ბიძინა ივანიშვილი: Credit Suisse-თან სამართლებრივ დავაში ჩემზე პოლიტიკურ ზეწოლას ახდენდნენ

ბიძინა ივანიშვილი Credit Suisse-თან სამართლებრივ დავაზე

ბიძინა ივანიშვილის წარმომადგენლები საერთაშორისო პრესაში ვრცელ წერილს აქვეყნებენ, რომელშიც ვკითხულობთ, რომ ივანიშვილი ადასტურებს პოლიტიკურ ზეწოლას Credit Suisse-თან სამართლებრივ დავაში. ქვეყნის არაფორმალური მმართველის თქმით, ბანკი ქმნიდა მოლაპარაკებების ილუზიას და სინამდვილეში მათი წარმომადგენლები მასზე პოლიტიკურ ზეწოლას განაგრძობდნენ.

“მათ, ვინც ამ ამბავს მიჰყვებიან, ახსოვთ, რომ Credit Suisse-თან მიმდინარე დავა გასცდა სამართლებრივ ფარგლებს და პოლიტიკური გახდა 2022 წლის თებერვალში უკრაინაში სამხედრო კონფლიქტის დაწყების შემდეგ. რამდენიმე კვირაში ივანიშვილს შეეზღუდა თანხასთან წვდომა და პრობლემები შეექმნა ხელოვნების ნიმუშებისა და თვითმფრინავის მიღებასთან დაკავშირებით. მიუხედავად იმისა, რომ ზოგიერთი საკითხი დიდი ძალისხმევით მოგვარდა იურიდიული საშუალებებით, თანხასთან წვდომის ძირითადი პრობლემა კვლავ გრძელდება და მიგვაჩნია, რომ ეს არის არაფორმალური სანქციები.” – ვკითხულობთ წერილში.

ივანიშვილის განმარტებით, ეს თანხები არ არის დაკავშირებული შვეიცარიაში, ბერმუდისა და სინგაპურში მიმდინარე სამართლებრივ დავებთან, მაგრამ ეხება იმ თანხებს, რომლებიც გადარჩა Credit Suisse-ის არასწორი მენეჯმენტისა და თაღლითობის დროს. როგორც წერილშია აღნიშნული, ამ თანხების უმეტესი ნაწილი გადაირიცხა სხვა შვეიცარიულ ბანკში, მაგრამ დაახლოებით 5% დარჩა Credit Suisse-ში მიმდინარე დავების სიცოცხლისუნარიანობის უზრუნველყოფის ოფიციალური მოთხოვნის გამო.

ამასთან, ივანიშვილის ადვოკატების მიერ გავრცელებულ წერილში ვკითხულობთ, რომ Credit Suisse-ის ტრასტები იყენებენ ევროპარლამენტის მიერ მიღებულ ორ რეზოლუციას, რომლითაც დეპუტატები აღმასრულებელ ორგანოებს ივანიშვილის სანქცირების რეკომენდაციას უწევდნენ:

“2022 წლის 14 დეკემბერს ევროპარლამენტმა კენჭი უყარა რეზოლუციას ივანიშვილის წინააღმდეგ სანქციების დაწესების რეკომენდაციით, მაგრამ ეს არ იქნა მიღებული ევროკავშირის აღმასრულებელი ორგანოების მიერ. ამ ფონზე, Credit Suisse-მა ბოლო გადარიცხვები განახორციელა კლიენტზე და ახლა აღნიშნავენ, რომ ამან ხელი შეუშალა Guernsey-ის ტრასტთან დაკავშირებული საკითხების მოგვარებას. ამ მოთხოვნას აძლიერებს ის ფაქტი, რომ აქტივები გადაეცა Credit Suisse-ს და ბანკი და მისი დანიშნული რწმუნებული დაინტერესებული არ უნდა ყოფილიყვნენ, არ შეესრულებინათ კლიენტის მოთხოვნები. შედეგად, ივანიშვილი ამ ობსტრუქციულ ქმედებას განიხილავს როგორც “პოლიტიკურ ზეწოლას” – მარტში მიღებული გადაწყვეტილების მსგავსს, როდესაც Credit Suisse-მა განაცხადა, რომ თანხების გაცემის შეფერხება გამოწვეული იყო “აღმოსავლეთ ევროპაში გეოპოლიტიკური სიტუაციით”.

