დაღესტანში ჩარჩენილი აზერბაიჯანის მოქალაქეები პროტესტის ნიშნად შიმშილობენ
აზერბაიჯანის 800-ზე მეტი მოქალაქე რუსეთ-აზერბაიჯანის დაკეტილ საზღვართან დაღესტანში ისევ ელოდება, თუ როდის მისცემენ სამშობლოში დაბრუნების უფლებას. ისინი ცუდ პირობებს, ანტისანიტარიასა და სხვა პრობლემებს უჩივიან; რამდენიმე ათეულმა ადამიანმა შიმშილობაც კი გამოცხადა, – იუწყება „კავკაზსკი უზელი“.
აზერბაიჯანს პერიოდულად დაახლოებით 100 ადამიანი გაჰყავს, თუმცა ეს პრობლემას ვერ წყვეტს.
13 ადამიანს კორონავირუსი აქვს გამოვლენილი, ისინი საავადმყოფოში მოათავსეს, და განმეორებითი ანალიზების პასუხებს ელოდებიან.
- სომხეთი: სამი ქალის ისტორია, რომლებიც საკუთარი ბიზნესის კორონავირუსისგან გადარჩენას ცდილობენ
- როგორი იქნება ტურიზმი კორონავირუსის შემდეგ. საქართველო ტურისტების მისაღებად ემზადება
- როგორ გამოიყურება ბაქო ფანჯრიდან – სხვანაირად მისი დანახვა ახლა შეუძლებელია
დაკეტილი საზღვარი, კარვები და მოლოდინი
კორონავირუსი COVID19-ის გავრცელების შემდეგ რუსეთის სხვადასხვა კუთხეში მყოფმა აზერბაიჯანის მოქალაქეებმა დაღესტნის დერბენდის რაიონის საზღვართან დაიწყეს თავმოყრა. იმის შესახებ, რომ საზღვარი დაკეტილი იყო, ბევრმა მათგანმა უკვე ადგილზე ჩასვლისას შეიტყო.
ამ ადმიანებზე ზრუნვის პასუხისმგებლობა ნაწილობრივ ადგილობრივმა ხელისუფლებამ და მაცხოვრებლებმა ითავეს. მაგრამ, მოცემულ მომენტში საკუთრივ დაღესტანში კორონავირუსთან დაკავშირებით რთული სიტუაციაა, იქ დაინფიცირების მაღალი დონეა, და ადგილობრივი ჩინოვნიკები აზერბაიჯანს სთხოვენ, რომ საკუთარი მოქალაქეების ევაკუაციის პროცესი დააჩქაროს.
ამავდროულად აზერბაიჯანში არსებული ეპიდემიოლოგიური სიტუაცია არცთუ სახარბიელოა – დღეში დაახლოებით 300 ახალი დაინფიცირების შემთხვევა ვლინდება (ბევრად მეტი, ვიდრე, მაგალითად მაისის დასაწყისში იყო), საკარანტინო რეჟიმი 15 ივნისამდეა გაგრძელებული, და შესაძლოა, კიდევ გაგრძელდეს. შესაბამისად, ჯერჯერობით საზღვრებიც გაურკვეველი ვადით არის ჩაკეტილი.
დაღესტანში ჩარჩენილი აზერბაიჯანელები ძირითადად კარვებში ცხოვრობენ, ზოგიერთი საზღვარზე, უკვე თვეზე მეტია, იმყოფება, მაგრამ ვერანაირად ვერ ხვდებიან იმ სიაში, ვისაც სამშობლოში აბრუნებენ. შიმშილობის გამოცხადებით მათ აზერბაიჯანის ხელისუფლების ყურადღების მიპყრობა სურთ.
ერთ-ერთი მათგანი, სადიჰ რზაევი ამბობს, რომ საზღვარზე 14 მაისიდან იცდის.
