"ჩემს აფხაზ ბიძაშვილს არაფერი გაუგია ჯასტინ ბიბერზე, მე კი - ჩეჩნურ მუსიკაზე"

რამდენიმე დღის წინ ჩემი გარე ბიძაშვილები იყვნენ ჩამოსულები. ისინი სოხუმში ცხოვრობენ და წელიწადში რამდენჯერმე ჩამოდიან – ექიმთან გასასინჯად, საყიდლებზე (ჩვენი დედების საუბარს მოვკარი ყური – და თურმე, აქ სოხუმზე გაცილებით დაბალი ფასებია), ბებიას მოსანახულებლად, და ბოლო დროს ბაბუას საფლავზე გასასვლელადაც.

მე და ჩემი და მათ ყოველ ჩამოსვლაზე ვნახულობთ, და ამას ყოველთვის უამრავი ემოცია და შთაბეჭდილება ახლავს.

თავიდან, როგორც წესი, ძალიან დავირცხვენ ხოლმე – ასე მგონია, რომ პირველად ვხედავ მათ. თუმცა, ეს განცდა მალევე გადის და სალაპარაკო არასდროს გველევა. ამჯერად სიტყვა მუსიკაზეც ჩამოვარდა –  საყვრელ ჯგუფებსა და მომღერლებზე; და ვერ წარმოიდგენთ, რამდენჯერ გავაკვირვეთ ერთმანეთი!

გაირკვა, რომ სრულიად განსხვავებული გემოვნება გვაქვს – მათ ის სიმღერები არ მოსწონთ, რაც მე მომწონს, და – პირიქით.

დაყოფა “აღმოსავლურობის” და “დასავლურობის” მიხედვით გამოგვივიდა: მე სიმღერებს ინგლისურად ვუსმენ, ისინი – რუსულად.

ჩემი “პლეი-ლისტი” რომ ვუჩვენე, უმცროსი ბიძაშვილი, ალანი, გაოცდა: “როგორ, ტელეფონში 100 სიმღერა გაქვს, და არც ერთი – რუსულად?!”

ჩემი გულით საყვარელი ჯგუფი “One Direction” მოსმენილი აქვთ ( ამაზე წინა შეხვედრების დროს ვიზრუნე). მაგრამ, არიან გრანდის და Arctic Monkeys-ის შესახებ საერთოდ არც სმენიათ.

გაოგნებული ვიყავი. (აუცილებელი კი არ იყო, სცოდნოდათ, მაგრამ უბრალოდ მიჩვეული ვიყავი, რომ ჩემს ირგვლივ  ამ მუსიკოსების შესახებ ყველას ჰქონდა რაიმე სათქმელი).

კიდევ უფრო მეტად გამაოცა იმან, რომ არ იცოდნენ, ვინ არის ჯასტინ ბიბერი.

სამაგიეროდ, როგორც გაირკვა, თურმე არაბულ და ჩეჩნურ მუსიკას უსმენენ.  არადა, ჩემთვის  ჩეჩნური მუსიკის არსებობა (სხვათა შორის, თავად ჩეჩნეთისაც) აღმოჩენა იყო.

იგივე მოხდა, როდესაც საყვარელ ტელეგადაცემებზე დავიწყეთ ლაპარაკი.

რიჩიმ (უფროსმა ბიძაშვილმა) თქვა, რომ მხოლოდ რუსულ არხებს უყურებს. ამრეზით ჩაიფხუკუნა, როდესაც ვერც ერთი რუსული გასართობი გადაცემა ვერ დავუსახელე.

მისი თქმით, მათ სკოლაში ინგლისური ენა არცთუ მნიშვნელოვან საგნად მიაჩნიათ; გაოცებული იყო, რომ მე და ბევრ ჩემს თანაკლასელს – გვესმის და ვლაპარაკობთ კიდეც ინგლისურად.

ჩემი უმცროსი და, მარია და ალანი თანატოლები არიან. მარია პირველი კლასიდან სწავლობს ინგლისურს. ალანი მეხუთე კლასს ასრულებს და ინგლისურის სწავლა ჯერაც არ დაუწყია.

რიჩის ექიმობა უნდა. მე ინტერიერის დიზაინერობაზე ვფიქრობ. და კიდევ კარგი, როდესაც ჩვენს მომავალ პროფესიებზე ვმსჯელობთ, მაშინ მაინც არ ვფხუკუნებთ და არ გვაკვირვებს ერთმანეთის “უცნაური” მიდრეკილებები.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო