ეპიდემიოლოგები საქართველოში შეზღუდვების გამკაცრებას არ ელოდებიან
კოვიდპანდემიის მეხუთე და ერთ-ერთ ყველაზე მძიმე ფაზაში შესული საქართველოს ეპიდემიოლოგები შეზღუდვების გამკაცრებას არ ელოდებიან, ამის შესახებ თენგიზ ცერცვაძემ დღეს ისაუბრა.
“შეზღუდვები წარსულია, რადგან მან გამოიწვია ეკონომიკის უკანსვლა და ადამიანების ცხოვრების გაუარესება, მაგრამ ველოდები რეგულაციების აღსრულებაზე გამკაცრებას. ამაზე მე პირადად ვსაყვედურობ ხელმძღვანელობას, რომ ისინი არასაკმარისად მკაცრად აკონტროლებენ რეგულაციების აღსრულებას”, – ამბობს ცერცვაძე.
იგივე დაადასტურა ჯანდაცვის მინისტრის მოადგილემ, თამარ გაბუნიამაც. მისი თქმით, ის შეზღუდვები და რეგულაციები, რომელიც უკვე დაწესებულია, აუცილებლად უნდა აღსრულდეს, რადგან თუ არ მოხდა იმის აღსრულება, რაც უკვე დაწესებულია, აბსოლუტურად აზრს მოკლებულია დამატებითი შეზღუდვების დაწესება.
გაბუნიამ ისაუბრა დამატებითი საველე ჰოსპიტლების შესახებაც და აღნიშნა, რომ დამატებითი საველე რესურსის მობილიზების გარეშე მართვა ჯერ-ჯერობით შესაძლებელია:
“იმატებს რეანიმაციულ განყოფილებაში პაციენტების რაოდენობა, 330-ს გადააჭარბა. ბინაზე ბევრი პაციენტი მკურნალობს. ასევე, ჯერჯერობით კიდევ არის კოვიდსასტუმროების რესურსი, რომელიც მინიმალურადაა ამ ეტაპზე დატვირთული.”
გაბუნიას თქმით, მომდევნო რამდენიმე დღე საქართველოს ჯერ კიდევ ექნება შესაძლებლობა, რომ აქტიურად იმართოს პაციენტების ნაკადები.
“თუმცა, ეს, ბუნებრივია, უსასრულო ვერ იქნება და ამის პარალელურად მნიშვნელოვანია ვაქცინაციის პროგრამის გააქტიურება, რადგან ესაა რეალურად ერთადერთი გამოსავალი ამ სიტუაციიდან”, – განაცხადა მინისტრის მოადგილემ.
მისი განმარტებით, ქვეყანაში გამართული აქციები მობილობას ძალიან ზრდის, რადგან აქციები არ ექვემდებარება შეზღუდვას და მას “თან სდევს პოლიტიკურ პროცესებს. აქედან გამომდინარე, ესაა რისკი და ეს რისკი დარჩება.”
● საქართველოში “ასტრაზენეკას” 17 ათასამდე დოზას ვადა გაუვიდა
● ეკლესია და Pfizer-ი: რატომ ჩააგდო საქართველომ ვაქცინაციის კამპანია
● საქართველოში ვაქცინაციის მოწინააღმდეგთა 37,5%-ი მიზეზად უშვილობას ან სიკვდილს ასახელებს
კორონავირუსის საწინააღმდეგო ვაქცინაცია საქართველოში 15 მარტს დაიწყო. ქვეყანაში აცრები ძირითადად ოთხი ვაქცინით მიმდინარეობდა – გერმანულ-ამერიკული “ფაიზერი”, ბრიტანული “ასტრაზენეკა”, ჩინური “სინოფარმი” (პეკინი) და ჩინური “სინოვაკი”.
როგორც დაავადებათა კონტროლის ეროვნული ცენტრის (NCDC) დირექტორი ამირან გამყრელიძე განმარტავს, „ასტრაზენეკასა“ და „ფაიზერისგან“ განსხვავებით, ჩინური წარმოების ვაქცინებს ვადა ორიდან სამ წლამდე აქვთ.
გუშინ ამირან გამყრელიძემ განაცხადა ისიც, რომ კორონავირუსის საწინააღმდეგო „ასტრაზენეკას“ ვაქცინის 17 ათასამდე დოზას ვადა გაუვიდა და ის უნდა ჩამოწერონ.
„ასტრაზენეკა“, საერთაშორისო შეფასებით, ერთ-ერთ საუკეთესო ვაქცინად მიიჩნევა. ჩინური წარმოებისა და „ფაიზერის“ შემდეგ, ეს ბევრ ქვეყანაში ყველაზე ხშირად გამოყენებადი ვაქცინაა.
ეროვნული გეგმის თანახმად, ქვეყნის მიზანი წლის ბოლომდე მოსახლეობის 60%-ის აცრა იყო. თუმცა, ბოლო დროს, ქვეყანაში ვაქცინაციის ტემპი საგრძნობლად დაეცა.
თუ აგვისტოს ბოლოს დღეში 20 ათასზე მეტი ადამიანი იცრებოდა, ბოლო პერიოდში დღეში საშუალოდ 3 ათასი დოზა ვაქცინა კეთდება.
3 ნოემბრის მონაცემებით სულ ჩატარებულია 1 986 729 აცრა. სულ მცირე 1 დოზით ვაქცინირებულია 1 040 022 ადამიანი – მოზრდილი მოსახლეობის 36.6 %; სრულად ვაქცინირებულია 944 520 ადამიანი – მოზრდილი მოსახლეობის 33.1%. გასული დღე-ღამის განმავლობაში მთლიანობაში აიცრა 3 868 ადამიანი.
ამირან გამყრელიძის თქმით, იმისათვის, რომ აცრების ყოველდღიურმა მაჩვენებელმა მოიმატოს, მეტი ქმედითი ღონისძიებაა საჭირო. ხოლო თამარ გაბუნია აცხადებს, რომ მილიონამდე აცრილმა ერთი ადამიანი რომ დაარწმუნოს, ეპიდსიტუაცია გაუმჯობესდება.
3 ნოემბერს საქართველოში კორონავირუსით ინფიცირების 6 024 ახალი შემთხვევა დაფიქსირდა, გარდაიცვალა კიდევ 49 ადამიანი. დღიური დადებითობა კი 10.33%-ია.
