დიდი ბრიტანეთის საგარეო უწყებაში საქართველოს დროებითი რწმუნებული გამოიძახეს და პროტესტი გამოუცხადეს
დიდი ბრიტანეთის პროტესტი
თანამეგობრობისა და განვითარების ოფისის (FCDO) მიერ გავრცელებული ინფორმაციით, დიდი ბრიტანეთის საგარეო უწყებამ ლონდონში მყოფი საქართველოს საქმეთა დროებითი რწმუნებული, გიორგი (ბაჩო) საგანელიძე გამოიძახა და პროტესტი გამოხატა მისი მთავრობის მიერ პარტნიორებისადმი, მათ შორის ბრიტანეთისადმი “ცრუ ბრალდებების და საჯარო თავდასხმების“ გამო.
ბრიტანეთის საგარეო უწყების პრესცენტრის თანახმად, ბრიტანელმა მაღალჩინოსანმა – რომლის ვინაობაც საჯაროდ არ დასახელებულა – საგანელიძესთან საუბარში ნათლად გამოხატა გაერთიანებული სამეფოს “მტკიცე” წინააღმდეგობა საქართველოს “სულ უფრო საზიანო ტრაექტორიის” მიმართ.
ამჟამად საქართველოს ბრიტანეთში ელჩი არ ჰყავს და დიპლომატიურ მისიას სწორედ საგანელიძე ხელმძღვანელობს. ის არის საგანგებო და სრულუფლებიანი დესპანი დიდ ბრიტანეთსა და ჩრდილოეთ ირლანდიის გაერთიანებულ სამეფოში.
საგანელიძესთან საუბრისას ბრიტანელმა მაღალჩინოსანმა “მკაცრად გააპროტესტა” ოცნების მიერ გაერთიანებული სამეფოსა და საერთაშორისო პარტნიორების წინააღმდეგ წამოწყებული “ცრუ ბრალდებები” და საჯარო თავდასხმები.
ბრიტანეთის საგარეო უწყების სპიკერი ასევე აცხადებს, რომ:
- გავლენიანი ოპოზიციონერი ლიდერების დაპატიმრება საქართველოს მთავრობის უახლესი მცდელობაა, შეზღუდოს თავისუფლება და ჩაახშოს განსხვავებული აზრი;
- საარჩევნო კონკურენტების დაკავება შეუთავსებელია ევროატლანტიკურ მისწრაფებებთან, – თუ ასეთი კვლავ გააჩნია “ქართულ ოცნებას“
- გაერთიანებული სამეფოს მთავრობა უყოყმანოდ განიხილავს შემდგომ ქმედებებს, თუ საქართველო არ დაუბრუნდება დემოკრატიის, თავისუფლებებისა და ადამიანის უფლებების პატივისცემასა და დაცვას.
წინაისტორია
27 ივნიის დიდი ბრიტანეთის მთავრობამ ქართული ბიზნესისთვის სახელმძღვანელო გამოაქვეყნა და განაცხადა, რომ ვინც რუსეთს სანქციებისაგან გვერდის ავლაში ეხმარება, თავად აღმოჩნდება სანქციების ქვეშ. განცხადებაში, რომელიც ბრიტანეთის სამთავრობო პორტალზე აიტვირთა, კონკრეტული მაგალითებით არის ახსნილი, რა ითვლება სანქციებისგან თავის არიდებაში დახმარებად.
დოკუმენტის თანახმად, სანქციები არ ვრცელდება მხოლოდ ბრიტანეთის მოქალაქეებზე, ის ვრცელდება ყველა ბიზნესზე, რომელიც ბრიტანეთშია რეგისტრირებული.
განცხადების მიხედვით, რუსეთი ეყრდნობა ისეთ ტაქტიკას, როგორიცაა არაპირდაპირი გადაზიდვის მარშრუტები, საქონლის საბოლოო დანიშნულების გაყალბება და პროფესიული თავის არიდების ქსელები.
მანამდე დიდი ბრიტანეთის საელჩომ განცხადება გაავრცელა, სადაც ნათქვამია, რომ ოცნების მიერ ინიცირებული კანონის გამო, გააუქმეს დაგეგმილი საგრანტო წინადადებები, რომლებიც მიზნად ისახავდა დაგეგმილი მუნიციპალური არჩევნების გამჭვირვალობისა და კონკურენტუნარიანობის მხარდაჭერას.
მათივე ინფორმაციით, ოცნების მიერ ინიცირებული კანონის გამო, გრანტების დამტკიცების პროცედურები ჯერ არ არის დასრულებული, რის შესახებაც “ქართულმა ოცნებამ” საელჩოს აცნობა.
ბრიტანეთს უკვე არაერთი ქართველი მაღალჩინოსნისთვის აქვს სანქციები დაწესებული:
- ვახტანგ გომელაური, ყოფილი შინაგან საქმეთა მინისტრი – გადადგა სანქცირების შემდეგ;
- გიორგი გაბიტაშვილი, ყოფილი გენერალური პროკურორი – გადადგა სანქცირების შემდეგ;
- შინაგან საქმეთა მინისტრის მოადგილე შალვა ბედოიძე;
- შსს-ის განსაკუთრებულ დავალებათა დეპარტამენტის უფროსის (ზვიად „ხარება“ ხარაზიშვილის) მოადგილე მირზა კეზევაძე;
- კარლო კაციტაძე, სპეციალური საგამოძიებო სამსახურის უფროსი;
- მილერი ლაგაზაური, გდდ-ის უფროსის მოადგილე;
- ალექსანდრე დარახველიძე, შს მინისტრის მოადგილე;
- სულხან თამაზაშვილი – თბილისის პოლიციის დეპარტამენტის ყოფილი დირექტორი; სანქცირების შემდეგ დანიშნეს აჭარის მთავრობის მეთაურად;
- მოსამართლე მიხეილ ჩინჩალაძე;
- მოსამართლე ლევან მურუსიძე.