„გროზნოში [ჩეჩნეთი]მშენებლობაზე ვმუშაობდი. როდესაც სამუშაო შეჩერდა, აზერბაიჯანში დაბრუნება გადავწყვიტეთ. შიმშილობაში მეც ვმონაწილეობდი, მაგრამ წნევის მკვეთრი დაცემის გამო, გუშინ შევწყვიტე. იმედი მაქვს, ცოტას მოვღონიერდები და აქციის მონაწილეთა რიგებს დავუბრუნდები“, – ჰყვება ის.
აზერბაიჯანს ამისთვის არ სცალია?
„ბოლო სამი თვის განმავლობაში აზერბაიჯანულმა მხარემ საკუთარი მოქალაქეები სულ სამჯერ მიიღო. პირველად ეს 120 ადამიანი იყო, მეორედ – 131, და მესამედ – 122. მაგრამ ყოველ ჯერზე, როდესაც საზღვარი იხსნება და მას 100 ადამიანზე მეტი კვეთს, მთელი რუსეთიდან აქ დამატებით დაახლოებით ორასი ადამიანი ჩამოდის. თუმცა, აზერბაიჯანული მხარე გარკვეულ ლიმიტს ადგენს. ერთდროულად ყველას გაყვანა შეუძლებელია“, – ამბობს დერბენდის რაიონის ხელმძღვანელის მოვალეობის შემსრულებელი ფუად შიხიევი.
აზერბაიჯანის მინისტრთა კაბინეტთან არსებული ოპერატიული შტაბი აცხადებს, რომ მოქალაქეების საზღვარგარეთიდან დაბრუნება ეტაპობრივად, ინფრასტრუქტურის მზადყოფნის შესაბამისად ხორციელდება.
თავად საზღვარზე ჩარჩენილი ადამიანებიც და აზერბაიჯანის ზოგიერთი ექსპერტიც მიიჩნევენ, რომ ეს პრობლემა როგორც აზერბაიჯანის ხელისუფლების, ისე სოციალური ქსელების თვალთახედვის მიღმა აღმოჩნდა.
აზერბაიჯანის ახალი ამბების სააგენტოს Turan-ის მიმომხილველის ტოფიგ ტიურკელიას დაკვირვებით:
„აპრილში, როდესაც ეს თემა ის-ის იყო გაჩნდა, მას როგორც პროსამთავრობო მედია, ისე დამოუკიდებელი ონლაინ-გამოცემებიც აშუქებდნენ. ახლა პროსამთავრობო მედიაში ამ თემას მაშინ ახსენებენ, როდესაც საზღვარს აზერბაიჯანის მოალაქეების მორიგი ჯგუფი კვეთს. საზღავრზე მყოფი ადამიანების პრობლემების შესახებ, ძირითადად, დამოუკიდებელი გამოცემები წერენ. რაც შეეხება სოციალურ ქსელებს, ოპოზიციურად განწყობილი მომხმარებლები აქტივისტების დევნას, პანდემიის პირობებში ხელისუფლების სოციალური პოლიტიკის კრიტიკას, ასევე უქმე დღეებში საკარანტინო რეჟიმის გამკაცრებას და ამ პერიოდში დამრღვევების მიმართ პოლიციის მკაცრ ქმედებებს უფრო მეტ ყურადღებას უთმობენ“.
მოცემულ მომენტში აზერბაიჯანში მართლაც დაძაბული ვითარებაა; იმდენად ვირუსის გამო არა, რამდენადაც – მასთან ბრძოლისას მთავრობის მიერ მიღებული ზომების ნიადაგზე.
საკარანტინო რეჟიმის დარღვევის ბრალდებით ციხეში უკვე მრავალი ოპოზიციონერი და აქტივისტი აღმოჩნდა, ხალხში კი როგორც საკარანტინო წესების, ისე ამ ფონზე პოლიციის საქციელით გამოწვეული უკმაყოფილება მატულობს.
