საქართველო: რატომ ალაპარაკდა მმართველი გუნდი არჩევნების შესაძლო გადატანაზე

მმართველი პარტია საპარლამენტო არჩევნების თარიღის შეცვლაზე ღიად ალაპარაკდა. საპარლამენტო უმრავლესობის წევრი და პარლამენტის ყოფილი თავმჯდომარე, ირაკლი კობახიძე აცხადებს, რომ იმ შემთხვევაში, თუ კორონავირუსის პანდემიის გავრცელების მეორე ტალღა არჩევნებამდე, ანუ 31 ოქტომბრამდე პერიოდს დაემთხვევა, საპარლამენტო არჩევნები, შესაძლოა, დეკემბერში ან იანვარში ჩატარდეს. ოპოზიცია ხელისუფლებას პოლიტიკური სპეკულაციებისგან თავის შეკავებას ურჩევს და აცხადებს, რომ ასეთი ნაბიჯის გადადგმით ქართული ოცნება კონსტიტუციას კიდევ ერთხელ დაარღვევს. 

საპარლამენტო არჩევნები საქართველოში 2020 წლის ოქტომბერში უნდა ჩატარდეს. საქართველო საპარლამენტო რესპუბლიკაა და პოლიტიკური პარტიებისთვის ამ არჩევნებს გადამწყვეტი მნიშვნელობა აქვს – ვინც მოიგებს, ის იქნება ხელისუფლებაში შემდეგი ოთხი წლის განმავლობაში.

რა შემთხვევაში შეიცვლება არჩევნების თარიღი – ხელისუფლების პოზიცია

“შეიძლება, იყოს ვითარება, როდესაც მაგალითად საარჩევნო უბნებზე პირბადეების ტარებამ და ასე შემდეგ, არ მოგვცეს არჩევნების ჩატარების საშუალება. ასეთ შემთხვევაში პასუხს იძლევა კონსტიტუცია – თუ მეორე ტალღა დადგა და დაემთხვა არჩევნებამდე პერიოდს, ამ შემთხვევაში, შეიძლება, აუცილებელი გახდეს საგანგებო მდგომარეობის გამოცხადება. ამაშიც არაფერია ტრაგიკული და თუ ეს მოხდა ოქტომბერში, ამ შემთხვევაში ოქტომბერში არ ჩატარდება არჩევნები, მაგრამ ჩატარდება პირობითად დეკემბერში“, – ამბობს კობახიძე.

• საქართველოში პოლიტიკა ბრუნდება. ისტორიული საარჩევნო შეთანხმება შეიძლება ჩაიშალოს

უმრავლესობის კიდევ ერთმა წევრმა, ვიცე-სპიკერმა გიორგი კახიანმა კონსტიტუციური ნორმა კიდევ უფრო მკაფიოდ განმარტა და აღნიშნა, რომ არჩევნების ჩატარება შესაძლებელია საგანგებო მდგომარეობის დასრულების შემდეგ, ყველაზე ადრე 45 დღეში და არაუგვიანეს 60 დღისა. 

“თუ ასეთი განვითარება იქნება, ეს ნიშნავს იმას, რომ შესაძლებელია არჩევნებმა გადაიწიოს დეკემბრისთვის ან თუნდაც იანვრისთვის“, – ამბობს ის. 

კორონავირუსის გავრცელების სურათი საქართველოში და ეპიდემიოლოგების პროგნოზი

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული. 

ეპიდემიოლოგების შეფასებით, კორონავირუსის გავრცელების მასშტაბი ახლა საგანგაშო არ არის. 16  ივნისის მონაცემებით, საქართველოში კორონავირუსით ინფიცირების 879 შემთხვევაა დადასტურებული და 14  ადამიანი გარდაიცვალა. 

დაავადებათა კონტროლის ეროვნული ცენტრის დირექტორი, ამირან გამყრელიძე ამბობს, რომ ოქტომბერში საქართველოში გრიპის სეზონიც იწყება და თუ მას კორონავირუსის გავრცელების მეორე ტალღაც დაემთხვევა, ამან, შესაძლოა არჩევნების ჩატარებაზე მოახდინოს გავლენა.

„თუ ეპიდსიტუაცია ისეთივე იქნება, როგორც ახლაა და შემოდგომაზე ახლა არსებულ ვითარებას შევინარჩუნებთ, არჩევნებთან დაკავშირებით პრობლემა არ იქნება. თუ ეპიდსიტუაცია არსებულზე უარესი იქნება, როგორც ახლა სამხრეთ ამერიკაშია, მაშინ პოლიტიკურმა პარტიებმა უნდა განიხილონ ეს საკითხი და გადაწყვეტილება მიიღონ შემდგომ ზომებზე,“ – ამბობს გამყრელიძე.

