კორონავირუსი: პანდემიის ეპიცენტრი - აშშ. რატომ და რა მოხდება შემდეგ?
ამერიკის შეერთებულმა შტატებმა – მსოფლიოში, მოსახლეობის რაოდენობით მესამე ქვეყანამ (331 მილიონი ადამიანი) – საგრძნობლად გადაუსწრო ჩინეთსა და იტალიას კორონავირუსით ინფიცირებულთა რაოდენობით.
სულ, ერთი კვირის განმავლობაში, აშშ-ში შემთხვევების რაოდენობა ოთხჯერ გაიზარდა. Microsoft-ის დამფუძნებელი, ბილ გეითსი დაავადების პიკს აპრილის ბოლოს ვარაუდობს.
30 მარტის მონაცემებით, აშშ-ში კორონავირუსით ინფიცირებული 142 736 ადამიანია, მათგან 2 489 გარდაიცვალა.
CNN-ის მონაცემებით, 23 მარტის დილისთვის აშშ-ში აღნიშნული ვირუსით 414 ადამიანი იყო გარდაცვლილი.
სულ რაღაც ერთი კვირის შემდეგ, 30 მარტის დილას, დაღუპულია უკვე 2 489 ადამიანი და ვაიომინგი და ჰავაი ერთადერთი შტატებია, სადაც ჯერჯერობით არ დაფიქსირებულა კორონავირუსით გარდაცვალების შემთხვევა.
ექიმმა ენტონი ფაუსიმ, რომელიც თეთრ სახლში, კორონავირუსის წინააღმდეგ შექმნილი ჯგუფის წევრია, განაცხადა:
„სრულებით შესაძლებელია, რომ აშშ-ში ინფიცირებულთა რაოდენობა ერთ მილიონამდე გაიზარდოს“.
- კორონავირუსი ირანში: ერთ-ერთი ყველაზე დიდი აფეთქება მსოფლიოში და ხელისუფლების ტყუილი
- რუსეთი პანდემიის პიკის მოლოდინში
პრეზიდენტმა დონალდ ტრამპმა 29 მარტს გამართულ ბრიფინგზე კიდევ უფრო ტრაგიკული პროგნოზი გააკეთა:
„თუკი მოხერხდება გარდაცვლილთა რიცხვის 100 ათასამდე ან უფრო ნაკლებამდე შემცირება – შესაძლებელი იქნება ვთქვათ, რომ ძალიან კარგი სამუშაო გავწიეთ“.
რატომ შეიქმნა აშშ-ში კატასტროფული სიტუაცია?
დაშვებული შეცდომები
აშშ-ში დაავადების მკვეთრი აფეთქების მიზეზი ხელისუფლების ქმედებებში დაშვებული შეცდომები გახდა. ამერიკელი ეპიდემიოლოგები, პირველ რიგში, გლობალურ მიზეზებზე საუბრობენ:
არასერიოზული დამოკიდებულება ეპიდემიისადმი იმ დროსაც კი, როდესაც მან ჩინეთი მოიცვა.
ამ შეცდომის შედეგი გახდა საავადმყოფოებში ყველაფრის კატასტროფული დეფიციტი: ნიღბების, ექიმების დამცავი აღჭურვილობის, ხელოვნური სუნთქვის აპარატების – დაავადების წინააღმდეგ ბრძოლის მთავარი საშუალების.
ექიმები ნიუ-იორკში: „ყველაფრის მწვავე დეფიციტი გვაქვს“
ნიუ-იორკში კორონავირუსით ინფიცირების ყველაზე მეტი შემთხვევაა. CNN-ის ცნობით, 30 მარტის დილის მონაცემებით, აქ სულ მცირე 59 513 ადამიანი დაავადდა და 965 გარდაიცვალა.
„ჩვენ ყველაფრის მწვავე დეფიციტი გვაქვს“, – ეს არის ნიუ-იორკის შტატის, ლონგ-აილენდის საავადმყოფოს ანესთეზიოლოგიის განყოფილების ექიმის სიტყვები, რომელმაც საკუთარი ვინაობის გამხელა არ ისურვა.
„არ მგონია, რომ ეს საავადმყოფოების ბრალი იყოს. ისინი სულ ითხოვენ და ითხოვენ, მაგრამ ვერაფერს იღებენ“, – განუცხადა მან CNN-ს.
ექიმმა აღწერა, როგორ წმენდენ და ხელმეორედ იყენებენ ერთჯერად დამცავ საშუალებებს.
მისი თქმით, საავადმყოფოებში უკვე აღარ არის სადეზინფექციო ხელსახოცები.
