სომხეთი: ყოფილი ფინანსთა მინისტრის შვილი გამოძიებას გაექცა

ბიზნესმენი გურგენ ხაჩატრიანი, სატელეკომუნიკაციო კომპანია Ucom-ის დირექტორთა საბჭოს თავმჯდომარე, ასევე, კომპანია Galaxy ჯგუფის თანადამფუძნებელი, მას შემდეგ გაიქცა, რაც სისხლის სამართლის გამოძიების ცენტრალური ფიგურა გახდა.

ხელისუფლების ვერსია: თანამდებობის ბოროტად გამოყენება და განსაკუთრებით დიდი ოდენობით თანხის მითვისება

ზუსტად, რომელი მუხლით ედება მას ბრალი, ჯერჯერობით უცნობია. მაგრამ უკვე ნათელია, რომ გურგენ ხაჩატრიანის წინააღმდეგ არსებული ბრალდება დაკავშირებულია მამამისის – სომხეთის ყოფილი ფინანსთა მინისტრისა და შემოსავლების კომიტეტის ყოფილი თავმჯდომარის, გაგიკ ხაჩატრიანის საქმიანობასთან.

გამოძიების ვერსიით, გაგიკ ხაჩატრიანის შვილებმა შექმნეს კომპანია, რომელიც შეუზღუდავად იგებდა ინფორმაციული ტექნოლოგიების სახელმწიფო ტენდერებს, რადგან ამაში მათ ეხმარებოდა სტრუქტურები, რომლებსაც მათი მამა ხელმძღვანელობდა.

თავად გაგიკ ხაჩატრიანი დაპატიმრებულია სამსახურებრივი უფლებამოსილების ბოროტად გამოყენებისა და განსაკუთრებით დიდი ოდენობით თანხების მითვისების ბრალდებით.

ახლა, მამა და შვილი ბრალდებული არიან 3 მილიონი დოლარის ოდენობის საბიუჯეტო თანხის მითვისებასა და 22 მილიონი დოლარის ოდენობის ქრთამის აღებაში.

გურგენ ხაჩატრიანის ვერსია: ხელისუფლება მისთვის Ucom-ის აქციების წართმევას ცდილობს

მიმალვამდე, გურგენ ხაჩატრიანმა უკანონო დევნის შესახებ საჯარო განცხადება გააკეთა და აღნიშნა, რომ მასზე ხორციელდება ზეწოლა „სახელმწიფო დონეზე“.

3 მაისს, სასამართლომ ხაჩატრიანის დაკავების გადაწყვეტილება მიიღო, მაგრამ მისი აღსრულება ჯერჯერობით არ მოხერხდა – ეჭვმიტანილი მიიმალა. სომხეთის ეროვნული უსაფრთხოების სამსახურმა ის ხელიდან გაუშვა.

ბრალდების დეტალები

4 მაისს, ეროვნული უსაფრთხოების სამსახურმა გურგენ ხაჩატრიანზე ძებნა გამოაცხადა.

ამის შესახებ გავრცელებულ ინფორმაციაში მოყვანილია ხაჩატრიანების ოჯახის მიერ სახელმწიფოსთვის მიყენებული ზარალის კონკრეტული მაჩვენებლები.

ამის შესახებ მოხსენებაში მოცემულია ხაჩატრიანების ოჯახის მიერ სახელმწიფოსთვის მიყენებული ზიანის კონკრეტული მაჩვენებლები

12 წლის განმავლობაში, 2008-დან 2020 წლამდე, კომპანიამ უამრავი მომგებიანი კონტრაქტი გააფორმა.

კერძოდ, როგორც ეროვნული უსაფრთხოების სამსახურის განცხადებაშია ნათქვამი, კომპანიამ მაღალი ფასით შეიძინა 19 პროგრამული მოდული.

სახელმწიფოს ისინი 4 283 580 000 დრამი (დაახლოებით, 8 მილიონი დოლარი) დაუჯდა. გამოძიების შეფასებით, მათი რეალური ღირებულება 2 777 410 417 დრამი (4.5 მილიონი დოლარი) იყო.

სხვაობა, რომელიც 1 506 169 583 დრამს (3 მილიონ დოლარს) შეადგენდა, გამოძიების ვერსიით, სახელმწიფო ჩინოვნიკის შვილების კომპანიაში წავიდა.

