"ჩვეულებრივი ხალხი". როგორ უპირისპირდება აფხაზეთი რუსეთიდან და ცენტრალური აზიიდან ნარკოტრეფიკს
ნარკორეალიზატორები რუსეთიდან აფხაზეთში
აფხაზეთში ნარკოტიკების გავრცელების ბრალდებით 130 ადამიანია დაკავებული. მათი უმეტესობა რუსეთისა და ცენტრალური აზიის მოქალაქეები არიან, რომლებმაც აფხაზეთში მძიმე სინთეზური ნარკოტიკები – მეტადონი და მეფედრონი შემოიტანეს.
აფხაზეთში ნარკოტიკებით ვაჭრობა ისჯება 10-დან 15 წლამდე თავისუფლების აღკვეთით.
7,5 წელი „მთარგმნელობითი საქმიანობისთვის“
18 წლის აზბეკი წარმოშობით ტაჯიკეთიდანაა. ახალგაზრდა მამაკაცი რუსეთში მუშად მუშაობდა, როცა მეგობარმა შესთავაზა, აფხაზეთში წასულიყო. თუმცა ის უთქვამს, რომ აფხაზეთი არ იყო რუსეთის ფედერაციის შემადგენლობაში:
“როდესაც ჩვენ გავიარეთ პასპორტის კონტროლი, მათ ბეჭედი არ ჩაგვირტყეს [ჩვენს პასპორტზე]. მივხვდი, რომ გაგრაში, სხვა ქვეყანაში ვიყავით, როცა დავინახე მანქანა სხვა სანომრე ნიშნებით და არა რუსულით ყველაფერი ცხადი გახდა“.
აზბეკმა იცოდა, რომ მისი მეგობარი ნარკოტიკებს ყიდდა. თვითონ ასრულებდა მისთვის მთარგმნელის მოვალეობას, რადგან მის მეგობარს საერთოდ არ ესმოდა რუსული.
აფხაზეთის სასამართლომ აზბეკის “მთარგმნელობითი საქმიანობა“ 7,5 წლით თავისუფლების აღკვეთით “შეაფასა“.
“ახლა უნდა მოგკლათ” – აფხაზეთში რუსი ტურისტი აწამეს
ანზორ თარბა დაკავებისას გარდაიცვალა. პოლიციელი, რომელსაც მის სიკვდილში ადანაშაულებენ, დააწინაურეს
აფხაზეთში პანდემიის დროს ნარკოტიკებთან ბრძოლის თავისებურებები
● 2022 წელს აფხაზეთში დააკავეს 37 ნარკოდისტრიბუტორი.
● 2023 წელს ნარკოტიკების კონტროლის დეპარტამენტის (UKON) თანამშრომლებმა მოახერხეს 47 ადამიანის დაჭერა და ორნახევარი კილოგრამი ნარტკოტიკის ამოღება.
აფხაზეთის შინაგან საქმეთა მინისტრი რობერტ კიუტი ამბობს, რომ ეს შესაძლებელი გახდა ახალგაზრდა, მაგრამ პროფესიონალი და მოტივირებული ოპერატიული მუშაკების მუშაობის წყალობით.
“ის, რომ ჩვენ დავიწყეთ მეტი კრიმინალის დაკავება, არ ნიშნავს იმას, რომ ადრე ისინი ნაკლები იყვნენ. თანამშრომლები უბრალოდ უკეთ მუშაობენ“, – ამბობს კიუტი.
”მე ვსწავლობდი ვოკალს” – ქალის კამერა
მიუხედავად იმისა, რომ ნარკოტრეფიკისთვის მსჯავრდებულთა უმეტესობა ახალგაზრდა მამაკაცია, ბოლო დროს სულ უფრო და უფრო მეტი ქალი დაიჭირეს ამ საქმიანობისთვის. რადგან აფხაზეთში ქალთა ციხე არ არსებობს, სასამართლო პროცესის შემდეგ ისინი შსს-ს შენობაში, დროებითი მოთავსების იზოლატორში გადაჰყავთ.
აქ თითო საკანში 5-10 ადამიანია. პირველი, რაც ყურადღებას იპყრობს, არის დიდი პლაზმური ტელევიზორი. ზოგადად, რომ არა ფანჯრებზე გისოსები და იაფფასიანი ფარდებით დაფარული სათავსოები, იფიქრებთ, რომ რომელიმე ძველ სანატორიუმში ხართ.
22 წლის ელენა სინელნიკოვა გვაჩვენებს თავის სერთიფიკატებს და ჯილდოებს სიმღერის კონკურსებში მონაწილეობისთვის. ის უნივერსიტეტში ვოკალს სწავლობდა. მაგრამ შემდეგ გაიცნო ბიჭი, რომლის გამოც ვალებში “გადავარდა”
“პანდემიის დროს ჩვენ პრაქტიკულად ერთ ბინაში ვიყავით გამოკეტილი. გასვლისთანავე დავშორდი მას, მაგრამ ვალები დარჩა“.
