ერთჯერადი ფინანსური დახმარება ბავშვებისთვის და სტუდენტებისთვის - მთავრობის სოციალური დახმარების მესამე ეტაპი
საქართველოს მთავრობამ ანტიკრიზისული, სოციალური დახმარების მესამე ეტაპი დააანონსა. პრემიერ-მინისტრი, გიორგი გახარია აცხადებს, რომ ქვეყანაში მიზნობრივი სოციალური დახმარებების “დრო გავიდა” და ახლა მთავრობამ ფართო სოციალური ჯგუფების დახმარება უნდა დაიწყოს.
“თუ ასე გაგრძელდა, მომავალი წლის დასაწყისში კიდევ ერთი სოციალური პაკეტის გამოცხადება მოგვიწევს. ერთია, როცა ჩვენ ვსაუბრობთ სოციალური ჯგუფების მიზნობრივ დახმარებაზე, მაგალითად, ტურიზმში დასაქმებულების, გიდების და ა.შ. ეს დრო გავიდა, ახლა ჩვენ გვჭირდება ფართო სოციალური ჯგუფების დახმარება”, – ამბობს პრემიერ-მინისტრი.
რას გულისხმობს დახმარების ეს გეგმა:
ერთჯერადი დახმარება 17 წლამდე ასაკის ბავშვებისთვის
ანტიკრიზისული სოციალური დახმარების მესამე ეტაპზე 17 წლამდე ასაკის საქართველოს ყველა მოქალაქე სახელმწიფოსგან ერთჯერად 200-ლარიან დახმარებას მიიღებს.
გახარიას თქმით, 200-ლარიან დახმარებას მიიღებს 280 000 მოქალაქე. ეს ჯამში 170 მლნ ლარია.
დახმარება მათ სექტემბრის დასაწყისში ჩაერიცხებათ. თანხის მისაღებად, მშობლებს მარტივი ფორმის შევსება მოუწევთ.
ფინანსთა მინისტრის, ვანო მაჭავარიანის განცხადებით, ბავშვები ამ დახმარებას კორონავირუსის პერიოდში სპეციალურად შექმნილი ფონდიდან stopcov-დან მიიღებენ. ამ ფონდში, სადაც კორონავირუსის პანდემიის დაწყებიდან დღემდე უამრავმა კომპანიამ ჩარიცხა თანხა, ამ დროისთვის 134 მლნ ლარია მოგროვილი.
დახმარება სოციალურად დაუცველი სტუდენტებისთვის
სტუდენტებს, რომელთა სოციალური სარეიტინგო ქულა 150 000-მდეა, სახელმწიფო ერთი სემესტრის სწავლის საფასურს დაუფარავს.
გარდა ამისა, 150 000 სარეიტინგო ქულის მქონე სტუდენტებს, რომელთაც სწავლის საფასურის გადაუხდელობის გამო სტუდენტის სტატუსი შეუჩერდათ, სახელმწიფო 2020-21 სასწავლო წლის საფასურს მთლიანად დაუფარავს.
მთავრობის დახმარებას მიიღებს დაახლოებით 33 000 სტუდენტი.
პრემიერ-მინისტრის განმარტებით, მთავრობას სურს, რომ ეკონომიკური კრიზისის გამო სტუდენტებმა სწავლა არ შეაჩერონ
კომუნალური გადასახადების სუბსიდირება
მთავრობის გადაწყვეტილებით, აბონენტებს, რომლებიც 200 კილოვატზე ნაკლებ ელექტროენეგიას და 200 კუბურ მეტრზე ნაკლებ გაზს ხარჯავენ, სახელმწიფო კომუნალურ გადასახადებს 2020 წლის ნოემბრიდან-2021 წლის თებერვლის ჩათვლით პერიოდშიც დაუფარავს.
კომუნალური გადასახადების სუბსიდირების 3-თვიანი პროგრამა საქართველოში აქამდეც მოქმედებდა. ეს პროგრამა 2020 წლის აპრილში დაიწყო და ივნისის ჩათვლით მოქმედებდა.
“ჩვენს შეძლებულ მოქალაქეებს ექნებათ შესაძლებლობა ასეთ დახმარებაზე თქვან უარი,” – ამბობს გახარია.
ერთჯერადი 300-ლარიანი დახმარება თვითდასაქმებულებისთვის
თვითდასაქმებულები, რომლებმაც შემოსავალი კორონავირუსის პანდემიის გამო დაკარგეს, მთავრობისგან ერთჯერადად 300-ლარიან დახმარებას მიიღებენ.
თვითდასაქმებულებისთვის ერთჯერადი კომპენსაცია მთავრობამ ივნისშიც გასცა. როგორც პრემიერ-მინისტრი ამბობს, კომპენსაციის მიღებაზე ჯამში 250 ათასი განაცხადი შევიდა, კომპენსაციის მიღებისთვის საჭირო საბუთების მოგროვება კი აქედან მხოლოდ 150 000-მა ადამიანმა მოახერხა. მთავრობამ გადაწყვიტა, რომ ერთჯერადი 300-ლარიანი დახმარება მისცეს იმ 80 ათას ადამიანსაც, რომელმაც საბუთების სრულად მოგროვება ვერ შეძლო.
• ანტიკრიზისული გეგმა – ვინ რა დახმარებას მიიღებს
• როგორ აპირებს საქართველოს ხელისუფლება სოფლის მეურნეობის გადარჩენას
• საქართველო: რა ბედი ელის ტურიზმს?
