"ვაზუსტებთ ფაქტობრივ გარემოებებს, ქართველებზე ინფორმაციას" - რა ვიცით აშშ-ს მიერ დაკავებული გემის ქართულ ეკიპაჟზე
აშშ-ს მიერ დაკავებული გემი
აშშ-მა ატლანტის ოკეანეში დააკავა რუსეთის დროშის ქვეშ მცურავი ნავთობტანკერი Marinera, რომლის ეკიპაჟის შემადგენლობაში, გავრცელებული ინფორმაციით, საქართველოს ექვსი მოქალაქე იმყოფება, მათ შორის – გემის კაპიტანი. დაკავება ვენესუელაზე დაწესებული საერთაშორისო სანქციების დარღვევას უკავშირდება.
რუსული მედიის ცნობით, ტანკერი 2026 წლის 7 იანვარს იქნა დაკავებული. ღია წყაროებზე დაყრდნობით გავრცელებული ინფორმაციით, გემზე სულ 28 მეზღვაური იმყოფება: 20 – უკრაინის მოქალაქე, ექვსი – საქართველოს, ხოლო ორი – რუსეთის ფედერაციის. სწორედ ეს ცნობები გახდა საფუძველი, რის გამოც საქართველოში შესაბამისმა უწყებებმა ფაქტობრივი გარემოებების დაზუსტება დაიწყეს.
სსიპ საზღვაო ტრანსპორტის სააგენტოში აცხადებენ, რომ ამ ეტაპზე მიმდინარეობს გემის დამსაქმებელი კომპანიის იდენტიფიცირება და ეკიპაჟის ქართველი წევრების შესახებ ინფორმაციის მოძიება. სააგენტოს განმარტებით, ოფიციალური დადასტურება ჯერჯერობით არ არსებობს და ისინი ღია წყაროებსა და ხელმისაწვდომ მონაცემებზე დაყრდნობით მუშაობენ.
საქართველოს საგარეო საქმეთა სამინისტროშიც ადასტურებენ, რომ უწყებაში ოფიციალური შეტყობინება საქართველოს მოქალაქეების დაკავების შესახებ ამ დრომდე არ შესულა. ამავე დროს, სამინისტრო აცხადებს, რომ ატლანტის ოკეანეში დაკავებული ტანკერის ეკიპაჟში საქართველოს მოქალაქეების შესაძლო ყოფნასთან დაკავშირებით ინფორმაციას ამოწმებს და შესაბამის სამუშაოებს ახორციელებს.
აშშ-ის მიერ ტანკერის დაკავება დაკავშირებულია ვენესუელაზე დაწესებულ სანქციებთან, რომლებიც მიზნად ისახავს ნავთობის უკანონო ტრანსპორტირებისა და სანქციების გვერდის ავლის აღკვეთას. თუმცა, ამ ეტაპზე უცნობია, რა სტატუსი აქვთ ეკიპაჟის წევრებს და შეეხო თუ არა დაკავება უშუალოდ მათ.
ოფიციალური უწყებები აცხადებენ, რომ დამატებითი დეტალები ფაქტების დაზუსტების შემდეგ გახდება ცნობილი.
