აზერბაიჯანელი სტუდენტი უნივერსიტეტიდან დროშის შებღალვის გამო გარიცხეს

მორიგი სკანდალი აზერბაიჯანში: ბაქოს სახელმწიფო უნივერსიტეტის პირველი კურსის სტუდენტი უმაღლესი სასწავლებლიდან ონლაინლექციის დროს, ქვეყნის დროშის შეურაცხყოფის გამო გარიცხეს. თავად სტუდენტი ბრალდებას უარყოფს, სოციალური ქსელების მომხმარებლების აზრი კი ორ ნაწილად გაიყო.

რა მოხდა? 

სოციალური ქსელების აზერბაიჯანულ სეგმენტში გავრცელდა ბაქოს უნივერსიტეტის ონლაინლექციის ვიდეო. გაკვეთილის დროს, ერთ-ერთმა სტუდენტმა თავზე აზერბაიჯანის სახელმწიფო დროშა მოიხვია და მასზე ზემოდან სათვალე გაიკეთა.

ამის შემდეგ, მაშინვე ცნობილი გახდა, რომ სტუდენტი გარიცხეს უნივერსიტეტიდან არასათანადო ქცევისა და სახელმწიფო სიმბოლოს შებღალვის გამო.

ბაქოს სახელმწიფო უნივერსიტეტის ხელმძღვანელობამ უმაღლესი სასწავლებლის Facebook-ის ოფიციალურ გვერდზე, ამ ინციდენტთან დაკავშირებით განცხადება განათავსა. 

„მექანიკურ-მათემატიკური ფაკულტეტის პირველი კურსის სტუდენტმა, ფარვიზ მაგომედოვმა გაკვეთილების დროს, რამდენჯერმე დაარღვია შიდა დისციპლინის წესები. ამის შესახებ ინფორმაცია მიეწოდა თავად სტუდენტსაც და მის მშობლებსაც. მაგრამ 2020 წლის 23 ნოემბერს, მან კიდევ ერთხელ დაარღვია უხეშად უნივერსიტეტის შიდა დისციპლინის წესები, ამავდროულად, მან აზერბაიჯანის სახელმწიფო დროშა შებღალა, ბრძოლის ველზე დაცემულთა სისხლში გაჟღენთილი, რომელიც ამაყად ფრიალებს ქვეყნის გათავისუფლებულ ტერიტორიებზე. აღნიშნავთ, რომ ასეთი ქმედება ითვალისწინებს ასევე აზერბაიჯანის სახელმწიფო დროშის შესახებ კანონით გათვალისწინებულ პასუხისმგებლობას.

23 ნოემბერს, ფარვიზ მაგომედოვი გაირიცხა უნივერსიტეტიდან, ის და მისი მშობლები ბაქოს სახელმწიფო უნივერსიტეტში დავიბარეთ და უმაღლესი სასწავლებლის ხელმძღვანელობის გადაწყვეტილების შესახებ საქმის კურსში ჩავაყენეთ“, – ნათქვამია სასწავლო დაწესებულების განცხადებაში.

სოციალური ქსელების იმ მომხმარებლებმა, რომლებმაც ონლაინლექციის ვიდეო ნახეს, აღნიშნეს, რომ სტუდენტი არაფერ შუაშია, ის გვერდზე გავიდა, ტელეფონის კამერა ჩართული დატოვა, დროშა კი თავზე მისმა ერთ-ერთმა მეგობარმა მოიხვია. „თავად ფარვიზმა მომხდარის შემდეგ ბოდიში მოიხადა პედაგოგთან და ინციდენტი ამოიწურა“, – ამბობენ ვიდეოს მნახველები.

