საქართველოში მიმდინარე პროევროპულ აქციებზე 147 რეპორტიორი დაშავდა. 17 ჟურნალისტი კი "გზის გადაკეტვისთვის" დააჯარიმეს - CMIS
დაშავებული და დაჯარიმებული ჟურნალისტები
2024 წლის 28 ნოემბრიდან, საქართველოში პროევროპული აქციების დაწყებიდან დღემდე, ჟურნალისტებზე ძალადობის, მუშაობაში ხელშეშლის, მათთვის ტექნიკის ჩამორთმევის ან დაზიანების ასზე მეტი შემთხვევა დაფიქსირდა და ჯამში, 147 რეპორტიორი დაშავდა.
ამ მონაცემებს ორგანიზაცია “მედიის, ინფორმაციისა და სოციალური კვლევების ცენტრი” (CMIS) აქვეყნებს. ეს ორგანიზაცია მედიის წარმომადგენლების მიმართ ჩადენილ ინციდენტებს იკვლევს და აღწერს.
- ოცნების პარლამენტში მედიის შემზღუდველი ცვლილებები დაინიციირდა, რომლითაც მაუწყებლებს უცხოური დაფინანსების მიღება ეკრძალება
- Amnesty International-ის წარმომადგენელი: დრაკონული კანონების ამ მასშტაბით მიმღები პარლამენტი არ მახსენდება
ორგანიზაციის მონაცემებით, 2024 წლის 28 ნოემბრიდან დღემდე, პროევროპულ აქციებზე ან/და აქციებთან დაკავშირებულ შემთხვევებში მედიის წარმომადგენლების უფლებების დარღვევის 124 ინციდენტი დაფიქსირდა, რა დროსაც ჯამში 147 ჟურნალისტი, ფოტოგრაფი და ოპერატორი გახდა რეპრესიების სამიზნე. აქედან, 24 რეპორტიორი ერთზე მეტჯერ დაშავდა და დაუზიანდა ტექნიკა, ან/და დაშავდა ფიზიკურად, დაჯარიმდა ან საქმე აღიძრა მათ წინააღმდეგ. ფინანსური ჯარიმა, 5000 ლარის ოდენობით, სავალი გზის გადაკეტვის საფუძვლით, პოლიციამ 17 ჟურნალისტს გამოუწერა.
21 მარტს, ქართული ჟურნალისტიკის დღეს, ორგანიზაციამ მოკლე ანგარიში გამოაქვეყნა და ბოლო სამ თვეში მომხდარი ყველა ინციდენტი აღწერა. ამ ინციდენტებს შორისაა JAMnews-ის რეპორტიორის, იულია კალაბანის შემთხვევაც.
2024 წლის 29 ნოემბერს იულია პოლიციელის მხრიდან ფიზიკური ძალადობის სამიზნე გახდა. იმ მომენტში JAMnews-ის რეპორტიორი ცდილობდა გადაეღო კადრი, როგორ იღებდა სპეცრაზმი რუსთაველის გამზირზე მოწყობილი ბარიკადებს; მას სამართალდამცველმა ხელი ჰკრა და ფეხში დაარტყა. ის არაერთხელ დაშავდა ცრემლმდენი გაზითაც.
ანგარიშში ნათქვამია, რომ “თბილისსა და საქართველოს სხვა ქალაქებში მიმდინარე საპროტესტო აქციების გაშუქებისას, ტენდენციის სახე მიიღო ჟურნალისტების, ოპერატორებისა და ფოტოგრაფების მუშაობაში ხელშეშლის, სიტყვიერი და ფიზიკური შეურაცხყოფის, ტექნიკის დაზიანების ან ჩამორთმევის შემთხვევებმა“.
ასევე, ხაზგასმულია, რომ ბოლო პერიოდში ასევე ტენდენციად იქცა საპროტესტო აქციის გაშუქებისას მედიის წარმომადგენლების დაჯარიმება გზის გადაკეტვის საფუძვლით.
უწყვეტი, მასშტაბური, პროევროპული აქციები საქართველოს დედქალაქ თბილისსა და რეგიონებში 2024 წლის 28 ნოემბრიდან დაიწყო. იმ დღეს ქვეყნის პრემიერმა განაცხადა, რომ 2028 წლამდე საქართველო აჩერებს ევროკავშირთან მოლაპარალებებს გაწევრების შესახებ. ამ განცხადებას მოჰყვა პროტესტი ქუჩაში, დაუმორჩილებლობის კერები სხვადასხვა უწყებაში, პერიოდული გაფიცვები და წინააღმდეგობა რიგ საჯარო უწყებებში.
აქციის პირველ დღეებში, პოლიცია სასტიკად არბევდა ქუჩაში გამოსულ დემონსტრანტებს. ჯამში, ადმინისტრაციული წესით 500-მდე ადამიანი დააკავეს, 50 ადამიანს კი სისხლის სამართლის დანაშაულის ჩადენას ედავებიან. დაკავებულთა შორისაა ჟურნალისტი ქალი, გამოცემა “ბათუმელებისა” და “ნეტგაზეთის” რედაქტორი მზია ამაღლობელი.
ამ მოვლენების პარალელურად, “ქართული ოცნების” ხელისუფლება სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. გაათმაგდა ჯარიმები სხვადასხვა, აქციებთან დაკავშირებულ სამართალდარღვევაზე, დაინიცირდა მედის შემზღუდავი კანონები, დააყადაღეს ის ფონდები, რომლებიც დემონსტრანტებს ჯარიმების გადახდაში ეხმარებოდნენ.
დაშავებული და დაჯარიმებული ჟურნალისტები