ოპოზიცია – არჩევნების გადადებისთვის ობიექტური საფუძველი არ არსებობს

მმართველი პარტიის ყოფილი წევრი და ამჟამად პარლამენტის დამოუკიდებელი დეპუტატი თამარ ჩუგოშვილი დარწმუნებულია, რომ მის ყოფილ თანაგუნდელებს, საარჩევნო თარიღის შეცვლის თაობაზე საუბარი შემთხვევით არ დაუწყიათ და სავარაუდოდ, მმართველ პარტიას  საკონსტიტუციო ცვლილებებში ახალი, აქამდე შეუთანხმებელი ცვლილების შეტანა უნდა. 

ჩუგოშვილი აცხადებს, რომ თუ მისი ვარაუდი გამართლდება, 8 მარტის შეთანხმება საფრთხის ქვეშ დადგება, რადგან საერთაშორისო პარტნიორებთან მოლაპარაკების დროს მსგავსი შესაძლებლობა განხილული არ ყოფილა.

• რაზე შეთანხმდნენ 8 მარტს ოპოზიცია და ხელისუფლება. რას ნიშნავს მოდელი 120/30?

“8 მარტის შეთანხმებაში ყველა საკითხი, რომელთაც ფარავს საკონსტიტუციო ცვლილებები, დეტალურად არის განსაზღვრული. ამ სიას არც არაფერი უნდა დაემატოს და არც არაფერი მოაკლდეს. ჯერ არ ჩანს, რატომ დაიწყო ეს დისკუსია, მაგრამ ფაქტია, რომ რაღაც ახალი ტურბულენტობა გველის წინ,” – აცხადებს დამოუკიდებელი დეპუტატი. 

ჩუგოშვილი ფიქრობს, რომ მაშინ, როცა საკონსტიტუციო ცვლილებების საპარლამენტო განხილვამდე სულ რამდენიმე დღეა დარჩენილი, დისკუსიაში ახალი საკითხის შემოტანა ამ ცვლილებების მიღებას შეუძლებელს გახდის: 

“არჩევნების ფიქსირებული თარიღის შეცვლა ან შეცვლის მცდელობა არის დამატებით სერიოზული პრობლემა როგორც საკონსტიტუციო ცვლილებებისთვის, ისე არჩევნებისთვის და არჩევნების ლეგიტიმურობისთვის. ამიტომ უკეთესი იქნება, თუ ამ თემაზე უმრავლესობა სპეკულაციებს შეეშვება,” – ამბობს ის.

„ახალი საქართველოს“ ლიდერი, გიორგი ვაშაძე აცხადებს, რომ „ქართულ ოცნებას“ სურს, არჩევნების თარიღი საკუთარ რეიტინგს მოარგოს და არჩევნები მაშინ ჩაატაროს, როცა მოსახლეობის უფრო დიდი მხარდაჭერა ექნება. სწორედ ამისთვის შეიმუშავა მან სათადარიგო გეგმა და სათანადო ბერკეტიც აქვს: საჭიროების შემთხვევაში კორონავირუსზე უფრო  მეტ ადამიანს გამოიკვლევს და მეტ ინფიცირებულსაც გამოავლენს.

„თუ ოქტომბრის ბოლოსთვის მათ მძიმე რეიტინგული პოლიტიკური მდგომარეობა ექნებათ, ისინი შეეცდებიან არჩევნები გადაიტანონ დეკემბრის ბოლოსთვის. პირდაპირ ვამბობ, ეს არის ცეცხლთან თამაში, ეს არის თამაში ადამიანების ნერვებზე, შიმშილზე, გაჭირვებაზე, რომელიც ჩვენს მოსახლეობას აწუხებს. აქედან გამომდინარე, ჩვენ კიდევ ერთხელ ვამბობთ, დღეს არანაირი ვითარება და გარემოება არ არის იმის, რომ არჩევნები გადაიდოს“, – ამბობს ვაშაძე.

ევროპული საქართველოს ერთ-ერთი ლიდერი, გიგა ბოკერიაც მიიჩნევს, რომ არჩევნების გადადების წინაპირობა ახლა არ არსებობს. 

“გაუგებარია, რატომ დაიწყეს ახლა ამაზე საუბარი. არჩევნების თარიღის რეალური საფუძვლის გარეშე გადაწევა არის ძალაუფლების უზურპაცია. თუკი ივანიშვილი ან მისი გარემოცვა რაიმე არარეალური საბაბით დააპირებენ ძალაუფლების უზურპაციას, ეს მათ არათუ ვერ გადაარჩენს, არამედ ბოლომდე დაღუპავს,“ – აცხადებს ის.