შემთხვევას ფართო რეზონანსი მოჰყვა სოციალურ ქსელებში. საზოგადოება ორ ბანაკად გაიყო – ერთი ნაწილი მხარს უჭერს უმაღლესი სასწავლებლის გადაწყვეტილებას და დაუშვებლად მიაჩნიათ სახელმწიფო სიმბოლოსადმი ასეთი მოპყრობა. მეორე ნაწილი კი სტუდენტის ქცევაში ვერაფერს ხედავს, რაც ქცევის საყოველთაოდ მიღებულ ნორმებს არღვევს.

ექსპერტის მოსაზრება 

განათლების საკითხების ექსპერტის, ქამრან ასადოვის თქმით, საუბარია სახელმწიფო დროშის შესახებ კანონის უხეშ დარღვევაზე.

„გასაგებია, რომ სტუდენტები და მასწავლებლები ახლა არასახარბიელო მდგომარეობაში არიან. ვიღაცებს არ აქვთ ონლაინგაკვეთილებზე წვდომის შესაძლებლობა, ვიღაცებს ხარისხიანი ინტერნეტი არ აქვთ. ამ შემთხვევაში ყველა ისე მოქმედებს, როგორც შეუძლია.

მაგრამ ამ შემთხვევაში დაირღვა არა მხოლოდ კონკრეტული უმაღლესი სასწავლებლის შიდა დისციპლინის წესები, არამედ დაირღვა კანონი აზერბაიჯანის სახელმწიფო სიმბოლოების შესახებ. და ეს მოხდა ყარაბაღში სამამულო ომიდან, რამდენიმე დღის შემდეგ.

ვეკითხები მათ, ვინც სტუდენტის მხარეს დგანან: უნივერსიტეტს რომ ასეთი გადაწყვეტილება არ მიეღო ინციდენტთან დაკავშირებით, რა დამოკიდებულება იქნებოდა ბაქოს სახელმწიფო უნივერსიტეტის ხელმძღვანელობის მიმართ? ყველა დაიწყებდა რექტორის განსჯას და უნივერსიტეტის მთელ ხელმძღვანელობას უმოქმედობაში დაადანაშაულებდნენ იმ სტუდენტის მიმართ, რომელმაც ქვეყნის დროშა შებღალა.

ყოველთვის ვიცავდი და დავიცავ სტუდენტების უფლებებს, მაგრამ ამ შემთხვევაში მთლიანად სახელმწიფო უნივერსიტეტის ხელმძღვანელობის მხარეს ვარ, რომელმაც სწორი გადაწყვეტილება მიიღო.

არის საქმის ეთიკური მხარეც. სტუდენტმა უპატივცემულობა გამოავლინა ასაკოვანი პედაგოგის მიმართ, რაც ასევე განსჯის საგანი შეიძლება გახდეს“, – განაცხადა ქამრან ასადოვმა JAMnews-ის კორესპონდენტთან საუბრისას.

„მაგრამ მინდა აღვნიშნო, რომ გარკვეული დროის შემდეგ, სტუდენტს უფლება აქვს, განცხადებით მიმართოს ბაქოს სახელმწიფო უნივერსიტეტის რექტორს უმაღლესი სასწავლებლის რიგებში დაბრუნებასთან დაკავშირებით. ასეთი პრეცედენტი ჩვენთან არსებობს“, – აღნიშნა ექსპერტმა.

კომენტარები სოციალური ქსელებიდან 

„თუკი რაიმე კანონი დაირღვა, გადაწყვეტილება უნდა მიიღოს სასამართლომ და არა კონკრეტული უნივერსიტეტის ხელმძღვანელობამ. არ შეიძლება, ასე მოექცე 18 წლის ადამიანს“. 

„და რატომ არ სჯიან პედაგოგებს, რომლებიც სტუდენტებისგან ისეთ თემებზე ითხოვენ პასუხების გაცემას, რომელიც არასოდეს გაუვლიათ? იმიტომ, რომ მათ ელემენტარულად ინტერნეტზე წვდომა არ აქვთ“.

„უნივერსიტეტის რექტორს უმაღლესი პირად საკუთრებად მიაჩნია“.