობელების მიმართ სავიზო მოთხოვნების უნდა გამოიყენონ, რის შესახებაც წევრ სახელმწიფოებსა და კომისიას უნდა აცნობონ.
“ეს გადაწყვეტილება არ იქონიებს ნეგატიურ გავლენას ხალხებს შორის კონტაქტზე, რადგანაც საქართველოს მოქალაქეები, რომლებიც ჩვეულებრივ პასპორტებს ფლობენ, გააგრძელებენ უვიზო რეჟიმით სარგებლობას ევროკავშირში ხანმოკლე მოგზაურობების დროს.
ეს წინადადება არის პასუხი საქართველოს ხელისუფლების ძალადობრივ რეპრესიებზე მშვიდობიანი მომიტინგეების, პოლიტიკოსებისა და დამოუკიდებელი მედიის მიმართ, რომელიც დაიწყო მას შემდეგ, რაც ხელისუფლებამ 28 ნოემბერს გამოაცხადა, რომ 2028 წლამდე ევროკავშირთან მოლაპარაკებების გახსნას აღარ ეცდება.
გარდა ამისა, ბოლოდროინდელი ქართული კანონმდებლობა, მათ შორის “უცხოური გავლენის გამჭვირვალობის შესახებ” და “ოჯახური ღირებულებების დაცვისა და არასრულწლოვანთა დაცვის შესახებ” ძირს უთხრის ფუნდამენტურ უფლებებს, რაც ევროკავშირის ფასეულობებს უდევს საფუძვლად. ფუნდამენტური უფლებების დაცვა, როგორიცაა ანტიდისკრიმინაციული პოლიტიკის ეფექტური განხორციელება, უმნიშვნელოვანესი მოთხოვნაა ვიზალიბერალიზაციისთვის”, – ვკითხულობთ კომისიის განცხადებაში.
● 16 დეკემბერს ევროკავშირის საბჭო ქართული დიპლომატიური პასპორტებისთვის უვიზო მიმოსვლის შეჩერებაზე შეთანხმდა. ამის შესახებ ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, კაია კალასმა ევროკავშირის საგარეო მინისტრების შეხვედრის დასრულების შემდეგ განაცხადა.
● 15 დეკემბერს ესტონეთმა “ქართული ოცნების” რეჟიმის დამატებით 14 პირს დაუწესა სანქციები. ესტონეთის საგარეო საქმეთა მინისტრის თქმით, სანქცირებულთა შორის არის პრემიერმინისტრი ირაკლი კობახიძე.
● ასევე, ლიეტუვამ კიდევ 17 ქართველ პოლიტიკოსს, მათ შორის პრემიერ-მინისტრ ირაკლი კობახიძეს სანქციები დაუწესა, – ამის შესახებ ლიეტუვის საგარეო საქმეთა მინისტრი, კიასტუსის ბუდრისი სოციალურ პლატფორმა X-ზე წერს.
● 5 დეკემბერს კი უკრაინის პრეზიდენტმა ვოლოდიმირ ზელენსკიმ “ქართული ოცნების” ხელისუფლებისთვის სანქციების დაწესების ბრძანებას ხელი მოაწერა. ამის შესახებ ვოლოდიმირ ზელენსკიმ ვიდეომიმართვაში ისაუბრა. ზელენსკის თქმით, სანქციები მიმართულია ხელისუფლების იმ ნაწილის მიმართ, რომელიც “საქართველოს პუტინს გადასცემს”.
