აზერბაიჯანელ აქტივისტ ბახტიარ გაჯიევს 10 წლით თავისუფლების აღკვეთა მიუსაჯეს
დაპატიმრებები აზერბაიჯანში – ბახტიარ ჰაჯიევი
აზერბაიჯანში აქტივისტ ბახტიარ ჰაჯიევის წინააღმდეგ სისხლის სამართლის საქმის სასამართლო პროცესი დასრულდა. არაერთ ეკონომიკურ დანაშაულში, ასევე ხულიგნობაში ბრალდებულ აქტივისტს ათწლიანი პატიმრობა მიესაჯა.
- მოსამართლეების კორპორაციული წვეულება პროტესტის და კვერცხების სროლის ფონზე გაიმართა. VIDEO
- ბაქოში Meydan TV-ის თანამშრომლები დააკავეს და კონტრაბანდაში ადანაშაულებენ. ჟურნალისტები პოლიტიკურ დევნაზე საუბრობენ
13 იანვარს განაჩენი გამოაცხადეს სხდომაზე, რომელსაც ბაქოს მძიმე დანაშაულთა სასამართლოს მოსამართლე, ალი მამედოვი ხელმძღვანელობდა.
განაჩენის თანახმად, ბახტიარ ჰაჯიევს ბაქოში, გ.ზარდაბის ქუჩაზე არსებული სახლი და საბანკო ანგარიშებზე არსებული თანხები დაუყადაღდება. სასამართლომ ასევე დაადგინა, რომ მას გათავისუფლების შემდეგ ერთი წლით აეკრძალება საგანმანათლებლო საქმიანობა.
ბოლო სხდომაზე პროკურორმა ბახტიარ ჰაჯიევის 11 წლით თავისუფლების აღკვეთა მოითხოვა.
გაჯიევმა განაჩენს პოლიტიკურად მოტივირებული უწოდა. მან აღნიშნა, რომ მისთვის წარდგენილი ყველა ბრალდება გამოგონილია.
“რაც შეეხება ხულიგნობის ბრალდებებს, ისინი შეთითხნილია ულვია ალოვლუს საჩივრის საფუძველზე, რომელიც ასრულებდა ხელისუფლებაში მყოფი მისი ზედამხედველების ბრძანებებს“, – თქვა აქტივისტმა.
გაჯიევმა ყველა სხვა ეკონომიკურ ბრალდებასაც აბსურდული უწოდა:
“ისინი ეფუძნება ანონიმურ ელექტორნულ წერილს, რომ თითქოს მე გრანტებს ვიღებ დასავლური ორგანიზაციებისგან და ვგეგმავ სახელმწიფო გადატრიალებას აზერბაიჯანში“.
გაჯიევმა ამ ბრალდებებს “სრულიად ფიქტიური” უწოდა. აქტივისტი მიიჩნევს, რომ დაკავების რეალური მიზეზი აზერბაიჯანში ადამიანის უფლებების დამრღვევთა წინააღმდეგ სანქციების დაწესებისთვის მისი აქტიური მუშაობაა.
მან ყურადღება გაამახვილა იმ ფაქტზე, რომ იგი დააკავეს აზერბაიჯანის შინაგან საქმეთა სამინისტროს ორგანიზებულ დანაშაულთან ბრძოლის მთავარი სამმართველოს თანამშრომლის მიმართ მიზანმიმართული სანქციების დაწესებისთანავე.
ბახტიარ გაჯიევი 2022 წლის დეკემბერში დააკავეს. მას თავდაპირველად ბრალი წაუყენეს აზერბაიჯანის სისხლის სამართლის კოდექსის 221.2.2 (ხულიგნობა და სასამართლოს უპატივცემულობა) მუხლებით.
გაჯიევს ბრალი ჟურნალისტ ულვია ალოვლუს საჩივარზე წაუყენეს. გაჯიევსა და ალოვლუს შორის დიდი ხანია კონფლიქტია – ისინი ერთმანეთს ცილისწამებაში ადანაშაულებდნენ. ერთ-ერთ სასამართლო პროცესზე მათ შორის სიტყვიერი შელაპარაკებაც მოხდა, რომელიც ჩხუბში გადაიზარდა. საბრალდებო დასკვნის მიხედვით, ამ ინციდენტის დროს გაჯიევმა ძალადობა განახორციელა როგორც ალოვლუზე, ასევე აღმასრულებელ ორხან აბდულაევზე.
ალოვლუსთან კონფლიქტი კნუტების გამო საყოფაცხოვრებო ნიადაგზე დაიწყო.
ბახტიარ გაჯიევმა არაერთხელ განაცხადა, რომ ხელისუფლებამ ისარგებლა ამ ფაქტით, რათა “მასზე შური იძიოს მისი კრიტიკისთვის“.
2023 წლის 16 ივნისს აქტივისტს ახალი ბრალი წაუყენეს. ეს ბრალდებები ძირითადად ფინანსურ საკითხებს, გამოყოფილი გრანტების მითვისებას უკავშირდება.
იმავე წლის ნოემბერში მას სხვა დანაშაულში, გადასახადებისგან თავის არიდებაში დასდეს ბრალი.
ბახტიარ გაჯიევი არცერთ ამ ბრალდებას არ აღიარებს.
42 წლის ბახტიარ ჰაჯიევმა მაგისტრის ხარისხი აშშ-ში ჰარვარდის უნივერსიტეტში მიიღო. ის ცნობილია, როგორც აზერბაიჯანის ხელისუფლების პოლიტიკის მძაფრი კრიტიკოსი.
