საერთაშორისო ორგანიზაცია Amnesty International-ი ადამიანის უფლებათა მდგომარეობის შესახებ ყოველწლიურ ანგარიშს აქვეყნებს, სადაც საქართველოში არსებულ მდგომარეობაზე საუბრისას ხაზგასმულია, რომ საქართველოში კვლავ პრობლემად რჩება შერჩევითი სამართალი და ოპონენტთა პოლიტიკურად მოტივირებული დევნა.
რა წერია Amnesty International-ის ანგარიშში:
● საქართველოში კიდევ უფრო მეტად შეიზღუდა გამოხატვის თავისუფლება. საქართველოში გრძელდება შერჩევითი სამართალი და ხელისუფლების ოპონენტთა მიმართ პოლიტიკურად მოტივირებული დევნა.
● კრიტიკულად განწყობილი ჟურნალისტების მიმართ ხელისუფლების წარმომადგენლების მხრიდან მზარდ აგრესიულ რიტორიკას და ცილისწამების საქმეებს გამოხატვის თავისუფლებაზე მსუსხავი ეფექტი ჰქონდა, ასეთივე გავლენა ჰქონდა ჟურნალისტების მიმართ ჩადენილი დანაშაულების გამოუძიებლობას.
კერძოდ:
გამოხატვის თავისუფლების ქვეთავში საუბარია 2021 წლის 5 ივლისის მოძალადე ჯგუფებზე და აღნიშნულია, რომ ძალადობის ორგანიზატორები კვლავ დაუსჯელები არიან.
● სამართლიანი სასამართლოს უფლების დარღვევის მოყვანილია მიხეილ სააკაშვილის, ნიკა გვარამიას, მამუკა ხაზარაძის, ბადრი ჯაფარიძის საქმეები.
● მიუხედავად სამედიცინო ანგარიშებისა, რომლებიც მიუთითებენ მიხეილ სააკაშვილის “შესაძლო ლითონებით მოწამვლაზე” და “სიკვდილის საგრძნობლად გაზრდილ რისკზე”, თბილისის საქალაქო სასამართლომ მას სამედიცინო ნიშნებით სასჯელის გადავადებაზე უარი უთხრა.
● ქალები/გოგონები კვლავ განიცდიდნენ დისკრიმინაციას და ძალადობის მაღალ დონეს:
“იანვრიდან სექტემბრამდე მედიაში გაშუქდა მკვლელობის 14 და ქალთა მიმართ მკვლელობის მცდელობის 23 შემთხვევა, რამაც გამოიწვია შეშფოთება, რომ ფემიციდი და გენდერული ნიშნით ძალადობის სხვა ფორმები გრძელდება.”
● წამებისა და სხვა სახის არასათანადოდ მოპყრობის საქმეებზე ეფექტიანი გამოძიების არ ქონა გამოწვევად რჩება როგორც მთავრობის მიერ კონტროლირებად, ისე ოკუპირებულ ტერიტორიებზე.
2023 წლის 21 მარტს ამერიკის შეერთებული შტატების სახელმწიფო დეპარტამენტმა 2022 წელს საქართველოში ადამიანის უფლებების მდგომარეობის შესახებ ანგარიში გამოაქვეყნა. დოკუმენტში პოლიტიკური პატიმრების შესახებ სახდეპი ტელეკომპანია “მთავარის” დირექტორზე, ნიკა გვარამიაზე საუბრობს. ამასთან, აშშ-ს სახელმწიფო დეპარტამენტის ანგარიში მოიცავს წამების ან არაადამიანური, სასტიკი და დამამცირებელი მოპყრობის შესახებ ფაქტებს და ამავე ქვეთავში ექსპრეზიდენტ მიხეილ სააკაშვილის მიმართ ხელისუფლების მოპყრობაზეა საუბარი.
თეთრი სახლის მტკიცებით, “მთავრობის მარცხმა, დაესაჯა 5 ივლისის ორგანიზატორები”, ძალადობის დაუსჯელობა გამოიწვია. დოკუმენტში სერიოზულ პრობლემადაა მოხსენიებული საქართველოში სასამართლო სისტემის დამოუკიდებლობა პრობლემურ გამოძიებებთან და პოლიტიკურად მოტივირებულ დევნასთან ერთად.
დოკუმენტის ქვეთავში, რომელიც წამებას, სასტიკ, არაადამიანურ და დამამცირებელ მოპყრობას ეხება საუბარია ექსპრეზიდენტ მიხეილ სააკაშვილის დაკავების შესახებ. სახდეპი სახალხო დამცველზე დაყრდნობით წერს, რომ სააკაშვილის ჯანმრთელობის მდგომარეობა მნიშვნელოვნად გაუარესდა და ექსპრეზიდენტისთვის ექიმთა ჯგუფის 2021 წელს შემუშავებულ რეკომენდაციებთან შესაბამისი სამედიცინო დახმარების დროული გაწევა გადამწყვეტია.
სახდეპის ანგარიშზე პრემიერმა ღარიბაშვილმა განაცხადა, რომ აშშ-ის სახელმწიფო დეპარტამენტის ანგარიში მათთვის საინტერესო არ არის. პრემიერის მტკიცებით, “ანგარიში მომზადდა ე.წ. ელიტური არასამთავრობო ორგანიზაციების” მიერ მიწოდებული ინფორმაციებით, რაზეც თეთრმა სახლმა უპასუხა, რომ რომ ადამიანის უფლებათა შესახებ ყოველწლიური ანგარიშის შინაარს მხარს უჭერენ.
როგორც თეთრი სახლის პრესსამსახურში აცხადებენ, ცნობები, რომლებიც შეშფოთებას იწვევდა, ეხებოდა კანონის უზენაესობას, მათ შორის დევნას, რომელსაც ბევრი პოლიტიკურად მოტივირებულს უწოდებს
