ერევნის ფესტივალი „ღვინის დღეები“ კრიტიკისა და პროტესტის მიუხედავად მაინც გაიმართა
წელს, ერევანში, კვლავ გაიმართა ფესტივალი „ღვინის დღეები“, მიუხედავად მწვავე კრიტიკისა, რომელიც მისი ორგანიზატორების მისამართით სოციალურ ქსელებში ისმოდა.
ბევრი აღშფოთებული იყო იმით, რომ მსგავსი გასართობი ღონისძიება ყარაბაღის ომში დამარცხების შემდეგ იგეგმებოდა. ადამიანები მათ ახსენებდნენ ათასობით დაღუპულს, მათ, ვინც ჯერაც არ დაბრუნებულა სამშობლოში აზერბაიჯანის ტყვეობიდან, არიან უგზოუკვლოდ დაკარგულებიც.
თუმცა, უკვე ტრადიციად ქცეული ღვინის ფესტივალის ორგანიზატორებმა ის არ გადადეს. ღვინის დღეები ჩვეულებისამებრ ჩატარდა ერევნის ცენტრში და მასში მრავალი ტურისტი და ადგილობრივი მცხოვრები მონაწილეობდა.
JAMnews-ი გთავაზობთ ვიდეოს ადგილიდან, ასევე, მათ მოსაზრებებს, ვინც ფესტივალზე მივიდა.
- სომხეთი: კორონავირუსი მეღვინეებისა და მევენახეების წინააღმდეგ
- სომხეთში ცხოვრება ძვირდება: სტატისტიკის კომიტეტმა მიზეზები გამოიანგარიშა
ფესტივალის შესახებ
სომხეთში ღვინის დღეები 2017 წლიდან, მაისის პირველ პარასკევსა და შაბათს, ერევნის რამდენიმე ცენტრალურ ქუჩაზე იმართება. მაგრამ 2021 წელს ღონისძიება ივნისში გადაიტანეს – თავდაპირველად ორგანიზატორებმა მისი გადადება კორონავირუსთან დაკავშირებული შეზღუდვების გამო გადაწყვიტეს, შემდეგ კი საერთოდ გადაიფიქრეს.
მათ მიაჩნიათ, რომ სომხური ღვინის ფესტივალი ეფექტიანი მოედანია ეკონომიკის ორი უმნიშვნელოვანესი სფეროს განვითარებისთვის – ტურიზმისა და მეღვინეობის.
წელს, ღვინის ფესტივალის პავილიონებში წარმოდგენილი იყო 281 სახეობის ღვინო. 113-ზე მეტი იყო წითელი ღვინო, 90-ზე ცოტათი მეტი – თეთრი, 30 – ვარდისფერი, 18 – შუშხუნა და 38 – ხილის.
ამასთან, 2021 წლის ფესტივალი გამორჩეული იყო საქველმოქმედო ინიციატივებით. ჰადრუთიდან ჩამოტანილი ღვინის გაყიდვიდან მიღებული მოგება, რომელიც ყარაბაღის ომის შემდეგ აზერბაიჯანს გადაეცა, ასევე, ცნობილი ყარაბაღული მწვანილიანი ღვეზელის – გადაეცემათ საბრძოლო მოქმედებების შედეგად დაზარალებულთა და დაღუპულთა ცოლებს.
ფესტივალის მონაწილეთა მოსაზრებები
რუსი ტურისტების ჯგუფმა ღონისძიების შესახებ სასტუმროში შეიტყო. ერთ-ერთი მათგანი, ანდრეი ამბობს, რომ მაშინვე გადაწყვიტეს: აუცილებლად უნდა მიეღოთ მასში მონაწილეობა. ამასთან, რუს ტურისტებს ასევე მოსმენილი ჰქონდათ მოსაზრება, ომში დამარცხების შემდეგ, მსგავსი ღონისძიების ჩატარების დაუშვებლობის შესახებ. მაგრამ ანდრეი და მისი მეგობრები არ იზიარებენ ამ მოსაზრებას.
„განა, აქ შეკრებილ ადამიანებს, ბედნიერების უფლება არ აქვთ?“.
სამველს, რომელიც შვებულების რამდენიმე დღის სამშობლოში გასატარებლად უცხოეთიდან ჩამოვიდა, საერთოდ არ სურს უპასუხოს კითხვას ღვინის ფესტივალის მიზანშეწონილობაზე:
„არ მინდა ომსა და პოლიტიკაზე საუბარი. ეს ყველაფერი [ომი და მსხვერპლი] იმისათვის იყო, რომ სიცოცხლე გაგრძელდეს და აი – გრძელდება კიდეც“.
ანუში მომსახურების სფეროში მუშაობს, მანაც ბევრი ურთიერთსაწინააღმდეგო აზრი მოისმინა ფესტივალის თაობაზე. ამბობს, რომ მისთვის, პირველ რიგში მნიშვნელოვანი და ფასეულია ღვინის მწარმოებლების ძალისხმევა, რომლებიც ბიზნესის შენარჩუნებას ცდილობენ უმძიმესი კრიზისის პერიოდში:
„ახალი, ფანტასტიკური ბრენდები აღმოვაჩინე. ძალიან მიხარია, რომ მიუხედავად ქვეყნის მძიმე ეკონომიკური მდგომარეობისა, ისინი მუშაობენ და საკუთარი პროდუქცია სხვა ქვეყნებში გააქვთ. დაე, ადამიანებმა გაიგონ, რომ ეკონომიკისა გლოვით და ტირილით ვერ შეინარჩუნებ. წინ უნდა ვიაროთ“.
როზა, რომელიც ტურიზმის სფეროში მუშაობს, ეთანხმება ამ მოსაზრებებს. საზოგადოებას ახსენებს, რომ გასულ წელს ეკონომიკის ეს სფერო უბრალოდ პარალიზებული იყო.
„იმ მუსიკასთან დაკავშირებით, რომელიც ფესტივალზე ისმის, ორგანიზატორები წელს თავშეკავებულები იყვნენ. წინა წლებში, სრულიად განსხვავებული ვითარება იყო. ერთი სიტყვით, მათაც ესმით სიტუაცია, თანაუგრძნობენ. ჩემთვის კი უმთავრესია ის, რომ ისევ ვხედავ აქ ბევრ ტურისტს“, – ამბობს როზა.
