რუსეთში "უცხოელ აგენტად" გამოცხადებული ანა რივინა საქართველოში არ შემოუშვეს

ანა რივინა საქართველოში არ შემოუშვეს

ფონდ “არა ძალადობას” დამფუძნებელი რუსი აქტივისტი და უფლებადამცველი ანა რივინა, რომელიც საკუთარ ქვეყანაში “უცხოელ აგენტად” არის გამოცხადებული, საქართველოში არ შემოუშვეს. ინფორმაციას თავად რუსი უფლებადამცველი გამოცემა “ხოლოდთან” ადასტურებს.

ანა რივინას მიერ დაარსებული კრიზისული ცენტრი ძალადობით დაზარალებულ ქალებს ეხმარება. 2020 წელს რუსეთის იუსტიციის სამინისტრომ რივინას ფონდი არაკომერციული ორგანიზაციების სიაში შეიტანა, რომლებიც “უცხოური აგენტების” ფუნქციას ასრულებენ.

2023 წლის 10 თებერვალს თავად რივინა გამოცხადდა “უცხოელ აგენტად”, რომელიც, რუსეთის იუსტიციის სამინისტროს ცნობით, “ავრცელებდა ნეგატიურ ინფორმაციას სახელმწიფო ორგანოების, კერძოდ, თავდაცვის სამინისტროს საქმიანობის შესახებ.

რივინა ბოლო რამდენიმე თვეა საქართველოში ცხოვრობს. როგორც უფლებადამცველი აღნიშნავს, ის საქართველოში ერევნიდან ჩამოფრინდა და მესაზღვრეების პასუხს თითქმის 3 საათის განმავლობაში ელოდებოდა, თუმცა საბოლოოდ ის ქვეყანაში არ შემოუშვეს და ის ახლა თბილისიდან დეპორტაციას ელოდება.

უფლებადამცველის თქმით, საქართველოში ჩამოსვლისას მას ადრეც აჩერებდნენ საზღვარზე რამდენიმე საათის განმავლობაში, თუმცა მოგვიანებით საზღვარზე მაინც უშვებდნენ. აღნიშნულ ფაქტთან დაკავშირებით შინაგან საქმეთა სამინისტროში განმარტებას არ აკეთებენ.

ევროპარლამენტარი ვიოლა ფონ კრამონი რუსი უფლებადამცველის საქართველოში არშემოშვებას გამოეხმაურა და განაცხადა, რომ უკრაინაში ომის დაწყებიდან პირველ 9 თვეში საქართველოს საზღვარი რუსეთის 1 274 006-მა მოქალაქემ გადმოკვეთა.

ევროპარლამენტარი Twitter-ზე წერს, რომ რივინას არშეშვების ფაქტი საქართველოს ხელისუფლებაზე ბევრს მეტყველებს.

“ომის დაწყებიდან პირველი 9 თვის განმავლობაში საქართველოს საზღვარი რუსეთის 1 274 006-მა მოქალაქემ გადაკვეთა. ბევრი მათგანი ჯერ კიდევ იქ [საქართველოში] არის. თუმცა, ადამიანის უფლებათა დამცველი, ანა რივინა, რომელიც კრემლმა ცოტა ხნის წინ უცხოელ აგენტად გამოაცხადა, ქვეყანაში არ შეუშვეს. ეს საქართველოს ხელისუფლებაზე ბევრს მეტყველებს”, – წერს ვიოლა ფონ კრამონი. 

● საქართველოში 17 000-მდე რუსული კომპანიაა და მათი უმეტესობა ომის შემდეგ დარეგისტრირდა – TI
● „თუ საზღვარს ჩაკეტავენ, ერთადერთი გზა დარჩება – გზა ომში“ . რუსეთიდან გამოქცეულების ისტორიები
● გასულ წლებთან შედარებით საქართველოს რუსეთზე ეკონომიკური დამოკიდებულება იზრდება – TI

ბოლო თვეებში, რუსეთიდან და სხვა ქვეყნებიდან კრემლის ბევრ კრიტიკოსს უთხრეს უარი საქართველოში შემოშვებაზე – მიზეზების ახსნის გარეშე. 

გასული წლის 5 სექტემბერს კრემლის კრიტიკოსი რუსი ფოტოჟურნალისტი ვასილი კრესტიანინოვი საქართველოში არ შემოუშვეს.

20 ივლისს ქვეყანაში არ შემოუშვეს რუსი ბლოგერი ალექსეი რომანოვი, რომელმაც განაცხადა, რომ ის სომხეთის გავლით საქართველოში მოდიოდა, თუმცა სადახლოს გამშვებ პუნქტზე, მას ქვეყანაში შესვლაზე უარი უთხრეს.

აღსანიშნავია, რომ 16 ივნისს საქართველომ არ შემოუშვა საზღვარზე ყაბარდო-ბალყარელი ბლოგერი, ინსა ლანდერი, რომლის წინააღმდეგ რუსეთში სისხლისსამართლებრივი დევნა მიმდინარეობს.

როდესაც ლანდერმა საზღვრის გადაკვეთა სცადა, ქართველმა მესაზღვრეებმა ის დააკავეს, კაბინეტში შეიყვანეს და ორი საათის განმავლობაში კითხავდნენ. საბოლოოდ მას მისცეს დოკუმენტი, სადაც ეწერა, რომ საზღვრის გადაკვეთაზე უარს ეუბნებოდნენ “სხვა მიზეზების გამო”.

რუსული ოპოზიციური ტელეკომპანია „დოჟდის“ ჟურნალისტმა მიხაილ ფიშმანმა 5 მარტს, საქართველოში თავისი წარუმატებელი მოგზაურობის დეტალების შესახებ ისაუბრა. ის ქვეყანაში არ შემოუშვეს და თბილისის საერთაშორისო აეროპორტიდან უკან გააბრუნეს. საზღვარზე ფიშმანს უარის მიზეზები არ განუმარტეს. 

31 იანვარს, საქართველოში არ შემოუშვეს რუსი ოპოზიციონერი დმიტრი გუდკოვი. მანამდე საქართველოში არ შემოუშვეს რუსი პოლიტიკოსი ლუბოვ სობოლი და ჟურნალისტი ილია აზარი, ასევე, უკრაინელი ჟურნალისტი დმიტრი გორდონი. 

საქართველოს საზღვრიდან უკან გააბრუნეს რუსული დამოუკიდებელი აქტივისტური მედიაჯგუფის, “მედიაზონის” ჟურნალისტი დევიდ ფრენკელიც.

გარდა ამისა, ასევე მიზეზების ყოველგვარი ახსნის გარეშე საქართველოში არ შემოუშვეს რამდენიმე რუსული ოპოზიციური პარტიის წარმომადგენელი, რომლებიც საჯარო საქმიანობას არ ეწევიან და მათი სახელები უცნობია ფართო საზოგადოებისთვის. ამასთან დაკავშირებით არანაირ კომენტარს არ აკეთებენ არც სამართალდამცავ სტრუქტურებში და არც საქართველოს მთავრობაში. 

უკანასკნელი გახმაურებული შემთხვევა კი პუტინის რეჟიმის მოწინააღმდეგე რუს მწერალს და დისიდენტს, დმიტრი ბიკოვს ეხება, რომელიც რამდენიმესაათიანი დაყოვნების შემდეგ შემოუშვეს საქართველოში. როგორც მან ტელეკომპანია “ფორმულას” უთხრა, მესაზღვრეებმა საბუთები ჩამოართვეს და 4 საათის განმავლობაში ბათუმის სასაზღვრო გამშვებ პუნქტში იმყოფებოდა.