ანატოლი ბიბილოვი: ოსი ხალხი მსოფლიო თანამეგობრობისგან სიმართლეს ითხოვს
7-8 აგვისტოს ცხინვალში აღინიშნება ომის 12 წლისთავი, რომელშიც საქართველო და რუსეთი მონაწილეობდნენ. ის ისტორიაში შევიდა, როგორც „აგვისტოს ხუთდღიანი ომი“.
ქართული მხრიდან ეს ომი კვალიფიცირდება, როგორც რუსული რეგულარული ჯარების შემოჭრა, რომელსაც საომარი მოქმედებები მოჰყვა.
ოსური მხრიდან კი ომი საქართველოს შეიარაღებულ აგრესიად ფასდება.
2008 წლის აგვისტოს ომში, ოსური მხრიდან 365 სამხედრო და მოქალაქე დაიღუპა, ქართული მხრიდან – 412 სამხედრო და მოქალაქე.
რუსეთის ოფიციალური მონაცემებით, ასევე, დაიღუპა 67 რუსი სამხედრო.
სამხრეთ ოსეთის ტერიტორიაზე მდებარე ქართული სოფლების, დაახლოებით, 20 ათასი მცხოვრები იძულებით გადაადგილებულად იქცა.
ქართულმა მხარემ კონტროლი დაკარგა ტერიტორიაზე, სადაც 125 სოფელი იყო.
სამხრეთი ოსეთი და აფხაზეთი რუსეთმა დამოუკიდებელ სახელმწიფოებად აღიარა.
აქ მოცემულია 2008 წლის აგვისტოს მოვლენების ქრონიკა, რომელიც ჩვენ შევაგროვეთ ისე, რომ სკრუპულოზურად მივყვებოდით ორივე მხარის მონაცემებსა და საერთაშორისო გამოძიებების დასკვნებს.
აქ არის ნაამბობი თბილისიდან იმაზე, თუ როგორ აღნიშნეს ომის მე-12 წლისთავი.
საქართველოს პრემიერ-მინისტრმა განაცხადა, რომ „ქვეყანა არ მოითმენს ოკუპაციას, მაგრამ მშვიდობიანი გზით მოაგვარებს პრობლემას“. გიორგი გახარიამ ასევე ისაუბრა „წარსულის შეცდომებზე“, მაგრამ არ დაუკონკრეტებია, თუ რას გულისხმობდა.
• ქართულ-ოსური კონფლიქტის შესახებ
როგორ აღნიშნეს აგვისტოს ომის 12 წლისთავი ცხინვალსა და ვლადიკავკაზში
საინფორმაციო სააგენტო РЕС-ის ცნობით, საზოგადოების წარმომადგენლებმა და სამხრეთ ოსეთის ხელმძღვანელობამ, მათ შორის, ანატოლი ბიბილოვმა ყვავილების გვირგვინები მიიტანეს რუსი სამშვიდობოების დაცხრილულ ყაზარმებთან, რომელიც ცხინვალის სამხრეთ გარეუბანში – საქართველოს საზღვართან ახლოს მდებარეობს.
დაღუპულთა ხსოვნისადმი პატივის მისაგებად იარაღებიდან გაისროლეს, ისმოდა სამგლოვიარო მუსიკა.
ასევე, ყვავილებით შეამკეს „დამსხვრეული გულის ამონაკვნესი“, რომელიც ასახავს გაგლეჯილ გულს, საიდანაც სისხლიანი ცრემლი წვეთავს.
მონუმენტი დგას „დამწვარი სულების მუზეუმში“, სოფელ ტბეთში, ზარის გზის შესასვლელთან. ეს 2008 წლის აგვისტოში, ცხინვალიდან რუსეთისკენ ერთადერთი გზა იყო, იქ სროლაში მოყვნენ ადამიანები, რომლებიც დაბომბვის დროს ქალაქიდან გასვლას ცდილობდნენ.
მუზეუმი ღია ცის ქვეშ არის განთავსებული და განადგურებული ავტომობილებისგან გაკეთებული წრეა.
აქვე, 2008 წლის აგვისტოს შემდეგ, დადგეს „გლოვის ხის“ მონუმენტი.
მუზეუმში სამახსოვრო მსახურება გაიმართა დაღუპულთა სულების მოსახსენებლად, ადამიანებმა სანთლები დაანთეს.
„მსოფლიო საზოგადოებამ უნდა აღიაროს ქართული მხარის მიერ ოსი ხალხის გენოციდის ფაქტი“, – განაცხადა ე.წ. სამხრეთ ოსეთის პრეზიდენტმა, ანატოლი ბიბილოვმა.
„ჩვენ ვითხოვთ სამართლიანობასა და იმ ადამიანების დასჯას, რომლებიც დამნაშავეები არიან 1989 და 2008 წლებში უამრავი ადამიანის სიკვდილში. (…) ვფიქრობ, რომ ადამიანები დასავლეთში თვალებს გაახელენ და დასჯიან სამხრეთ ოსეთის ტრაგედიაში დამნაშავეებს.
ჩვენ ვითხოვთ, რომ მოგვცენ გაეროში, ეუთოსა და ევროკავშირში სიტყვით გამოსვლის უფლება, რომ მოვუყვეთ მათ სიმართლე“.
ცხინვალში გაიმართა აქცია „გენოციდის ფურცელი“. დიდ ეკრანზე აჩვენებდნენ დოკუმენტურ ფილმებს ოსი ხალხის გენოციდის შესახებ და ომის კადრებს.
დიდი ასოებით გაკეთდა წარწერა „გენოციდი 1920-2020“, რომელიც სიბნელეში, აქციის დროს, ანათებდა მოედანს.
ვლადიკავკაზი
მემორიალური აქცია, სახელწოდებით „ხსოვნის სანთლები“ გაიმართა ასევე ვლადიკავკაზში, თეატრის წინ არსებულ მოედანზე
(ჩრდილოეთი ოსეთი, რუსეთის ფედერაცია).
აქ დალაგებული სანთლებით გაკეთებული იყო წარწერა: „08.08.2008. გვახსოვს“.
შეკრებილებმა წუთიერი დუმილით პატივი მიაგეს 2008 წლის აგვისტოს ტრაგიკული მოვლენების მსხვერპლთა ხსოვნას.
