"დავასრულოთ ბავშვების ტყვეობა" - პროკურატურასთან აქციაზე პოლიციამ 9 აქტივისტი დააკავა

მას შემდეგ, რაც სახალხო დამცველმა ნინო ლომჯარიამ ნინოწმინდის ბავშვთა პანსიონში სავარაუდო ძალადობისა და გაუპატიურების შემთხვევებზე განცხადება გააკეთა, სამოქალაქო აქტივისტებმა აქცია პროკურატურასთან გამართეს.

საპროტესტო აქციაზე პოლიციამ 9 ადამიანი დააკავა, მათგან ერთს – გიგა მაქარაშვილს ხელი აქვს მოტეხილი, ხოლო ნიკა ფარულავას სხეულზე დაბეჟილობა აღენიშნება და ხელი აქვს ნაღრძობი.

ამ დროისთვის ხუთი აქტივისტი ხელწერილის საფუძველზე გაათავისუფლეს, ხოლო დანარჩენები დროებითი მოთავსების იზოლატორში გადაიყვანეს.

სახალხო დამცველის, ნინო ლომჯარიას თქმით, ნინოწმინდის პანსიონში მომხდარი სავარაუდო დანაშაულებრივი ფაქტების შესახებ ინფორმაცია მისმა აპარატმა გამოითხოვა, საიდანაც ირკვევა, რომ 2016-2021‬ წლებში დაწყებულია ოთხი სისხლის სამართლის საქმის გამოძიება არასრულწლოვანების მიმართ სავარაუდო ძალადობის ფაქტზე.

სახალხო დამცველის განმარტებით, პროკურატურა ბავშვთა პანსიონში – რომელსაც სხალთელი ეპისკოპოსი სპირიდონი მართავს – გაუპატიურების საქმესაც იძიებს. 

_______________________________

● სახელმწიფოს იქ არ უშვებენ. რა ხდება ნინოწმინდის ბავშვთა სახლში
● სახალხო დამცველი: ნინოწმინდის პანსიონზე გამოძიება გაუპატიურების მუხლითაც მიმდინარეობს
● “გააღე პანსიონის კარი!” – მთავრობის ადმინისტრაციასთან აქტივისტებმა აქცია გამართეს

_________________________________

პროკურატურასთან ნინოწმინდის პანსიონის გარშემო განვითარებული მოვლენების გამო აქტივისტებმა მიიტანეს ბანერები, რომლებზეც ეწერა: “გააღეთ პანსიონის კარი”, “დასაჯეთ მოძალადეები”, “დავასრულოთ ბავშვების ტყვეობა”, ანაფორა არ გათავისუფლების პასუხისმგებლობისგან” და სხვა. 

დაპირისპირება მას შემდეგ გამწვავდა, რაც ელენე ხოშტარიამ პროკურორთან შესვლა და მისთვის კითხვის დასმა გადაწყვიტა. თუმცა პოლიციამ შენობაში შესვლის უფლება არ მისცა. ადგილზე დაპირისპირება მოხდა, რა დროსაც “სირცხვილიას” აქტივისტი გიგა მაქარაშვილი დააკავეს.  

რას ჰყვება პანსიონის ყოფილი აღსაზრდელი

ნინოწმინდის ბავშვთა პანსიონის ყოფილი აღსაზრდელი ტელეკომპანია “ფორმულასთან” საუბარში ამბობს, რომ დაახლოებით 10 წლის წინ, პანსიონში ერთ-ერთ აღმზრდელს ცემის დროს 7 წლის ბიჭი შემოაკვდა. იყო დამცირების და შეურაცხყოფის მრავალი შემთხვევა.

მისივე თქმით, მომხდარის შემდეგ გარდაცვლილი ისე წაიყვანეს, პოლიცია ადგილზე არ მისულა. მან პანსიონში 15 წელი გაატარა და ამბობს, რომ აღმზრდელები იქ “ჯოჯოხეთს ატრიალებდნენ”. 