მაგრამ ყველაზე დიდი პრობლემა – ხელოვნური სუნთქვის აპარატების მწვავე ნაკლებობაა და მედიკოსებმა ნარკოზის აღჭურვილობის ხელოვნური სუნთქვის აპარატებად გამოყენება დაიწყეს.
„იმდენად ბევრი კრიტიკულ მდგომარეობაში მყოფი პაციენტი გვყავს, რომ არ შეგვიძლია რაიმე გავაკეთოთ აღჭურვილობისა და საჭირო მასალების გარეშე“, – განაცხადა ექიმმა.
ნიუ-იორკის შტატის გუბერნატორმა, ენდრიუ ქუომომ არაერთხელ განაცხადა, რომ კორონავირუსით ინფიცირებული პაციენტების სამკურნალოდ შტატს აუცილებლად სჭირდება სულ ცოტა 30 ათასი ხელოვნური სუნთქვის აპარატი, მაგრამ ამის მხოლოდ მცირე ნაწილი აქვთ.
ამ სურათს ზუსტად ასევე აღწერენ აშშ-ის სხვა შტატების სხვადასხვა საავადმყოფოს ექიმები.
ამავდროულად, ცენტრალური ხელისუფლების მიერ სპეციალურად კორონავირუსთან ბრძოლისათვის დანიშნული კოორდინატორი ბოლო მომენტამდე უარყოფდა ნიღბების, დამცავი საშუალებებისა და ხელოვნური სუნთქვის აპარატების ნაკლებობას ქვეყნის საავადმყოფოებში.
საუბარია იმის შესახებაც, რომ მიუხედავად ეპიდემიის აფეთქებისა, აშშ-ში კვლავინდებურად მოსახლეობის შედარებით მცირე რაოდენობის ტესტირება ხდება.
მიღებული ზომები
როდესაც ეპიდემიის მასშტაბები გააცნობიერეს – დიდი დაგვიანებით, როგორც ექიმები ამბობენ – აშშ-ის ხელისუფლებამ გარკვეული ზომების მიღება დაიწყო.
- დაიკეტა საზღვრები
- შტატებმა ერთმანეთის მიყოლებით გამოაცხადეს საგანგებო მდგომარეობა, რაც გუბერნატორებს უფლებას აძლევს, გამოიყენონ მკაცრი კარანტინი და მოქალაქეების გადაადგილება მკვეთრად შეზღუდონ
- პრეზიდენტმა ტრამპმა უმსხვილეს საავტომობილო (Ford, General Motors) და სხვა კომპანიებს მოუწოდა, გადაერთონ ხელოვნური სუნთქვის აპარატების წარმოებაზე. წინააღმდეგ შემთხვევაში, ის მათ ემუქრება, რომ ამის გაკეთებას „საომარ დროს საწარმოო საქმიანობის შესახებ კანონის“ დახმარებით აიძულებს.
- აშშ-ის სამედიცინო კოლეჯებში, შესაძლოა, ვადამდელი გამოსაშვები გამოცდები დაინიშნოს, რათა კურსდამთავრებულთა დახმარებით შეავსონ საავადმყოფოებში მედიკოსების დეფიციტი.
- აშშ-ის სამხედრო-საზღვაო ფლოტმა ნიუ-იორკის პორტში – კორონავირუსისგან ყველაზე მეტად დაზარალებულ ქალაქში – მცურავი ჰოსპიტალი გაგზავნა.
პანდემია და უმუშევრობა
არანაკლებ, ვიდრე თავად პანდემიის, ამერიკის ხელისუფლებასა და მოსახლეობას ეკონომიკური შედეგების ეშინია – წარმოებისა და ვაჭრობის შემცირების და ამის შედეგად წარმოქმნილი უმუშევრობის.
ეკონომიკური კრიზისის თავიდან ასაცილებლად და ბიზნესის მხარდასაჭერად, ხელისუფლებამ ისტორიაში უპრეცედენტო თანხა გამოყო – 2 ტრილიონი დოლარი.
აქედან 250 მილიარდი – პირდაპირი დახმარებაა მოქალაქეებისა და შინამეურნეობებისთვის.
ბილ გეითსის პროგნოზი
გეითსების ოჯახის საქველმოქმედო ფონდმა კორონავირუსის წინააღმდეგ ბრძოლას 100 მილიონ დოლარზე მეტი შესწირა.
Microsoft-ის დამფუძნებელი ბილ გეითსი გამოვიდა პროგნოზით, რომლის თანახმადაც, დაავადების პიკი აშშ-ში აპრილის ბოლოს იქნება.
