ალენ ბერსე: საქართველოში არ ვარ ჩამოსული არჩევნების ლეგიტიმაციისთვის
ალენ ბერსეს კომენტარი
საქართველოში ვიზიტად მყოფი ევროპის საბჭოს გენერალური მდივნის, ალენ ბერსეს თქმით, ის ქვეყანაში არჩევნების ლეგიტიმაციისთვის არ ჩამოსულა. მისივე განმარტებით, უწყებებთან შეხვედრაზე, საპროტესტო აქციებზე ადმინისტრაციული წესით დაკავებული ყველა დემონსტრანტის გათავისუფლება მოითხოვა.
ევროსაბჭოს გენერალურმა მდივანმა, დღეს გამართულ პრესკონფერენციაზე ასევე განაცხადა, რომ მთავრობამ გასცა დაპირება, რომ შეცვლის “უცხოური გავლენის გამჭვირვალობის შესახებ“ კანონის შინაარსს. მისივე თქმით, კანონის ცვლილებისთვის სამუშაო ჯგუფი შეიქმნება.
გარდა ამისა, ევროპის საბჭოს გენერალურმა მდივანმა განაცხადა, რომ შეშფოთებულია ანტი-ლგბტ დისკრიმინაციული კანონით და აღნიშნა, რომ ის შეუთავსებელია სტრასბურგის სასამართლოს პრეცედენტულ საქმეებთან და ევროპულ სტანდარტებთან.
ბერსემ ხაზი გაუსვა, რომ საქართველოში იმყოფებოდა წამების საწინააღმდეგო კომიტეტი [CPT], რომელმაც შეისწავლა დემონსტრანტების მდგომარეობა დაკავების შემდეგ და მათდამი მოპყრობის პირობები და წინასწარ შეფასებას მომდევნო კვირაში წარმოადგენს.
ევროსაბჭოს გენერალური მდივანი ასევე განმარტავს, რის შესახებ ისაუბრა “ქართული ოცნების“ დამფუძნებელთან, ბიძინა ივანიშვილთან შეხვედრაზე, რომელიც 18 დეკემბერს გაიმართა.
“ეს შეხვედრა იყო იმავე ელემენტებზე, რაც ყველა სხვა შეხვედრაზე – ვითარება საქართველოში, მოვლენების განვითარება ბოლო კვირებსა და თვეებში. [ვისაუბრეთ] საქართველოს ევროპულ ოჯახში ყოლის მნიშვნელობაზე, აღებულ ვალდებულებებზე – ეს მხოლოდ სიტყვებია თუ ფაქტებიც, რაც რეალობას შეესაბამება“?.. ხაზი გავუსვი ჩვენი მხრიდან შესაძლებლობას, რომ ვიმუშავოთ ყველა წევრთან, მათ შორის საქართველოსთან, რომ მოვახდინოთ ევროპული გზის იმპლემენტირება.“ – განაცხადა ალან ბერსემ.
რა თქვა ალენ ბერსემ
“ეს არის კრიტიკული დრო საქართველოსთვის, მე აქ ვარ უპირველესად იმისათვის, რომ ჩემი მხარდაჭერა გამოვუცხადო ქართველ ხალხს, ისინი იმსახურებენ სტაბილურ და დემოკრატიულ ქვეყანაში ცხოვრებას. რადგან მე ევროსაბჭოს გენერალური მდივანი ვარ, აქ არ ვარ ჩამოსული არჩევნების ლეგიტიმაციისთვის, ეს არის სხვა კომპეტენტური ინსტიტუციების გასაკეთებელი.
ჩემი როგორც ევროსაბჭოს გენერალური მდივნის მხრიდან დიდი უპასუხისმგებლობა იქნებოდა, რომ არ ვიყო აქ, რომ არ დავდგე ხალხის გვერდით. მიმდინარე პოლიტიკური კრიზისი შეიძლება იქნას გადაჭრილი თუ დავიცავთ ფუნდამენტურ უფლებებს დემოკრატიის, ადამიანის უფლებების და კანონის უზენაესობის
უწყებებთან შეხვედრისას მე აბსოლუტურად ცხადად განვაცხადე, რომ ფუნდამენტური უფლებები, გამოხატვის, მედიის, შეკრების თავისუფლება უნდა იყოს აბსოლუტურად დაცული და მიუღებელია ამათი დარღვევა განსაკუთრებით ჟურნალისტებისა და დემონსტრანტების წინააღმდეგ.
მივმართე უწყებებს რომ პირველ რიგში თავი შეეკავებინათ არაპროპორციული ძალის გამოყენებისგან და სწრაფად განეხორციელებინათ დამოუკიდებელი და ეფექტური, გამჭვირვალე გამოძიება, გაეთავისუფლებინათ ყველა, ვინც ადმინისტრაციული წესითაა დაკავებული. მივიღე გარკვეული შეპირებები ამასთან დაკავშირებით.
მე გამოვხატე ჩემი შეშფოთება იმ კანონმდებლობის მიმართ, რომელიც აუარესებს სამოქალაქო საზოგადოების ორგანიზაციებისა და ფიზიკური პირების უფლებებს. ეს კანონმდებლობა უნდა შეიცვალოს, რათა სრულად მოვიდეს შესაბამისობაში ევროპულ სტანდარტებთან, როგორც ეს არის გაწერილი ადამიანის უფლებათა ევროპულ კონვენციაში და როგორც ამას გვეუბნება ვენეციის კომისია
მივესალმები მთავრობის გარანტიებს ე.წ. უცხოური გავლენის შესახებ კანონის შესწორების თაობაზე. ჩვენ ახლა ჩამოვაყალიბებთ საქართველოსა და ევროპის საბჭოს ექსპერტთა სამუშაო ჯგუფს, რომელშიც ჩართული იქნება ვენეციის კომისია, რათა განხორციელდეს ცვლილებები ამ კანონმდებლობაში.” – განაცხადა ბერსემ.