იმისათვის, რომ წყარო და თავად ფულის გათეთრების ფაქტი დაემალათ, მთელი ფული გაანაღდეს და მესამე პირის გავლით ჩარიცხეს კომპანია Ucom-ში.

ასევე, 2011 წლის განმავლობაში, ხაჩატრიანების მითითებით, ანგარიშზე ჩაირიცხა 22.4 მილიონი დოლარი, გარიგების დამალვისთვის კი ფული გაფორმდა, როგორც სესხის შესახებ ორი გარიგება.

ხაჩატრიანის ადვოკატი ამტკიცებს, რომ ეს მართლაც სესხი იყო, მისი ვადა არ ამოწურულა და თანხა უნდა დაბრუნდეს.

კომპანია Ucom-ის როლი

გურგენ ხაჩატრიანი და მისი ნათესავები არიან სატელეკომუნიკაციო კომპანიის აქციათა დიდი ნაწილის მფლობელები.

10 აპრილს, Ucom-ის თანადამფუძნებლებმა, ძმებმა აიკ და ალექსანდრ ესაიანებმა განაცხადეს, რომ არ ეთანხმებოდნენ განვითარების სტრატეგიას, რომელსაც კომპანიის სხვა აქციონერები აწარმოებდნენ. კერძოდ, საუბარი იყო ხაჩატრიანების ოჯახზე, თუმცა, კომპანიაში სხვა აქციონერებიც არიან, შედარებით მცირე წილით.

თავად ძმებ ესაიანებს აქციათა მხოლოდ ექვსი პროცენტი ეკუთვნით. ისინი დანარჩენი 94 პროცენტის გამოსყიდვასაც ცდილობდნენ, რათა კომპანიაზე კონტროლი მოეპოვებინათ. უარის მიღების შემდეგ, ორივემ უარი განაცხადა კომპანიის ხელმძღვანელობაში საკუთარ თანამდებობაზე.

გარკვეული დროის შემდეგ, გურგენ ხაჩატრიანმა განაცხადა, რომ მისთვის კომპანიის წართმევას ცდილობენ და დაპატიმრებით ემუქრებიან, რის გამოც საერთაშორისო ორგანიზაციების მხრიდან ყურადღების მიქცევა მოითხოვა:

„ნათლად განმიცხადეს, რომ თუკი არ დავთანხმდები – ბრალს დამდებენ განსაკუთრებით მძიმე დანაშაულში და დამაპატიმრებენ. ამას მოჰყვება ანალოგიური ქმედება ჩემს ძმასთან, ოჯახის სხვა წევრებთან, ნათესავებსა და ჩვენს ახლობელ ადამიანებთან დაკავშირებით“.

კონკრეტულად ვინ დაემუქრა, გურგენ ხაჩატრიანმა არ თქვა.

თუმცა, მის განცხადებას მაშინვე გამოეხმაურა პრემიერ-მინისტრის პრესმდივანი.

Facebook-ის საკუთარ გვერდზე მანე გევორქიანმა დაწერა, რომ ხაჩატრიანების ოჯახი ადრე მზაობას გამოთქვამდა ნაძარცვის დაბრუნებაზე.

„გაგიკ ხაჩატრიანი და მისი შვილები ხელმძღვანელობდნენ სომხეთში მრავალი წლის განმავლობაში მოქმედ კორუფციულ-მაფიოზურ სისტემას, რის შედეგადაც მათ რამდენიმე ასეული მილიონის უკანონო ქონება დააგროვეს“, – დაწერა მანე გევორქიანმა.

ამიტომ, მისი თქმით, ხელისუფლებას მიაჩნია, რომ საკუთარი წილის გაყიდვის შემთხვევაში, გურგენ ხაჩატრიანმა მიღებული თანხა სომხეთის ბიუჯეტში უნდა გადარიცხოს, როგორც მამამისის მუშაობის პერიოდში სახელმწიფოსთვის მიყენებული ზარალის კომპენსაცია.

სად შეიძლება იმალებოდეს გურგენ ხაჩატრიანი?

ხაჩატრიანების ადვოკატი ამბობს, რომ მისთვის უცნობია, სად არის გურგენ ხაჩატრიანი. ახლა სომხეთიდან გასვლა მარტივი არ არის – კორონავირუსის პანდემიის გამო გამოცხადებული საგანგებო მდგომარეობის პირობებში, საზღვრები ჩაკეტილია.