"ხელისუფლება აქციების მონაწილეებისა და ოპოზიციონერების ცემასა და დაშინებას არასათანადოდ იძიებს" - HRW
აქტივისტების ცემა
ადამიანის უფლებათა საერთაშორისო ორგანიზაციამ, Human Rights Watch–მა საქართველოში ხელისუფლების კრიტიკოსებზე პოლიტიკურად მოტივირებულ ძალადობის შესახებ ანგარიში გამოაქვეყნა, რომელშიც ვკითხულობთ, რომ მთავრობა ე.წ. ტიტუშკების მიერ აქტივისტების, აქციების მონაწილეებისა და ოპოზიციონერების ცემასა და დაშინებას არასათანადოდ იძიებს.
რა წერია ანგარიშში
● ქართულმა ადამიანის უფლებათა ჯგუფებმა აპრილის შუა რიცხვებიდან მოყოლებული აქტივისტებზე ფიზიკური თავდასხმების თორმეტამდე სხვა შემთხვევა აღრიცხეს და გააშუქეს. ამ თავდასხმების გამოძიება ნელა და ძირითადად არაეფექტურად მიმდინარეობს.
● უშუალოდ ორგანიზაციამ 5 ადამიანზე 6 თავდასხმა აღწერა, რომლებიც თბილისში მოხდა, თავდასხმების შესახებ მასალები გამოიკვლია და შსს-სა და გენპროკურატურას ინფორმაციის თხოვნით მიმართა, რაზეც დაუბრუნდა პასუხი, რომ თავდასხმების გამოძიების ფარგლებში სისხლის სამართლის საქმე არ აღძრულა.
● Human Rights Watch-მა მსხვერპლებსა და მათ ადვოკატებს ინტერვიუები ჩამოართვა და იურიდიული დოკუმენტები, მათი დაზიანებების აღმწერი სამედიცინო ცნობები და თავდასხმების აღმბეჭდავი CCTV და სხვა ვიდეოები ნახა. Human Rights Watch-მა ასევე შინაგან საქმეთა მინისტრსა და გენერალურ პროკურორს გამოძიებების შესახებ ინფორმაცია გამოთხოვა. გენპროკურატურამ 19 აგვისტოს გვიპასუხა, რომ შინაგან საქმეთა სამინისტრო თავდასხმებს იძიებს და ჯერჯერობით სისხლის სამართლის საქმეები არ აღძრულა.
● ორგანიზაცია ასევე აღნიშნავს, რომ მათ მიერ აღწერილ შემთხვევებში, მსხვერპლთა ადვოკატები გამომძიებლებს რეგულარულად უკავშირდებოდნენ, მაგრამ არ გაუგიათ, რომ სამართალდამცავებმა რომელიმე ბრალდებულის ვინაობა დაადგინეს:
არცერთი მსხვერპლისთვის არ უთხოვიათ, რომ პოლიციის შენობაში ბრალდებული ამოეცნო ან ბრალდებულს პირისპირ შეხვედროდა
● იმ პირებს შორის, რომლებზეც თავდასხმებიც HRW-მ აღწერა, არიან სტუდენტური მოძრაობის ლიდერი ნიკოლოზ მანაგაძე, “სირცხვილიას” დამფუძნებელიjM ზურაბ ბერძენიშვილი, აქციის მონაწილე, ნიკოლოზ ბუთხუზი და ოპოზიციონერები გია ჯაფარიძე, დიმიტრი ჩიქოვანი.
HRW-ის ევროპისა და ცენტრალური აზიის დირექტორის, ჰიუ ვილიამსონის თქმით, საქართველოს ხელისუფლებამ მთავრობის მოწინააღმდეგეებზე ძალადობა სათანადოდ უნდა გამოიძიოს და პოლიტიკურად მოტივირებული ძალადობა ერთმნიშვნელოვნად უნდა დაგმოს.
“მთავრობის კრიტიკოსების წინააღმდეგ თავდასხმებისთვის დაუსჯელობა ნათელ სიგნალს აგზავნის, რომ ხელისუფლება პოლიტიკურად მოტივირებულ ძალადობას მხარს უჭერს, როცა ის მათ ინტერესებს ერგება. ხელისუფლებას ამ გზავნილისთვის თავის არიდება იმით შეუძლია, რომ დროული, საფუძვლიანი და ეფექტური გამოძიებები ჩაატაროს, რომელთა მეშვეობითაც ცალკეულ თავდამსხმელებს დაადგენენ
აქტივისტების, დამოუკიდებელი მედიისა და მთავრობის კრიტიკოსების დაშინება და შევიწროება თუ დაუსჯელი დარჩა, რისკია, რომ დანაშაულებრივი აქტორები საქართველოში არჩევნების წინა თვეებში ძალადობის ესკალაციას შეეცდებიან. ამ ბრუტალური თავდასხმებისთვის პასუხისმგებლობის დაკისრება გადაუდებლად არის საჭირო”. – თქვა ვილიამსონმა.
