ავტოგარბენი და სიხარული - როგორ აღნიშნეს ცხინვალში დონეცკისა და ლუგანსკის აღიარება
სამხრეთ ოსეთში დონეცკისა და ლუგანსკის სახალხო რესპუბლიკების აღიარება იზეიმეს
ე.წ. სამხრეთ ოსეთმა მხარი დაუჭირა რუსეთის მიერ დონეცკისა და ლუგანსკის სახალხო რესპუბლიკების აღიარებას, რაც 21 თებერვალს მოხდა. ცხინვალი ამ თვითგამოცხადებულ რესპუბლიკებს ჯერ კიდევ 2014 წლიდან უჭერდა მხარს, როდესაც აღიარა მათი სუვერენიტეტი დამოუკიდებელი რესპუბლიკების სახით, დაამყარა დიპლომატიური ურთიერთობები და ავითარებდა ყოველმხრივ კონტაქტებს.
როგორც კი მოსკოვში ვლადიმირ პუტინმა თავისი გადაწყვეტილების შესახებ განაცხადა, ანატოლი ბიბილოვმა მხარი დაუჭირა რუსეთის პრეზიდენტს.
განცხადებაში ბიბილოვმა ხაზი გაუსვა, რომ „უკრაინის ტერიტორიულ მთლიანობას ბოლო მოუღო კიევის რეჟიმმა, დაიწყო რა სასტიკი ტერორი დონბასელი ხალხის წინააღმდეგ“.
„ნათელი იყო, რომ კიევის მიერ ნებისმიერი შეთანხმება ფორმდებოდა მხოლოდ იმისთვის, რომ დრო მოეგო. მიღებულ გაკვეთილებს ფუჭად არ ჩაუვლია, კიევმა გადაწყვიტა კვლავ ძალისმიერი არგუმენტებისთვის მიემართა, მეტიც, ის შანტაჟს ცდილობს ბირთული საფრთხით.
ეს კიევის ხელმძღვანელობის არაადეკვატურობის მაჩვენებელია და ეს არის მოთმინების ზღვარი, რომელიც ადგილს ტოვებდა მხოლოდ ერთი გადაწყვეტილების მისაღებად და ეს გადაწყვეტილება მიღებულია“, – განაცხადა ბიბილოვმა.
- ცხინვალი პრეზიდენტის არჩევისთვის ემზადება
- ცხინვალი: პოლტიკური კრიზისი სასაზღვრო პრობლემის გამო
- „თვითმარქივია“ და „თალიბანი“. ვინ და რატომ წავიდა ავღანეთში სამხრეთ ოსეთის სახელით
ბიბილოვს მიაჩნია, რომ პუტინის მიერ დონბასის აღიარება „ათობით მილიონი ადამიანისთვის უკეთესი მომავლის იმედს ნიშნავს. ისევე, როგორც რუსეთის მიერ აღიარება უკვე 13 წელია უზრუნველყოფს მშვიდობას სამხრეთ ოსეთის რესპუბლიკის მიწაზე“.
პრეზიდენტ ბიბილოვს დონეცკისა და ლუგანსკის სახალხო რესპუბლიკების მეთაურებთან მეგობრული ურთიერთობები ჯერ კიდევ 2014 წლიდან ჩამოუყალიბდა, როდესაც ის პარლამენტის სპიკერი იყო და აქტიურად მონაწილეობდა უკრაინის გამოყოფილი ტერიტორიების აღიარებისა და ორმხრივი ურთიერთობების დამყარების პროცესებში.
მას შემდეგ, რაც ბიბილოვის ოფიციალური განცხადება გამოქვეყნდა, ბიბილოვმა პირადად მიულოცა დონეცკის სახალხო რესპუბლიკის მეთაურს, დენის პუშილინს „ნანატრი მოვლენა“. პოლიტიკოსმა ამის შესახებ ინფორმაცია საკუთარ ტელეგრამ-არხზე გაავრცელა, ერთობლივი ფოტოს გამოქვეყნებასთან ერთად.
„დონბასის მოძმე რესპუბლიკების“ მხარდამჭერი კურსისა და სახელმწიფოთაშორისო ურთიერთობების განვითარებაზე განაცხადა საგარეო საქმეთა სამინისტრომაც.
ხმაურიანი მოვლენისგან განზე არ დარჩნენ არც საპარლამენტო პარტიები, ასევე, პრეზიდენტობის ზოგიერთი კანდიდატი.
წამყვანი პოლიტიკური ძალები ერთხმად უჭერენ მხარს დონბასური რესპუბლიკების დამოუკიდებლობის აღიარებას.
სახელისუფლებო პარტია „ერთიანი ალანიის“ ახალგაზრდულმა ფრთამ გუშინ მოძმე რესპუბლიკის მხარდაჭერის მიზნით ავტოგარბენი მოაწყო, რომელსაც რიგითი მოქალაქეებიც შეუერთდნენ.
მანამდე „ერთიანმა ოსეთმა“ მხარი დაუჭირა სახელმწიფო სათათბიროს გადაწყვეტილებას, რომელმაც პრეზიდენტ პუტინს დონეცკისა და ლუგანსკის სახალხო რესპუბლიკების დამოუკიდებლობის აღიარების შესახებ მიმართა.
კონსოლიდირებულად გააჟღერეს რუსი პარლამენტარების მხარდამჭერი მოსაზრებები.
გუშინ, საპარლამენტო პარტია „ხალხთა ერთობამ“ დონეცკსა და ლუგანსკს ისტორიული მოვლენა მიულოცა.
