ბაიდენი აშშ-ის პრეზიდენტი ხდება. რატომ არის ტრამპი კვლავინდებურად ასეთი პოპულარული?

ჯო ბაიდენმა ფაქტობრივად გაიმარჯვა, ალბათ, აშშ-ის ყველაზე რთულ საპრეზიდენტო არჩევნებში. გამარჯვება ჯერჯერობით ოფიციალურად არ გამოუცხადებიათ, ჯერ კიდევ რჩება ხმათა მცირე პროცენტი, რომელიც უნდა დაითვალონ.

რატომ აღმოჩნდა ბაიდენის ტრამპზე გამარჯვება ასეთი რთული, მიუხედავად მოქმედი პრეზიდენტის ნაკლოვანებებისა, რომელსაც მედიასა და ექსპერტულ წრეებში „აღმაშფოთებელს“ უწოდებენ?

საღამოს (სამხრეთ კავკასიის დროით დილის 8 საათზე) ჯო ბაიდენი განცხადებით გამოვიდა და სხვა საკითხებთან ერთად, საკუთარი პრიორიტეტებიც დაასახელა:

• კორონავირუსის პანდემიასთან ბრძოლა 
• ეკონომიკის აღორძინება 
• კლიმატის ცვლილებების წინააღმდეგ ბრძოლა
• და სისტემურ რასიზმთან ბრძოლა 

ბაიდენმა მოქალაქეებს მოთმინებისა და დემოკრატიული სისტემის ნდობისკენ მოუწოდა. „ჩვენ კვლავ ვამტკიცებთ იმას, რაც დავამტკიცეთ 244 წლის წინ ამ ქვეყანაში – დემოკრატია მუშაობს. თქვენი ხმა ჩაითვლება“, – თქვა მან.

მოსალოდნელია, რომ აშშ-ში არჩევნებზე საერთო აქტივობა უკანასკნელი 120 წლის განმავლობაში ყველაზე მაღალი იქნება და 66.9 პროცენტს შეადგენს. ჯო ბაიდენმა და მისმა მომავალმა ვიცე-პრეზიდენტმა, კამალა ჰარისმა, დაახლოებით, 74 მილიონი ხმა მიიღეს. 

არჩევნების დროს აშშ-ში ძირითადი ვითარების შესახებ – და ქვეყნის პერსპექტივების შესახებ ახალი პრეზიდენტისა და მისი დემოკრატიული პარტიის ლიდერობის ქვეშ.

ტყუილი, როგორც პრეზიდენტ ტრამპის საფირმო ნიშანი

ტყუილი თან სდევდა დონალდ ტრამპს მთელი პრეზიდენტობის განმავლობაში. მაგრამ მისი ბოლო გამოსვლა ისეთი აპოთეოზი გახდა, რომ რამდენიმე ამერიკულმა ტელეარხმა მის ტრანსლირებაზე უარი განაცხადა. 

კერძოდ, ერთ-ერთმა წამყვანმა ამერიკულმა ტელეარხმა MNBC-იმ განაცხადა: „ვწყვეტთ დონალდ ტრამპის გამოსვლის ტრანსლირებას, რადგან ის შეიცავს მტკიცებულებებს, რომლებიც ეწინააღმდეგება ფაქტებს“.

ეს ამერიკული ტელევიზიების ისტორიაში არნახული ფაქტია. 

• „მოკეტე, ბოლოს და ბოლოს!“ – ტრამპისა და ბაიდენის პირველი სატელევიზიო დებატები
• აშშ, აჯანყება: რატომ არიან გენერლები და ყოფილი პრეზიდენტები ტრამპის წინააღმდეგ

მაგრამ თავად დონალდ ტრამპსაც, როგორც პოლიტიკურ ფიგურას, არ ჰყავს პრეცედენტები. 

ამერიკულმა მედიამ დაითვალა, რომ პრეზიდენტის პოსტზე ყოფნის განმავლობაში, ტრამპმა 5-ათასჯერ განაცხადა ისეთი რამ, რაც ეწინააღმდეგებოდა ფაქტებს.

