ორმა ოპოზიციურმა პარტიამ დააფუძნა ახალი პოლიტიკური პლატფორმა. გაერთიანებაში არიან ახალი სახეებიც
ახალი პოლიტიკური პლატფორმა
„ერთიანმა ნაციონალურმა მოძრაობამ“ და “სტრატეგია აღმაშენებელმა“ წარადგინეს ახალი პოლიტიკური პლატფორმა “ერთიანობა საქართველოს გადარჩენისთვის”. ეს ორი პარტია არჩევნებში ამ პლატფორმით გავა.
პლატფორმის საარჩევნო ნომერი იქნება იგივე, რაც ჰქონდა პარტია “ერთიან ნაციონალურ მოძრაობას”, ნომერი – 5.
პლატფორმის შესახებ “ერთიანი ნაციონალური მოძრაობის” ყრილობაზე პარტიის თავმჯდომარემ, თინა ბოკუჩავამ ისაუბრა. მან პლატფორმის ახალი სახეებიც წარადგინა.
ესენი არიან:
- გია ჯაფარიძე – ყოფილი დიპლომატი, პროფესორი, პოლიტოლოგი;
- სოფო ჯაფარიძე – ენმ-ს წევრი, ყოფილი პრეზიდენტის მიხეილ სააკაშვილის წარმომადგენელი;
- ლაშა ბაქრაძე – ისტორიკოსი;
- ანა მოსაძე – სამოქალაქო აქტივისტი;
- თამარ კორძაია – პარლამენტის დამოუკიდებელი დეპუტატი;
- არმაზ ახვლედიანი – პარლამენტის დამოუკიდებელი დეპუტატი;
- გიორგი ვაშაძე – პარტია “სტრატეგია აღმაშენებლის” ხელმძღვანელი;
- ირაკლი ფავლენიშვილი – პარტია “ერთიანი ნაციონალური მოძრაობის” წევრი;
- ლაშა დიაროვი – სამოქალქო აქტივისტი.
ყრილობის პრეზენტაციაზე თინა ბოკუჩავამ თქვა, რომ 26 ოქტომბერი რეფერენდუმის ტოლფასია, ამიტომ, ახლა დანაწევრების, დაპირისპირების, ამბიციების ან ეგოების ჭიდილის დრო არ არის:
“თუ სხვა პარტიებმა ამ ეტაპისთვის ვერ შეძლეს გაერთიანება, გავერთიანდეთ ჩვენ, პოლიტიკოსებთან, საზოგადოებრივად აქტიურ პირებთან, სამოქალაქო ორგანიზაციებთან და, რაც მთავარია, ახალგაზრდებთან, რომელთაც ყველაზე უკეთ დაგვანახეს ერთიანობის ძალა. ახალგაზრდებმა დაგვიბრუნეს გამარჯვების რწმენა“, – თქვა თინა ბოკუჩავამ.
პარტიის ახალმა სახეებმა, ვინც ამ დრომდე არ ყოფილა არცერთი პოლიტიკური პარტიის წევრი [გია ჯაფარიძე, ლაშა ბაქრაძე], სიტყვით გამოსვლისას აღნიშნეს, რომ ისინი შეუერთდნენ ერთიანობას და არა რომელიმე პარტიას.
“ეს არჩევნები წყვეტს, საქართველო საერთოდ დარჩება როგორც თავისუფალი ქვეყანა თუ არ დარჩება. ჩვენ ვერთიანდებით იმიტომ, რომ გაიმარჯვოს საქართველოს ყველა მოქალაქემ“, – თქვა პლატფორმის ახალმა წევრმა გია ჯაფარიძემ.
„აღარ არის იმის დრო, რომ გავიპრანჭოთ, უნდა გაკეთდეს ახლა საქმე. არაა აუცილებელი, რომ ყველა გაერთიანდეს და ვხედავთ კიდეც, რომ ვერ ერთიანდებიან, მაგრამ ერთი მიზანი უნდა გვქონდეს ყველას, რომლის გარშემოც შევიკრიბებით და ვიბრძოლებთ“, – უთხრა ისტორიკოსმა ლაშა ბაქრაძემ “ნეტგაზეთს”.
ის ამბობს, რომ არც ეს გადაწყვეტილება და არც 5 ნომრის ქვეშ გაერთიანება არ იყო ადვილი
“მაგრამ ადამიანების ამ ჯგუფს უნდა დიდი ერთობა, რომ გამარჯვებულები გამოვიდეთ ამ დიდი, ძალიან რთული და ძალიან არათავისუფალი არჩევნებიდან. საქართველო დავაყენოთ ისევ სწორ გზაზე და შევქმნათ უფრო თავისუფალი, დემოკრატიული, თანასწორუფლებიანი ქვეყანა, ვიდრე ეს აქამდე ყოფილა“, – ამბობს იგი.
ოქტომბრის საპარლამენტო არჩევნებამდე ოთხ თვეზე ცოტა ნაკლებია დარჩენილი. მარტის აქციებისა და საფეხბურთო ციებ-ცხელების შემდეგ, ქვეყანა ნელ-ნელა არჩევნების თემას უბრუნდება.
26 ოქტომბრის საპარლამენტო არჩევნებში აკრძალულია საარჩევნო ბლოკის შექმნა. ამიტომ, პარტიებმა სხვა გადაწყვეტილებები უნდა მოძებნონ. ისინი უნდა შეთანხმდნენ რა კონფიგურაციით გავლენ ოქტომბრის არჩევნებში, რამდენი პოლიტიკური ცენტრი იქნება, ვინ ვისთან გაერთიანდება, ან, არ გაერთიანდება.
საპარლამენტო არჩევნები საქართველოში 2024 წლის 26 ოქტომბერს უნდა გაიმართოს. წინასაარჩევნო კამპანია”, “ქართულმა ოცნებამ”, არაოფიციალურად უკვე დაიწყო. პარტიის მიზანია, მეოთხე ვადით დარჩეს ხელისუფლებაში.
ოპოზიცია და სამოქალაქო სექტორი მიიჩნევს, რომ ეს არჩევნები რეფერენდუმის ტოლფასია. რადგან, ამ არჩევნებმა უნდა გადაწყვიტოს, საით წავა საქართველო, საბოლოოდ ჩამოშორდება ცივილიზებულ დასავლეთს თუ გამოიყენებს იმ ისტორიულ შესაძლებლობებს, რაც ახლა ამ გზაზე არსებობს.
ახალი პოლიტიკური პლატფორმა