პარტია „ნიხასმა“ პრეზიდენტობის კანდიდატ ალან გაგლოევის მეთაურობით „სახალხო პარტიასა“ და საპარლამენტო გაერთიანებასთან „სამართლიანობისთვის“ ერთად გამოაქვეყნა განცხადება.
„ჩვენ ვიცით ომის ფასი და ერთგული მოკავშირის გაწვდილი ხელის ფასი, რომელიც არ შეუშინდა ყველა თანმდევ რისკს და გაუძლო დასავლური ქვეყნების ზეწოლას.
რუსეთმა კვლავ გამოიჩინა თავი, როგორც უდიდესმა ზესახელმწიფომ, როგორც ეს ხდებოდა მრავალი საუკუნის განმავლობაში და ბევრ ქვეყანაში, როდესაც მთელი ხალხები გადარჩა რუსეთის წყალობით.
ჩვენ გონიერების გამარჯვების იმედი გვაქვს, ყველა სადავო საკითხის მშვიდობიანი გადაწყვეტის. და როგორც მაშინ, 2008-ში: „მადლობა რუსეთს! მადლობა ვლადიმირ ვლადიმირის ძე პუტინს!“, – ნათქვამია საპარლამენტო ოპოზიციის ერთობლივ განცხადებაში.
თავდაცვის მინისტრმა იბრაჰიმ გასეევმა, რომელიც პრეზიდენტის პოსტზე იყრის კენჭს, ასევე გამოაქვეყნა პოსტი თავის ტელეგრამ-არხზე და პუტინის გადაწყვეტილება ლუგანსკისა და დონეცკის სახალხო რესპუბლიკების აღიარების შესახებ, 2008 წელს სამხრეთ ოსეთისა და აფხაზეთის დამოუკიდებლობის აღიარებას შეადარა.
მოსკოვსა და დონბასში განვითარებულ მოვლენებზე ჯერჯერობით არანაირი რეაქცია არ ჰქონიათ ექსპრეზიდენტ ედუარდ კოკოითისა და საგარეო საქმეთა ყოფილ მინისტრს, ოპოზიციონერ დეპუტატ დავიდ სანაკოევს. ორივე პოლიტიკოსი კენჭს იყრის პრეზიდენტის პოსტზე.
აღფრთოვანებულ გამოხმაურებებს ტოვებენ სოციალურ ქსელებში ცხინვალელი რიგითი მოქალაქეები.
Klavdia Kozaeva: „ბოლოს და ბოლოს, გადაიჭრა საკითხი… საწყალი ხალხი… რამდენი იტანჯა… რამდენი სიცოცხლე წაიღეს, რამდენი ბავშვი დაიღუპა. ვინ არის მათზე პასუხისმგებელი?
მადლობა რუსეთს… სამხრეთი ოსეთი, რომელმაც იგივე საკუთარ ტყავზე გამოცადა,მთელი არსებით უჭერს მხარს პუტინის გადაწყვეტილებას…
ყოჩაღ ბიჭებო…“.
Рита Тулоева: „ვის, თუ არა ჩვენ, გვესმის მათი ტკივილი და სიხარული. მშვიდობა და აყვავება მისურვებია თქვენთვის“.
რა იქნება შემდეგ?
ამავდროულად, ჯერჯერობით ცხინვალში არანაირ კომენტარს არ აკეთებენ რუსეთისა და მის მიერ აღიარებული დონეცკური რესპუბლიკების წინააღმდეგ დაწესებული სანქციებისა და ცხინვალზე მათი შესაძლო გავლენის შესახებ.
კერძოდ, აისახება თუ არა რუსეთის წინააღმდეგ დაწესებული შეზღუდვები არსებულ სოციალურ-ეკონომიკურ სიტუაციაზე, თუკი გავითვალისწინებთ, რომ ძირითადი ფინანსური ნაკადები მოსკოვიდან მოდის.
2015 წლიდან ცხინვალში მოქმედებს საერთაშორისო ანგარიშსწორების ბანკი, რომელსაც წარმომადგენლობები გახსნილი აქვს დონეცკისა და ლუგანსკის სახალხო რესპუბლიკებში. სწორედ ამ ბანკის გავლით ხორციელდებოდა დონბასური რესპუბლიკების ანგარიშსწორება და არა მხოლოდ ოსეთთან – არამედ რუსეთთანაც, რომელიც ფორმალურად არ აღიარებდა მათ დამოუკიდებლობას, მაგრამ აღიარებდა სამხრეთ ოსეთის დამოუკიდებლობას.
შენარჩუნდება თუ არა ეს თანამშრომლობა საბანკო სფეროში ან სახეს ხომ არ შეიცვლის? შეიძლება თუ არა, დასავლურმა სანქციებმა გაართულოს ფინანსურ-ეკონომიკური ურთიერთქმედება მოსკოვსა და მის მიერ აღიარებულ რესპუბლიკებს შორის? ამ კითხვებზე პასუხის გასაცემად ცხინვალში ჯერჯერობით მზად არ არიან.
ისევე, როგორც ჯერჯერობით არ არსებობს ამჟამინდელი ხელმძღვანელობის ოფიციალური შეფასებები მომხდარი გეოპოლიტიკური ცვლილებების, რომლებიც გავლენას ახდენს სამხრეთ კავკასიაზე, და საქართველოსთან სიტუაციის სავარაუდო გაუარესების თაობაზე.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