“ეზოში ვიყავით ჩასულები და ამ დროს ერთი ბავშვი გაიქცა გოგოებისკენ, ბიჭი, იქნებოდა 6-7 წლის დაახლოებით. ამ აღმზრდელმა ჯერ სულ თმებით ათრია და გამოიყვანა გოგოებისგან, მერე იმ დონემდე მიიყვანა ბავშვი, იმ დონემდე სცემა, თვითონაც ვერ მიხვდა ალბათ, როგორ შემოაკვდა ხელში. ეს ფაქტიც კი გაუხსნელია. შემოვიდა იქ ერთი მანქანა, პოლიცია არ იყო, ამ ბავშვს გადააფარეს რაღაც პლიონკა და წაიყვანეს”, – ამბობს პანსიონის ყოფილი ბენეფიციარი.

მისივე განმარტებით, იყო ძალიან მძიმე ფაქტები მასთან და სხვებთან მიმართებით:

“იყო ბულინგი, ცემა რეიკებით, სახაზავებით, რაც ხელში მოყვებოდათ. [გვცემდნენ] აღმზრდელები, რომლებსაც ვითომ კაბა ეცვათ და ღმერთი სწამდათ სინამდვილეში კი იქ ჯოჯოხეთი ჰქონდათ დატრიალებული. ლოგინის რეიკებით, ხის სახაზავებით, თუ არ დავიძინებდით შუადღეზე რეიტუზებით აგვიკრავდნენ თვალებს და გვაძინებდნენ, თუ არ დავიძინებდით და მასწავლებლებს არ დავემორჩილებოდით, მათ თავს არ დავუხრიდით, გვათენებინებდნენ პურის მარცვლებზე და ბრინჯზე 24 საათით მუხლებით, კუთხეში.”

მისივე თქმთ, გაქცევა არაერთხელ სცადა, თუმცა უშედეგოდ. 

“90-ჯერ მაინც ვცადე გაქცევა. 40-მდე ბავშვი ვაპირებდით იქ ბუნტის ატეხვას და გაპარვას, მაგრამ 40-დან დავრჩით ორნი. სიკვდილის ეშინოდათ, არ უნდოდათ, რომ იმ ბიჭის შემდეგი ის ყოფილიყო”, – ამბობს ის.

გამოხმაურება

ფაქტობრივად არ დარჩენილა არასამთავრობო ორგანიზაცია და პოლიტიკური ჯგუფი, რომელიც ნინოწმინდის პანსიონის ამბებს არ გამოეხმაურა.

სამოქალაქო სექტორი ხელისუფლებას სთხოვს სასწრაფოდ მიიღონ ზომები და უზრუნველყონ პანსიონში სახალხო დამცველის მონიტორინგის ჯგუფის შესვლა. ხოლო ყველაზე დიდმა ოპოზიციურმა პარტიამ, “ერთიანმა ნაციონალურმა მოძრაობამ” პირდაპირ მოუწოდა ხელისუფლებას, სასწრაფოდ მიიღონ ადეკვატური ზომები.

“ეს არის წარმოუდგენლად მძიმე ვითარება, როდესაც სახელმწიფომ არაფერი არ გააკეთა იმისთვის, რომ ადეკვატური ზომები მიეღო და დაეცვა ბავშვები, რომლებიც წარმოდგენილი გვაქვს ყველას, რა მძიმე ვითარებაში არიან”, – ამბობს ხატია დეკანოიძე.

პარტიამ “ლელო საქართველოსთვის” ნინოწმინდის ბავშვთა პანსიონში განვითარებულ მოვლენებზე ხელისუფლების უმოქმედობას დანაშაულებრივი უწოდა.

“დანაშაულებრივია ხელისუფლების უმოქმედობა ამ თემაზე გაურკვეველი და ბუნდოვანი ელექტორალური ზიანის შიშით. პრობლემა მწვავეა და მისი სასწრაფოდ მოგვარება ყველას ინტერესია, რადგან ბავშვების უფლებები ირღვევა და ილახება, როგორც სახელმწიფოს ისე ეკლესიის იმიჯი“, – წერია მათ განცხადებაში.

პარლამენტის ვიცე-სპიკერის, არჩილ თალაკვაძის თქმით, საპატრიარქოს არაფერი აქვს დასამალი.

“მე დიდი იმედი მაქვს, რომ საპატრიარქოსთან კომუნიკაციით ამ საკითხის შეთანხმება მოხდება, ადამიანის უფლებათა კომიტეტი ჩაერთო ამ საკითხში და პარლამენტი ხელს შეუწყობს ყველანაირად ამ საერთო ჭეშმარიტებაზე, რასაც კანონი ითვალისწინებს, შეთანხმება მოხდეს. მჯერა და დარწმუნებული ვარ, საპატრიარქოს არაფერი აქვს დასამალი, მით უმეტეს მაშინ, როცა საკითხი ეხება ბავშვებს”, – თქვა თალაკვაძემ.