რა უნდა ვიცოდეთ “აგენტების კანონზე. მოკლედ
● კანონი “უცხოური გავლენის გამჭვირვალობის შესახებ” მმართველმა პარტიამ, “ქართულმა ოცნებამ” 28 მაისს მესამე მოსმენით მიიღო.
● ხელისუფლებამ კანონი მრავალათასიანი საპროტესტო გამოსვლების და საქართველოს დასავლელი პარტნიორების დაჟინებული მოწოდებისა და ევროსაბჭოს ვენეციის კომისიის მკაცრი დასკვნის მიუხედავად მიიღო.
● კანონის მიღების შემდეგ “ქართული ოცნების” ხელისუფლების მიმართ სანქციებზე საუბრობს აშშ. 23 მაისს სახელმწიფო მდივანმა ენტონი ბლინკენმა გამოაქვეყნა გადაწყვეტილება, სადაც ნათქვამია, რომ„საქართველოში დემოკრატიისთვის ძირის გამოთხრის გამო სავიზო შეზღუდვების პოლიტიკის გამოცხადება და აშშ-საქართველოს თანამშრომლობის ყოვლისმომცველი გადახედვა”. ფინანსური სანქციები იქნება ასევე გათვალისწინებული სენატისა და კონგრესის მიერ შემუშავებულ დოკუმენტებში.
● კანონის ძალაში შესვლის შემდეგ საპასუხო ზომების მიღებას აპირებს ევროკავშირიც. მანამდე ევროპელმა მაღალჩინოსნებმა არაერთხელ აღნიშნეს, რომ კანონი აშორებს საქართველოს ევროკავშირს.
● ხელისუფლების მთავარი არგუმენტია ის, რომ მსგავსი კანონმდებლობა აქვს ამერიკასაც და ასევე რიგ ევროპულ ქვეყნებსაც, მათ შორის, საფრანგეთსაც. “ქართული ოცნების” განმარტებით, ყველა ქვეყანას აქვს უფლება დაიცვას თავი უცხო გავლენისგან და მოსთხოვოს ორგანიზაციებს გამჭვირვალობა.
“ქართული ოცნების” მიერ მიღებული კანონის შედარება ამერიკულთან და ევროპულთან მცდარია და აი რატომ – კონკრეტული არგუმენტები:
ამერიკული კანონი FARA (Foreign Agents Registration Act), რომელზეც “ოცნება” აპელირებს, აშშ-ში მეორე მსოფლიო ომის წინ, 1938 წელს მიიღეს და ამ კანონის მიზანი იყო ამერიკის მოსახლეობა მაშინდელი მტრისგან – მესამე რაიხის ნაცისტური პროპაგანდისგან დაეცვა. არც მაშინ და არც დღეს FARA არ ვრცელდებოდა ამერიკის მოკავშირე, მეგობარ ქვეყნებზე.
იგივე, საფრანგეთში, სადაც “უცხო ქვეყნის გავლენის” კანონი ასევე აქვთ, პირდაპირ არის ჩამოთვლილი ქვეყნები, რომელთა წინააღმდეგ მოქმედებს ეს კანონი და ამ ჩამონათვალში ის ქვეყნებია, რომელთა გავლენის გაძლიერებასაც საფრანგეთი საფრთხედ მიიჩნევს და არა პარტნიორი და მეგობარი ქვეყნები. საფრანგეთის შემთხვევაში ეს ქვეყნებია: რუსეთი, ჩინეთი, თურქეთი და ირანი. ფრანგულ კანონში პირდაპირი დათქმაა ანუ მოქმედებს ჩამკეტი მექანიზმი, რომ ევროკავშირის ქვეყნებზე ეს კანონი არ გავრცელდება. მსგავსი დათქმა არ წერია “ქართული ოცნების” კანონში და შესაბამისად, ეს კანონი პირდაპირ ურტყამს სწორედ საქართველოს მეგობარი და პარტნიორი ქვეყნების – აშშ-ის და ევროკავშირის მიერ დაფინანსებულ ორგანიზაციებს, რომელთა დახმარებითაც ქვეყანაში დემოკრატიული პროცესები ვითარდება.