მათგან ყველაზე ცნობილები: 

• „კორონავირუსი ჩვეულებრივი გრიპია, რომელიც მალე დასრულდება (პანდემიის შუაში) 
• „ნატო აშშ-ს ძარცვავს“ (იმის შესახებ, რომ ამ ორგანიზაციის ბიუჯეტი უსამართლოდ იქმნება) 
• „ეპიდემია აშშ-ის ეკონომიკას არ შეხებია“ (კიდევ 6 მილიონი ადამიანი აღმოჩნდა ამ დროს სიღარიბის ზღვარს მიღმა) 

კიდევ რაში ადანაშაულებენ დონალდ ტრამპს

სისტემატური ტყუილი – მოქმედი პრეზიდენტის წინააღმდეგ ერთადერთი პრეტენზია არ არის. 

მის დროს და მისი პირდაპირი წაქეზებით გამწვავდა წინააღმდეგობები ამერიკულ საზოგადოებაში. პირველ რიგში – რასობრივი. 

რამდენჯერმე გაიზარდა ძალადობის შემთხვევები არათეთრკანიანი ადამიანების, ლგბტ პირებისა და რელიგიური უმცირესობების წარმომადგენლების მიმართ.  

დონალდ ტრამპს ასევე ადანაშაულებენ იმაში, რომ ის ძალიან ტოლერანტულია დიქტატორული რეჟიმების მიმართ მთელ მსოფლიოში. პირველ რიგში მაგალითად მოჰყავთ მისი სიმპათიები ისეთი ლიდერების მიმართ, როგორებიც არიან რუსეთისა და თურქეთის პრეზიდენტები, პუტინი და ერდოღანი.

ამას გარდა, ტრამპი ატარებდა იზოლაციონისტურ საგარეო პოლიტიკას – მას არ მიაჩნდა, რომ აშშ-ს ეკისრება პასუხისმგებლობა ქვეყნის გარეთ არსებულ ვითარებაზე. ითვლება, რომ ამან შეასრულა თავისი როლი მსოფლიოში, რამდენიმე შეიარაღებული კონფლიქტის გამწვავებაში, მათ შორის, ახლო აღმოსავლეთსა და სამხრეთ კავკასიაში. 

რატომ მოვიდა დონალდ ტრამპი ხელისუფლებაში და გახდა პოპულარული

ბრიტანული გაზეთის, The Guardian-ის მიმომხილველს, ოუენ ჯონსს მიაჩნია, რომ 2016 წელს, ტრამპისა და რესპუბლიკური პარტიის გამარჯვება შესაძლებელი გახდა უკანასკნელი 50 წლის განმავლობაში, აშშ-ის დემოკრატიული პარტიის წარუმატებელი პოლიტიკის გამო.

წინა მმართველობის მთავარი შეცდომების შესახებ, როდესაც ხელისუფლებაში ბარაკ ობამა და დემოკრატიული პარტია იყო: 

• მათი დაუფიქრებელი ფინანსური მხარდაჭერა, ვინც ამჯობინებს არ იმუშაოს და ისარგებლოს დახმარებებით – გადასახადების კეთილსინდისიერი გადამხდელების ხარჯზე. 
• არასაკმარისი სიმკაცრე ეთნიკური უმცირესობის წარმომადგენელ რადიკალებთან დაპირისპირებაში – იმ იმედით, რომ არათეთრკანიანი მოსახლეობა საპასუხოდ მხარს დაუჭერს დემოკრატიულ პარტიას არჩევნებზე.  
• სამუშაო ადგილების განადგურება აშშ-ში – მსხვილი კორპორაციების მიმართ არსებულმა პოლიტიკამ მათ საშუალება მისცა, დაუსჯელად გაეტანათ წარმოება სხვა ქვეყნებში.  

სწორედ ამ პრობლემების გამო, ჯო ბაიდენის გამარჯვება არ აღმოჩნდა ისეთი შთამბეჭდავი – მისი უპირატესობა დონალდ ტრამპზე, ზოგიერთ შტატში, სულ რაღაც, რამდენიმე ათას ხმას შეადგენს. 

და ბაიდენის თეთრ სახლში გამოჩენის შემდეგ, ეს პრობლემები არსად წავა.