● ყველა ამბობს, რომ საქართველოში არაფორმალური მმართველობაა. რაში გამოიხატება ის? მაგალითები
● “ხალხის ძალა”: გამოდის, ენმ-ს რეჟიმის მართვის მოდელი შვეიცარიაშიც დაუმკვიდრებიათ
● ივანიშვილის წერილი: კელი დეგნანთან შეხვედრაზე, ომში ჩართვაზე და მმართველ გუნდზე

14 დეკემბერს მიღებული რეზოლუციით, ევროპარლამენტი მოუწოდებს ევროპულ საბჭოსა და დემოკრატიულ პარტნიორებს, რომ დაუწესონ სანქციები ბიძინა ივანიშვილს, როგორც საქართველოში დემოკრატიული პროცესების გაუარესებაზე პასუხისმგებელ პირს.

2 აგვისტოს ცნობილი გახდა, რომ ბიძინა ივანიშვილის უფლებადამცველი ფირმა MKD-ის იურისტები ივანიშვილის საქმესთან დაკავშირებით, აპირებენ მიმართონ შვეიცარიის კონფედერაციის პარლამენტს, საპარლამენტო ფრაქციებსა და მსხვილ პოლიტიკურ ჯგუფებს, ასევე ფინმა-ს – შვეიცარიის საფინანსო საზედამხედველო ორგანოს.

იურისტების განმარტებით, მიმართვის საჭიროება გამოწვეულია როგორც Credit Suisse-თან დავისადმი მაღალი საზოგადოებრივი ინტერესით, აგრეთვე, იმ “ურთულესი მდგომარეობით”, რომელშიც საბანკო ჯგუფი აღმოჩნდა. 

საქართველოს ყველაზე მდიდარი ადამიანი ბიძინა ივანიშვილი შვეიცარიულ ბანკ Credit Suisse-ს უკვე მეორედ უჩივის და ამჯერად პოლიტიკურ ზეწოლაშიც ადანაშაულებს.

ამ ფაქტის გამო, ივანიშვილის მხარდამჭერი განცხადებებით გამოვიდნენ მმართველი პარტიის გულშემატკივრები. შვეიცარიული ბანკის უკან ისინი ამერიკის შეერთებული შტატების ინტერესებს ხედავენ და ამბობენ, რომ მათ ივანიშვილის პოლიტიკაში შემობრუნება და ომში ჩათრევა უნდათ.

ოპოზიციაში აცხადებენ, რომ შვეიცარიული ბანკის გარშემო ატეხილმა სკანდალმა და “ქართული ოცნების” ხელმძღვანელობის მიერ გაკეთებულმა განცხადებებმა “ქართული ოცნების” ანტიამერიკული განწყობები კიდევ ერთხელ დადასტურდა.

ბიძინა ივანიშვილმა ვრცელი წერილიც გამოაქვეყნა, სადაც ის ადასტურებს, რომ საქართველოში ამერიკის შეერთებული შტატების ელჩს, კელი დეგნანს ნამდვილად შეხვდა. როგორც ივანიშვილი განმარტავს, შეხვედრა ელჩის თხოვნით, 21 მარტს შედგა და ის „დაახლოებით სამ საათს გაგრძელდა“.

წერილში, რომელიც ბიძინა ივანიშვილმა გამოაქვეყნა, საუბარია ასევე იმაზე, რომ არსებობენ გარკვეული ძალები, რომელიც საქართველოს ომში ჩართვას ცდილობენ.

წერილში ივანიშვილი პირდაპირ მიანიშნებს, რომ შვეიცარიულმა ბანკმა მას პრობლემები იმის გამო შეუქმნა, რომ საქართველო არ ჩაერთო ომში. აქვე ივანიშვილი მიანიშნებს, რომ შვეიცარიული ბანკის მიერ გაჩერებული თანხების დახარჯვას საზოგადოების საჭიროებისთვის გეგმავდა.