მეორე ტიპის ჩამკეტი მექანიზმი, რომელიც “უცხო ქვეყნების გავლენების შესახებ” კანონებს ზოგიერთ სხვა ქვეყნებში ახლავს ხოლმე, ეს არის შეზღუდვა საქმიანობის მიხედვით. მაგალითად, იგივე FARA-ში, რომელსაც ედრება “ოცნება”, წერია, რომ კანონი არ ეხება არც მედია ორგანიზაციებს და არც არასამთავრობო ორგანიზაციებს, არამედ მხოლოდ ლობისტურ ორგანიზაციებს. “ქართული ოცნების” ვარიანტში კი არც ამ ტიპის ჩამკეტი მექანიზმია გათვალისწინებული.
გამოდის რომ კანონი, რომელიც “ქართულმა ოცნებამ” მიიღო რუსულის ანალოგია. ამიტომ მას საქართველოში “რუსულ კანონს” ეძახიან. რუსული ვარიანტიც პირველ რიგში სწორედ მედიაორგანიზაციებს და არასამთავრობო სექტორს შეეხო. დღეს რუსეთში დახურულია ყველანაირი არასამთავრობო და მედია ორგანიზაცია, რომელიც არ კონტროლდება კრემლის მიერ.
ასევე მნიშვნელოვანი საკითხია, რომ ეს კანონი ეწინააღმდეგება ევროკავშირის სამართალს. უნგრეთში როდესაც მსგავსი კანონი მიიღეს, ის ადამიანის უფლებათა სასამართლომ გააუქმა. ეს კანონი უნგრეთში პირდაპირ იყო მიმართული მედიის გასაჩუმებლად, ასევე არასამთავრობო ორგანიზაციების შეურაცხყოფისთვის, ღირსების შესალახად.
მსგავსი შეზღუდვის დაწესება მეგობარი, პარტნიორი ქვეყნების მიმართ აჩენს ეჭვს, რომ ქვეყანა საგარეო ვექტორს იცვლის, რაზეც დღეს საქართველოში დამოუკიდებელი ექსპერტები, პოლიტიკოსები და სამოქალაქო საზოგადოების წარმომადგენლები საუბრობენ.
მრავალათასიანი მიტინგების მთავარი ლოზუნგიც სწორედ ეს არის – “კი ევროპას, არა – რუსეთს!”
კანონი, რომელიც “ქართულმა ოცნებამ” მიიღო, ამოქმედდება, სავარაუდოდ, სექტემბრისთვის, მაშინ როდესაც მზად იქნება სპეციალური რეესტრი, სადაც “უცხო ქვეყნის აგენტი” ორგანიზაციები საკუთარი ხელით უნდა დარეგისტრირდნენ.
“აგენტად გამოცხადდება ყველა ორგანიზაცია, რომლის შემოსავლის 20 პროცენტზე მეტი უცხო ქვეყნის გრანტებია. პატარა, ღარიბ ქვეყანაში – საქართველოში – ასეთია არასამთავრობო ორგანიზაციების თითქმის აბსოლუტური უმრავლესობა.
ევროკავშირის და აშშ-ის დახმარებით ქვეყანაში უკვე 33 წელია სასიცოცხლოდ მნიშვნელოვანი პროექტები ხორციელდება ნებისმიერ სფეროში – დაწყებული ჯანდაცვით და ინფრასტრუქტურით, დასრულებული სამოქალაქო საზოგადოების გაძლიერებით.
არასამთავრობო ორგანიზაციების და მედია ორგანიზაციების დიდი ნაწილი უარს ამბობს “უცხოური ძალის ინტერესების გამტარებლად” და “უცხოურ ძალად” რეგისტრირებაზე, რასაც ავალებს მათ კანონი. ორგანიზაციებისთვის და ადამიანებისთვის შეურაცხმყოფელია მსგავსი იარლიყი: “ჩვენ პატიოსნად ვშრომობთ საკუთარ ქვეყანაში, რატომ უნდა გვერქვას “უცხოური ძალის ინტერესების გამტარებელი?”, კითხულობენ ისინი.
ამდენად, ბევრი პატარა ორგანიზაცია უკვე აკეთებს განცხადებებს გარდაუვალ დახურვაზე. მაგალითად, არასამთავრობო ორგანიზაცია, ფეა თრიიზ ფონდმა გაავრცელა განცხადება, რომ რუსული კანონის მიღების გამო, ონში ბავშვთა სტომატოლოგიური კლინიკის გახსნის პროექტს აჩერებენ. ეს კლინიკა არასრულწლოვანებს უფასოდ უნდა მომსახურებოდა.
ან მაგალითად, ასევე განცხადება გაავრცელეს ცხოველთა დამცველებმა – მათ აღნიშნეს, რომ საქართველოში ცხოველთა დამცველი ორგანიზაციების თითქმის ასი პროცენტი უცხოურ გრანტებზე არსებობს და თუკი ამ კანონს მიიღებენ, ამ ორგანიზაციების დიდი ნაწილი დაიხურება.