მთავრობის მიერ დაანონსებული ანტიკრიზისული სოციალური დახმარების მესამე ეტაპი დროში ემთხვევა წინასაარჩევნო პერიოდს – ოქტომბრის ბოლოს საქართველოში საპარლამენტო არჩევნები ტარდება. ამ არჩევნებს ქვეყნისთვისაც და პოლიტიკური პარტიებისთვისაც გადამწყვეტი მნიშვნელობა აქვს – ვინც გაიმარჯვებს, მომდევნო 4 წლის განმვალობაში ქვეყანასაც ის მართავს.
ფეისბუქის რეაქცია
სოციალურ ქსელებში წერენ, რომ მთავრობა ადმინისტრაციული რესურსის გამოყენებით წინასაარჩევნოდ ამომრჩევლის მოსყიდვას გეგმავს.
“წინასაარჩევნო დაპირებებს გახსნილად ვაცხადებ. ნაცების მიერ დარიგებულ ზეთს და კარტოფილს ნამდვილად სჯობია.”
“ბერუკაც ( იგულისხმება “ქართული ოცნების” თავმჯდომარის და მილიარდერ ბიძინა ივანიშვილის შვილიშვილი) მიიღებს დახმარებას.”
“მშვენიერია, ბავშვისთვის მიცემული დახმარებით მათემატიკის რეპეტიტორის ერთი თვის ფულს დავფარავ.”
“აგერ ახლა გავაჩინე ბავშვი და კი გამაკეთებინა 200 ლარი, დედა ენაცვალოს.”
“17 წლამდე ბავშვებისთვის 200 ლარის მიცემა რა მიზანს ემსახურება? მარტო სოციალურად დაუცველებისთვის რომ მიეცათ, გავიგებდი. გაცილებით უკეთესი იქნებოდა, ეს ფული სკოლებისთვის მიეცათ და ისინი საჭიროების მიხედვით გამოიყენებდნენ, რასაც გრძელვადიანი შედეგი ექნებოდა, 120 მილიონზეა საუბარი.”
“მორიგი სულელური ხარჯვა. კომუნალურები იმათ რომ დაუფარეს, ვისაც ცენტრალური გათბობა აქვს და იმათ არა, ვინც დენით თბება და გაზით გათბობის ფული არ აქვს. ახლა 200 ლარი უნდა მოგვცენ იმათ, ვისაც არ გვჭირდება მაგათი დახმარება და იმ სოციალურად დაუცველებს, ვისაც ბავშვი არ ჰყავთ, არაფერს აძლევენ.”
საზოგადოების მეორე ნაწილი მთავრობის ამ დახმარებას დადებითად აფასებს:
“თქვენი მოსაწონი ხომ ვერაფერი გაკეთდა ამ ქვეყანაში. უჭირს ხალხს, არ უნდა დაეხმაროს მთავრობა გაჭირვებულებს?”
“რა გრძელვადიან სტრატეგიებს და შედეგებს ითხოვთ. ახლა ხანძარია ქვეყანაში და ეს ხანძარია ჩასაქრობი,” – წერენ ისინი.
პრემიერ-მინისტრის პასუხი მთავრობის კრიტიკოსებს
ის უარყოფითი შეფასება, რაც ანტიკრიზისული სოციალური დახმარების მესამე ეტაპის გამოცხადებას მოჰყვა, პრემიერ-მინისტრ გიორგი გახარიას შეუმჩნეველი არ დარჩენია.
გახარიამ განაცხადა, რომ პროგრამის დაწყება იჩქარეს, რათა ის წინასაარჩევნო კამპანიის ნაწილად არ ყოფილიყო აღქმული.
„ჩვენ გვესმის, რომ მსგავსი სპეკულირებები იქნებოდა, ამიტომ გავაკეთეთ ადრე, თორემ გონივრულად რომ წავსულიყავით და ცოტა უფრო პასუხისმგებლიანი, თანმიმდევრული, ეფექტიანი ოპოზიცია რომ გვყავდეს, ეს შეიძლებოდა გაკეთებულიყო აგვისტოს ბოლოს. უფრო ლოგიკური იქნებოდა. ამიტომ ცოტა ვიჩქარეთ. არჩევნებთან არანაირი კავშირი არ არის,“ – განმარტავს პრემიერ-მინისტრი.
რა ზარალი ნახა ქვეყანამ კორონავირუსის პანდემიის გამო
• საქართველოს ეროვნული ბანკის პროგნოზით, კორონავირუსის პანდემიით გამოწვეული კრიზისის ფონზე, საქართველოს ეკონომიკა წელს 5%-ით შემცირდება.
• ქვეყნის ბიუჯეტი შემოსავლების სახით 1.8 მილიარდ ლარს დაკარგავს.
• მიმდინარე ხარჯები 300 მლნ ლარით შემცირდა.
• გიორგი გახარია ამბობს, რომ კორონავირუსის პანდემიის გამო სამუშაოს 350 ათასი ადამიანი დაკარგავს.
საქართველოს მთავრობამ კორონავირუსის პანდემიით გამოწვეული ზარალის შემსუბუქებისთვის ანტიკრიზისული გეგმა 24 აპრილს დააანონსა. ამ გეგმის განხორციელებისთვის ბიუჯეტიდან 3,5 მლრდ ლარი გამოიყო.
ამავე დროს საქართველოს მთავრობამ ტურიზმის სექტორის დასახმარებლად 200 მლნ ლარი გამოყო, სოფლის მეურნეობისთვის – 300 მლნ, ხოლო სამშენებლო სექტორისთვის – 150 მლნ ლარი.