ხოლო “ქართული ოცნების” კიდევ ერთმა წევრმა, ალუდა ღუდუშაურმა ნინოწმინდის პანსიონზე საუბრისას სახალხო დამცველი გააკრიტიკა:

“მძიმე სავარაუდო დანაშაულებზეა საუბარი, როგორიცაა გაუპატიურება და ა.შ. თუ ასეთი ინფორმაცია ჰქონდა სახალხო დამცველს მთელი ამ ხნის განმავლობაში, რას ელოდებოდა?! ამაზე განგაში იყო ასატეხი არა ახლა, არამედ თავის დროზე, მაგრამ, რა თქმა უნდა, ეს იმას არ გამორიცხავს, რომ დღეს აქტიური ქმედება არ განახორციელო.”

დღესვე ცნობილი გახდა, რომ შსს-მ ნინოწმინდის პანსიონზე კიდევ ერთი გამოძიება დაიწყო.

როგორც შსს-ს განცხადებაშია ნათქვამი, გამოძიება სისხლის სამართლის კოდექსის 126-ე, ძალადობის მუხლით მიმდინარეობს: 

“მაღალი საზოგადოებრივი ინტერესიდან გამომდინარე გვსურს საზოგადოებას ვაცნობოთ, რომ სხვადასხვა მედია საშუალებებში გავრცელებული ინფორმაციის საფუძველზე, წმინდა ნინოს სახელობის ობოლ, უპატრონო და მზრუნველობა მოკლებულ ბავშვთა პანსიონატში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო საქართველოს სისხლის სამართლის კოდექსის 126-ე მუხლის პირველი პრიმა ნაწილით.”

________________________________ 

● დასავლეთი თუ რუსეთი? საით მიჰყავს ქვეყანა ქართულ ეკლესიას
● კორონავირუსი და ბოლო ჟამის ეკლესია. საუბარი გია ნოდიასთან და ბექა მინდიაშვილთან

____________________________________

ქალაქ ნინოწმინდაში მდებარე პანსიონი ობოლი ბავშვებისთვის ერთ-ერთია იმ დაწესებულებებს შორის, რომელიც ადამიანის უფლებათა დამცველებში ეჭვებს იწვევს. 

საპატრიარქოს კუთვნილმა პანსიონმა კარი ოფიციალურად მიუხურა არა მხოლოდ საქართველოს სახალხო დამცველის აპარატის ექსპერტებს, არამედ სოციალურ მუშაკებსაც.

სახალხო დამცველის აპარატის წარმომადგენლების განცხადებით, მათ პანსიონში მონიტორინგის ჩატარებაზე უარი მიიღეს. მიზეზი მაღალი რანგის სასულიერო პირის – სხალთის მთავარეპისკოპოსის, მეუფე სპირიდონის ბრძანება იყო, რომელიც იმავდროულად ამავე პანსიონის რექტორია.

თვით მეუფემ, რომელმაც ვიდეომიმართვა ჩაწერა, თავისი უარი შემდეგნაირად განმარტა:

”ეს ის ხალხია, ვინც ოფიციალურად ითხოვს ერთსქესიანთა ქორწინების დაკანონებას. ჩემი პირადი მოსაზრებაა, რომ ასეთი ადამიანები არ უნდა შეუშვან ბავშვთა სახლში, ან საერთოდ არც ერთ ოჯახში.”

რამდენიმე დღის წინ ცნობილი გახდა, რომ ნინოწმინდის პანსიონში შეუშვეს პრორუსული მედია “ალტინფო”, “ობიექტივი” და კიდევ რამდენიმე ორგანიზაცია. ასევე, პანსიონში არასრულწლოვანზე სექსუალურ ძალადობაში ბრალდებულმა ეპისკოპოსმა, სერაფიმე ჯოჯუამ აღავლინა წირვა.

სერაფიმე ჯოჯუას 2017 წელს ერთ-ერთი ოჯახი გოგოზე სექსუალური შინაარსის ძალადობაში ადანაშაულებდა.