ელენა მუშაობდა მიმტანად და ოჯახის დამხმარედ, მაგრამ ხელფასი საკმარისი არ იყო. ამაზე მეგობართან თქვა, რომელმაც აფხაზეთში წამლის გადატანა შესთავაზა.
ელენა ამტკიცებს, რომ არ იცოდა, რომ ნარკოტიკები მიჰქონდა, მაგრამ თავს დამნაშავედ თვლის:
“დამნაშავე ვარ, პირველ რიგში, ჩემი მშობლების წინაშე”, – ამბობს გოგონა.
ციხეში ელენა ბევრ რელიგიურ ლიტერატურას კითხულობს და დიდ დროს ატარებს ლოცვაში. 27 წლის ასაკში გაათავისუფლებენ და ცხოვრებას ნულიდან დაიწყებს.
44 წლის ნატალია ფილიპოვას განსაკუთრებით დიდი რაოდენობით მეტადონის გადატანისთვის 16,5 წელი მიუსაჯეს. ის და მისი მეუღლე აფხაზეთში მშობლებთან მიდიოდნენ, როცა საზღვარზე მათ მანქანაში 49 გრამი ნივთიერება აღმოაჩინეს.
ნატალია ხალისით ესაუბრება ჟურნალისტებს და ისევე როგორც ელენა ამბობს, რომ წარმოდგენა არ ჰქონდა მანქანაში ნარკოტიკების შესახებ. მიუხედავად იმისა, რომ მან იცოდა ქმრის ნარკომანობის შესახებ:
„მოსკოვში ვცხოვრობდით. ქმარი ომის ვეტერანი იყო დაზიანებული თირკმელებით და გადანერგვას ელოდა. მან თქვა, რომ ტკივილის შესამსუბუქებლად სჭირდებოდა აბები და სიროფები“.
ნატალია იხსენებს, რომ მისმა ქმარმა დაარწმუნა სამართალდამცავები, რომ მას არაფერი ჰქონდა საერთო აღმოჩენილ მეტადონთან, მაგრამ მათ არ დაუჯერეს. ორივე დააკავეს. კაცი სასამართლო პროცესამდე გარდაიცვალა.
სად წავიყვანოთ პატიმრები, რომლებსაც წასასვლელი არსად აქვთ?
აფხაზეთის შინაგან საქმეთა მინისტრი რობერტ კიუტი ამბობს, რომ ოპერმუშაკებმა დაიწყეს უფრო მსხვილ მომწოდებლებთან დაკავშირება, რისი წყალობითაც მხოლოდ 2024 წლის იანვარში შეძლეს 500 გრამი მეტადონის ამოღება.
ერთ-ერთი მათგანი რუსეთის თავდაცვის სამინისტროს მოქმედი თანამშრომელი აღმოჩნდა, რომელიც უკრაინაში იბრძოდა.
UKON-ის ხელმძღვანელი ასტამურ ფაჩალია ამბობს, რომ აფხაზეთში ნარკოტრეფიკისთვის მსჯავრდებული ბევრი რუსი ითხოვს კონტრაქტის გაფორმებისა და უკრაინაში ე.წ. “სპეციალურ სამხედრო ოპერაციაში“ მონაწილეობის უფლებას. მაგრამ ამის მექანიზმი სოხუმში ჯერ არ არსებობს.
ამავე დროს, აფხაზეთის ციხეები გადატვირთულია და არ არის საკმარისი ადგილი ნარკორეალიზატორების მოსათავსებლად. აქედან გამომდინარე, ამჟამად მიმდინარეობს მოლაპარაკებები რუსეთსა და ტაჯიკეთთან, რათა თავიანთი მოქალაქეები სასჯელის მოსახდელად სამშობლოში გადაიყვანონ.
- საქართველოში მარიხუანის მოწევა შეიძლება? რა წერია ახალ კანონში?
- ნარკოდამოკიდებულება აზერბაიჯანში – “თითქოს ეს ჩვენ არ გვეხება”
“მეფედრონების თაობა”
ნარკოლოგიური კლინიკის მთავარი ექიმის, ირმა ანუას განცხადებით, 2023 წელს მათთან დარეგისტრირდა 764 ადამიანი – ორჯერ მეტი, ვიდრე 2022 წელს.
შინაგან საქმეთა სამინისტროს თანამშრომლებმა დისპანსერში სამჯერ მეტი ადამიანი მიიყვანეს: 2023 წელს 6027 ადამიანი.
ირმა ანუა წუხს, რომ სულ უფრო მეტი ახალგაზრდა ხდება დამოკიდებული მეფედრონზე, მძიმე სინთეზურ ნარკოტიკზე:
“მეფედრონი იწვევს სეროტონინის გამოყოფას და აუმჯობესებს განწყობას, მაგრამ ეს ეფექტი სწრაფად მთავრდება – რჩება შფოთვისა და გაღიზიანების შეგრძნება.”
ექიმები და შსს-ს თანამშრომლები ამბობენ, რომ ახალგაზრდა გოგონები და 40 წელს გადაცილებული ადამიანები სულ უფრო ხშირად ხდებიან მძიმე ნარკოტიკებზე დამოკიდებული.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