ევროსაბჭოს გენერალური მდივანი ალან ბერსე საქართველოში ოფიციალური ვიზიტით 18-20 დეკემბერს იმყოფებოდა. ევროსაბჭომ იმთავითვე ხაზი გაუსვა, რომ ბერსეს ვიზიტის მიზანი იმ პოლიტიკური დაძაბულობის დეესკალაციაა, რომელიც საქართველოში ბოლო კვირების განმავლობაში შეიქმნა.
საქართველოში არსებულ დაძაბულ და შეშფოთების გამომწვევ ვითარებაში ევროპის საბჭო ყველა მხარეს მოუწოდებს, თავიდან აიცილონ ნებისმიერი ესკალაცია, ხოლო ხელისუფლებას – თავი შეიკავოს ძალის არაპროპორციული გამოყენებისგან და პატივი სცეს გამოხატვის და შეკრების თავისუფლებას.
ევროსაბჭოს გენერალური მდივანი საქართველოში ვიზიტის ფარგლებში შეხვდა სამოქალაქო საზოგადოების წარმომადგენლებს. ასევე “ქართული ოცნების” პრემიერმინისტრ ირაკლი კობახიძეს, პარლამენტის თავმჯდომარე შალვა პაპუაშვილს, ომბუდსმენ ლევან იოსელიანსა და საერთაშორისო საზოგადოების წარმომადგენლებს.
თუმცა, საზოგადოებისთვის განსაკუთრებით საინტერესო იყო ბერსეს შეხვედრა “ქართული ოცნების” საპატიო თავმჯდომარესთან, ბიძინა ივანიშვილთან. შეხვედრის დეტალები უცნობია. ამის შესახებ ფრანგ დიპლომატს არ უსაუბრია.
როგორც მიმომხილველები ამბობენ, თავად ის ფაქტი, რომ ბერსე შეხვდა ადამიანს, რომელსაც არავითარი სახელმწიფო პოსტი არ უკავია, კიდევ ერთხელ ხაზს უსვამს იმას, რომ დასავლეთში კარგად ესმით, რომ სწორედ ივანიშვილი მართავს ჩრდილიდან ქვეყანას. ამის დადასტურება იყო ასევე საფრანგეთის პრეზიდენტის, ემანუელ მაკრონის სატელეფონო ზარი ბიძინა ივანიშვილთან, ამბობენ ისინი.
ბერსეს ვიზიტი საქართველოში პოლიტიკური ინტერპრეტაციების მიზეზი გახდა. “ქართული ოცნება” ევროსაბჭოს გენერალური მდივნის ვიზიტს მნიშვნელოვანს უწოდებს. მმართველი პარტია აცხადებს, რომ ამ ვიზიტით და შეხვედრებით, წერტილი დაესვა სპეკულაციებს, რომ ხელისუფლება არალეგიტიმურია.
“საერთაშორისო პოლიტიკა არ ითვალისწინებს მუდმივ დაძაბულობასა და დაპირისპირებას, მითუმეტეს მაშინ, როდესაც გაქვს არგუმენტები იმასთან დაკავშირებით, რომ არც არჩევნები გაყალბებულა და არც საგარეო კურსი იცვლება. არის გარკვეული პირობები, რომელსაც საქართველო არ დათმობს იმ ინტერესებიდან გამომდინარე, რომელიც მის ხალხს გააჩნია. რასაკვირველია, ამ დონის სტუმრის ჩამოსვლა საგანგებოდ მნიშვნელოვანია, იმ თემებზე სასაუბროდ, რომელიც არა მარტო საქართველოს, არამედ რეგიონსა და მსოფლიოს აწუხებს,” – განაცხადა პარლამენტის პირველმა ვიცე-სპიკერმა, გიორგი ვოლსკიმ.
ბერსე ბარიერ გადალახული ოთხი ოპოზიციური პარტიიდან მხოლოდ სამს შეხვდა. ალან ბერსესთან შეხვედრაზე უარი განაცხადეს ნიკა გვარამიასა და ნიკა მელიას „კოალიცია ცვლილებისთვის“ წარმომადგენლებმა.
პარტიის განცხადებით, ევროსაბჭოს გენერალური მდივნის თბილისში ვიზიტს „ქართული ოცნების” არალეგიტიმური ხელისუფლება იყენებს „პროპაგანდისტული და დეზინფორმაციული მიზნებით“.
კოალიციის უკმაყოფილება ასევე გამოიწვია იმან, რომ ბერსეს არ გამოუთქვამს სურვილი მოენახულებინა პოლიტპატიმრები.
“ევროსაბჭოს მთავარი მანდატი ადამიანის უფლებებია. პოლიტპატიმრებთან არმისვლა, ციხეში არ შესვლა ამ მომენტში მათ მეორე დიდ შეცდომად მიმაჩნია.“ – დაწერა კოალიციის ერთ-ერთმა ლიდერმა ელენე ხოშტარიამ.
