აფხაზეთში საპროტესტო ამომრჩეველი სუვერენიტეტის იდეის გარშემო ერთიანდება

აფხაზეთის პოლიტიკოსები სუვერენიტეტისათვის

აფხაზეთში ახალი „ფართო პოლიტიკური პლატფორმის“ შექმნის შესახებ განაცხადეს. პლატფორმა დააარსეს ახალგაზრდა აქტივისტებმა სხვადასხვა პოლიტიკური და საზოგადოებრივი ორგანიზაციებიდან, რომლებიც ეწინააღმდეგებიან ერთდროულად სამ პროექტს:

● ბიჭვინთაში სახელმწიფო აგარაკისა და 184 ჰექტარი მიწის ნაკვეთის რუსეთისთვის გადაცემა;
● ენერგეტიკული ინდუსტრიის მიყიდვა უცხოურ (რუსულ) კომპანიებზე;
● აფხაზეთის მოქალაქეების “უცხოელ აგენტებად” გამოცხადების კანონის მიღება.

ამრიგად, ექსპერტების თქმით, აფხაზეთში საპროტესტო ამომრჩეველი ერთიანდება სუვერენიტეტის იდეის გარშემო.

ახალ პლატფორმას ჯერ არ აქვს სახელი და არც მომავალში აპირებს ლეგალურად, ცალკე პოლიტიკურ ორგანიზაციად ჩამოყალიბებას. ჯერ-ჯერობით ჯგუფი პოზიციონირებს როგორც პლატფორმა, რომელიც მზადაა გააერთიანოს ხალხი აფხაზეთის სუვერენიტეტის შენარჩუნებისა და განმტკიცების მიზნით.

„არსებობს განცდა, რომ მმართველმა პოლიტიკურმა კლასმა დაკარგა რწმენა აფხაზეთის სახელმწიფოს მიზანშეწონილობის მიმართ და აპირებს მის არსებობას მხოლოდ ფორმალურად შეუწყოს ხელი და გაყიდოს საჯარო ქონება. მთელი პასუხისმგებლობით ვაცხადებთ: არ დავუშვებთ ასეთი გეგმის განხორციელებას!

ჩვენ კატეგორიულად არ ვეთანხმებით თეზისს ჩვენი ხალხის პრობლემების გადაჭრის უუნარობის შესახებ და დარწმუნებულნი ვართ, რომ ადამიანებს, რომლებიც ამგვარ მიდგომებსა და შეხედულებებს ავრცელებენ, არ აქვთ მორალური უფლება მართონ ქვეყანა, რომლის ხალხისაც არ სჯერათ.“

• „საბჭოთა წარსულის ნოსტალგია“ – რატომ მიდის აფხაზეთის ხელისუფლება საზოგადოების წინააღმდეგ. მოსაზრება
• რუსეთი მუქარით ცდილობს წაართვას აფხაზეთს ბიჭვინთის ნაწილი, თბილისი კი დუმს. რატომ?
• თბილი საბანი და ცირკი სახლში – როგორ გადააქვთ აფხაზეთის მცხოვრებლებს უშუქობა

პლატფორმის პირველ შეხვედრას ესწრებოდნენ არა მხოლოდ სხვადასხვა პოლიტიკური ორგანიზაციის წარმომადგენლები, არამედ ისინიც, რომლებიც პოლიტიკას ჩამოშორდნენ, მაგრამ ამავდროულად აქტიურად საუბრობენ გარკვეულ სოციალურ პრობლემებზე. კერძოდ, ახალგაზრდული ორგანიზაცია „HARA HPITSUNDA“ (“ჩვენი პიცუნდა”), რომელიც ამ ზაფხულს შეიქმნა ბიჭვინთაში მდებარე სახელმწიფო აგარაკის რუსეთისთვის გადაცემის წინააღმდეგ პროტესტის ნიშნად.

„გვინდა განვაცხადოთ, რომ ჩვენი ხელმძღვანელობა უკვე ღიად, საჯაროდ აცხადებს, რომ აფხაზეთის მოსახლეობას არ შეუძლია საკუთარი სუვერენიტეტის შენარჩუნება და ამიტომ უნდა გაანიავოს თავისი ბუნებრივი, ტერიტორიული, ენერგეტიკული და სხვა აქტივები. ასე აღვიქვამთ ხელისუფლების შეთანხმებებს ბიჭვინთის ტერიტორიის ნაწილის უცხოელების საკუთრებაში გადაცემის შესახებ, საკანონმდებლო ინიციატივებს ქვეყნის ენერგოსისტემის გასხვისების შესახებ, აფხაზეთის მოქალაქეების უცხო ქვეყნის აგენტებად გამოცხადების შესახებ, ანტისახალხო კანონების იმპლემენტაციას, ჩვენს სრულ არარსებობას: დღის წესრიგი საგარეო პოლიტიკაში, დემოგრაფიაში, რეპატრიაციის პროცესის ფაქტობრივად შეჩერება, ჯარში არსებული რეალური მდგომარეობის იგნორირება“, – ნათქვამია მანიფესტში.

„ჩვენ უნდა დავისახოთ ამბიციური მიზნები და არ დავიმარხოთ რესურსების წვრილმან კონკურენციაში. და მჯერა, რომ დადგება დღე, როცა აფხაზეთის წარმომადგენელი გაეროს გენერალურ ასამბლეაზე სიტყვით გამოვა“, – ამბობს პლატფორმის ერთ-ერთი ორგანიზატორი, “აინარის” პარტიის წარმომადგენელი ადგურ ლაგვილავა.

პლატფორმა აცხადებს, რომ არ აპირებს ლეგალურად, ცალკე პოლიტიკურ ორგანიზაციად ჩამოყალიბებას. თუმცა, შესაძლოა, მომავალში რამე შეიცვალოს.

კომენტარი

ინალ ხაშიგი, JAMnews-ის რედაქტორი აფხაზეთში/გაზეთ „ჩეგემსკაია პრავდას“ რედაქტორი

„ტრადიციამ, როდესაც პოლიტიკური ორგანიზაცია ყალიბდება არა იდეების საფუძველზე, არამედ კონკრეტული ადამიანის გარშემო, პრაქტიკულად ამოწურა თავის თავი. ეს არის სისტემური კრიზისის მიზეზი, რომელსაც აფხაზეთი მრავალი წელია განიცდის. ამიტომ, სუვერენიტეტის შენარჩუნებისა და განმტკიცების იდეის საფუძველზე სხვადასხვა ძალების გაერთიანება საკმაოდ პერსპექტიული წამოწყებაა.

შესაძლებელია აფხაზეთის პოლიტიკურ ასპარეზზე სრულიად კონკურენტუნარიანი „მესამე ძალა“ გამოჩნდეს. პლატფორმის ორგანიზატორები არიან ახალგაზრდები, რომლებსაც არ აქვთ პოლიტიკური ამბიციები. ისინი არ აკეთებენ ნაჩქარევ განცხადებებს, რადგან, ალბათ, ითვალისწინებენ იმ ფაქტს, რომ ბოლო ათი წლის განმავლობაში მსგავსი წარუმატებელი მცდელობები უკვე რამდენიმე იყო.”

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო