ანალენა ბერბოკი: ჩვენ გვინდა, ვნახოთ საქართველო ევროკავშირში
ანალენა ბერბოკი საქართველო ევროკავშირში შესვლაზე
“ჩვენ გვინდა, ვნახოთ საქართველო ევროკავშირში” – ეს არის მთავარი გზავნილი, რომლითაც საქართველოში ორდღიანი ოფიციალური ვიზიტით გერმანიის საგარეო საქმეთა მინისტრი, ანალენა ბერბოკი ჩამოვიდა.
ქართველი კოლეგის გარდა, ვიზიტის ფარგლებში ის შეხვდა პრემიერ-მინისტრს, პრეზიდენტს, სტუდენტებს, ოპოზიციის წარმომადგენლებს და ასევე აპირებს ჩავიდეს საოკუპაციო ხაზთან.
ანალენა ბერბოკი თბილისში 23 მარტს, საღამოს ჩამოვიდა. თბილისის აეროპორტში მისი თვითმფრინავი პრობლემურად დაჯდა – გერმანული გამოცემა The Spiegel წერს, რომ თვითმფრინავის დაჯდომას ასაფრენ ბილიკზე მყოფმა სხვა თვითმფრინავმა შეუშალა ხელი. თუმცა საქაერონავიგაციამ ეს ინფორმაცია უარყო და თქვა, რომ გერმანული ბორტი მეორე ცდაზე ტექნიკური პრობლემის გამო დაჯდა.
კიდევ ერთი მნიშვნელოვანი დეტალი – ანალენა ბერბოკს აეროპორტში მისი ქართველი კოლეგა არ დახვედრია. ილია დარჩიაშვილის ნაცვლად გერმანელ სტუმარს მისი მოადგილე, ხათუნა თოთლაძე დახვდა.
ჩამოსვლამდე რამდენიმე საათით ადრე ბერბოკმა განცხადება გაავრცელა, სადაც ვკითხულობთ, რომ არის მცდელობები, საქართველომ პროევროპულ კურსს გადაუხვიოს.
ევროპული მხარდაჭერა – პირველი პრესკონფერენცია
საგარეო საქმეთა სამინისტროში, მინისტრ ილია დარჩიაშვილთან შეხვედრის შემდეგ ერთობლივი პრესკონფერენცია გაიმართა, სადაც ანალენა ბერბოკმა საქართველოს ევროინტეგრაციის პერსპექტივაზე და “აგენტების კანონზე” ისაუბრა:
“მე მართლაც ვიყავი დიდი შთაბეჭდილების ქვეშ, თბილისის ქუჩებში ქართველი კაცები და ქალები აფრიალებდნენ ევროკავშირის დროშებს და ეს ხელს უწყობდა სამოქალაქო საზოგადოების განვითარებას. სამოქალაქო საზოგადოება არის ევროპული ღირებულებების რწმენა და სტიმული...”
მისი თქმით, ამ კანონპროექტის გაწვევის შემდეგ, საქართველოს მთავარი პოლიტიკური ამოცანაა პოლარიზაციის დაძლევა, ნდობის აღდგენა და რეფორმების სრული დამაჯერებლობით განხორციელება.
ბერბოკმა აღნიშნა, რომ ევროკავშირისკენ გზა ხელისუფლებამ და სამოქალაქო საზოგადოებამ ერთობლივად უნდა გაიარონ:
“მხოლოდ საქართველოს მთავრობა ვერ გახდება ევროკავშირის წევრი სამოქალაქო საზოგადოების გარეშე, პირიქითაც, სამოქალაქო საზოგადოება ვერ გახდება ხელისუფლების გარეშე ევროკავშირის წევრი – მხოლოდ ერთობლივად.
ეს არის ევროკავშირის მამოძრავებელი ძალა… გაერთიანების არაოფიციალური დევიზია: “ერთობა სიმრავლეში”. სამომავლოდ, გვინდა, საქართველოსთან ერთად ამის განხორციელება, ამიტომ აუცილებელია, დრო აღარ დაიკარგოს, ესაა მომენტი ისტორიაში, როცა ჩვენ უკან არ უნდა დავიხიოთ”.
გერმანელი მინისტრი ამბობს, რომ საქართველოში კონკრეტული მესიჯით ჩამოვიდა – “ჩვენ გვინდა, ვნახოთ საქართველო ევროკავშირში”.
მისი თქმით, საქართველოს ჰყავს მეგობრები ბრიუსელსა და ბერლინში, ვისი იმედიც შეიძლება, ჰქონდეს და რომლებიც “გულწრფელად დაუჭერენ მხარს ევროკავშირში გაწევრიანების გზაზე”.
თუმცა, ამისთვის ევროკავშირის მხრიდან ძალისხმევასთან ერთად, აუცილებელია რეფორმები, რომლებსაც საქართველო გაატარებს, განაცხადა გერმანელმა მინისტრმა:
“ეს გზა ვერ შემოკლდება,” – განმარტა მან.
ბერბოკის განცხადებით, მინისტრ დარჩიაშვილთან საუბრის მთავარი თემა სწორედ 12 პუნქტი იყო. მისი თქმით, საქართველოს აქვს ” საგრძნობი წინსვლა” 12 პრიორიტეტის შესრულების მხრივ:
“გაწევრიანების პროცესში აუცილებელია კანონის უზენაესობა და დემოკრატიული სტანდარტების დანერგვა, დემოკრატიის განუყოფელი ნაწილია, ასევე მოსმენა, ყურის დაგდება იმ შემთხვევაშიც კი, როცა აზრები რადიკალურად განსხვავდება, მათ შორის, საზოგადოებაში”.
ანალენა ბერბოკმა თქვა, რომ ძალიან მნიშვნელოვანია ის მხარდაჭერა, რომელსაც საქართველო უკრაინის მიმართ იჩენს:
“როცა გადაადგილდები თბილისის ქუჩებში ხედავ არამხოლოდ ევროკავშირის, არამედ უკრაინის დროშებს. მინდა მკაფიოდ განვაცხადო, რომ საქართველოს მკაფიო პოზიცია რუსული აგრესიის მიმართ უკრაინის წინააღმდეგ არის ძალიან დასაფასებელი“.
გერმანელმა მინისტრმა აგვისტოს ომზეც ისაუბრა:
“ჩვენ ვიცით რა მდგომარეობაშია საქართველო. 2008 წლის რუსული ინტერვენცია, ორი რეგიონის აღიარება, რომელიც რუსული კონტროლის ქვეშაა, ასევე ათი ათასობით რუსეთის მოქალაქე, რომელიც 2022 წლის შემდეგ ჩამოვიდა საქართველოში. ამის მიუხედავად, თქვენ ხართ უკრაინის მხარეს – ეს ხაზს უსვამს იმას, რა ღირებულებებს ეფუძნება საქართველო და რომ საქართველოს ადგილი არის ევროკავშირში“.
საქართველოს საგარეო საქმეთა მინისტრმა, ილია დარჩიაშვილმა ერთობლივ პრესკონფერენციაზე აღნიშნა, რომ საქართველოს აქვს მოლოდინი, რომ “ის პროგრესი, რომელსაც საქართველომ ევროკომისიის 12 პუნქტის შესრულებისას მიაღწია”, იქნება სამართლიანად და დამსახურებულად შეფასებული.
“ვაგრძელებთ ევროკავშირთან დაახლოებას ფართო პოლიტიკურ, ეკონომიკურ და სექტორული ინტეგრაციის პროცესის ინსტიტუციური და სამართლიანი დაახლოების გზით,” – განაცხადა დარჩიაშვილმა, რომელმაც ბერბოკს მადლობა გადაუხადა იმ კონტრიბუციისთვის, რასაც გერმანია ასრულებს საქართველოს საოკუპაციო ხაზთან ევროკავშირის სადამკვირვებლო მისიაში მონაწილეობით.
● HERITAGE FOUNDATION: ეკონომიკური თავისუფლების რეიტინგში საქართველოს მდგომარეობა გაუარესდა
● “შეიძლება ევროპა მართლაც არ არის სათქვენო” – დასავლელი პარტნიორები ღარიბაშვილის ინტერვიუს ეხმაურებიან
● საპროტესტო ბანერები – აგენტების წინააღმდეგ მიმდინარე დემონსტრაციებიდან
პირველი შეხვედრა – არასამთავრობო სექტორთან
პირველი შეხვედრა ანალენა ბერბოკმა არასამთავრობო სექტორთან გამართა. იმ ფონზე, როდესაც სულ ცოტა ხნის წინ საქართველოს ხელისუფლება ქვეყანაში “უცხოური გავლენის აგენტების” კანონის მიღებას და არასამთავრობო ორგანიზაციების “უცხოელ აგენტებად” გამოცხადებას აპირებდა, გერმანელი მინისტრის ეს გადაწყვეტილება ბევრმა არასამთავრობო სექტორის მხარდაჭერად აღიქვა.
შეხვედრა “ახალგაზრდა იურისტთა ასოციაციის” ოფისში შედგა და მას ესწრებოდნენ ამავე ორგანიზაციის თავმჯდომარე ნონა ქურდოვანიძე, “საერთაშორისო გამჭვირვალობა-საქართველოს” აღმასრულებელი დირექტორი ეკა გიგაური, “სამართლიანი არჩევნებისა და დემოკრატიის საერთაშორისო საზოგადოების” აღმასრულებელი დირექტორი ნინო დოლიძე და “დემოკრატიის კვლევის ინსტიტუტის” დირექტორი თამარ ხიდაშელი.
შეხვედრის დასრულების შემდეგ ბერბოკს კომენტარი არ გაუკეთებია.
არასამთავრობო ორგანიზაციების ხელმძღვანელებმა თქვეს, რომ გერმანელი მინისტრის ძირითადი ინტერესის საგანი იყო, თუ როგორ მიმდინარეობს იმ 12 რეკომენდაციის შესრულება, რომელიც საქართველომ ევროკავშირისგან მიიღო. საუბარი იყო მედიისა და მართლმსაჯულების მდგომარეობაზე საქართველოში. ასევე, შეხვედრაზე განიხილეს “რუსული კანონი” და ის პროცესები, რომლებიც ამ კანონის განხილვას მოჰყვა.
“მთავარი გზავნილი ჩვენი მხრიდან იყო ის, რომ შეიძლება არსებობდეს პრობლემები 12 რეკომენდაციის შესრულების მიმართულებით, მაგრამ საქართველოს და ქართველ ხალხს სჭირდება სტატუსი”, – უთხრა ჟურნალისტებს “სამართლიანი არჩევნების” აღმასრულებელმა დირექტორმა ნინო დოლიძემ.
“საერთაშორისო გამჭვირვალობა-საქართველოს” ხელმძღვანელი ეკა გიგაური ამბობს, რომ ბერბოკის საქართველოში ვიზიტის მიზანი არის მკაფიოდ და ცალსახად დაუჭიროს მხარი ქართველი ხალხის მისწრაფებას ევროპისკენ და დაეხმაროს საქართველოს ამ მიმართულებით.
“ეს შეხვედრა იყო მხარდაჭერა სამოქალაქო სექტორის მიმართ… მან მადლობა გვითხრა იმ ბრძოლისთვის, რასაც ვაკეთებთ… ზოგადად რომ ვიბრძვით ჩვენი ქვეყნის დემოკრატიული მომავლისთვის… ეს იყო საუბრის თემა. კიდევ ერთხელ ვთქვით, რომ, მიუხედავად ყველაფრისა, ქართველი ხალხი იმსახურებს კანდიდატის სტატუსს”, – განუცხადა ჟურნალისტებს “საერთაშორისო გამჭვირვალობა-საქართველოს” ხელმძღვანელმა ეკა გიგაურმა.
