აფხაზეთში, კორონავირუსის აფეთქებაა მას შემდეგ, რაც იქ რუსი ტურისტები ჩავიდნენ

აფხაზეთის ჯანდაცვის სამინისტრომ დახმარების თხოვნით ღია განცხადება გააკეთა, რადგან კორონავირუსის ინფექციის მკვეთრი აფეთქება დაიწყო მას შემდეგ, რაც იქ რუსი ტურისტები ჩავიდნენ.

მხოლოდ ერთ დღეს, 16 აგვისტოს, აფხაზეთში, COVID-19-ით ინფიცირების 26 შემთხვევა გამოვლინდა, რაც სამჯერ მეტია დღე-ღამის წინა „სარეკორდო მაჩვენებელზე“. სულ, 17 აგვისტოსთვის, აფხაზეთში, კორონავირუსით დაინფიცირდა 189 ადამიანი. მათგან სამი პაციენტი გარდაიცვალა, გამოჯანმრთელდა – 69.

• აფხაზი ექიმები შიშობენ, რომ ჯანდაცვის სისტემა რუსეთთან საზღვრის გახსნას ვერ გაუძლებს

• „იმედი გვაქვს, რომ ტურისტები ჩამოვლენ“ – აფხაზეთში კარანტინის დასრულებასა და ფულის შოვნას ელოდებიან. ვიდეო

• მოსაზრება: აფხაზეთის ეკონომიკას ძნელბედობის ჟამი დაუდგა

აფხაზეთმა რუსეთთან ე.წ. საზღვარი 1 აგვისტოს გახსნა. გადაწყვეტილება საკმაოდ მოულოდნელად მიიღეს მოსახლეობის პროტესტის საწყის ეტაპზე, რომლებიც რუსეთთან საზღვრის გახსნას ითხოვდნენ.

რუსეთიდან შემოსული ტურისტები ადგილობრივების უმრავლესობისთვის შემოსავლის ძირითადი წყაროა, ისევე, როგორც აფხაზეთის ბიუჯეტისთვის.

საზღვარი ყველანაირი შეზღუდვების გარეშე გაიხსნა, კორონავირუსის არქონის შესახებ უბრალო ცნობაც კი არ არის საჭირო. და მხოლოდ პირველი სამი დღის განმავლობაში, იქ 30 ათასზე მეტი რუსი ტურისტი შევიდა.

ოფიციალური მონაცემებით, 17 აგვისტოსთვის, რუსეთიდან დასასვენებლად ჩავიდა, დაახლოებით, ნახევარი მილიონი ტურისტი.

საჭიროა მოხალისეები, ექიმები ინფიცირებულების ნაკადს ვერ უმკლავდებიან

ჯანდაცვის სამინისტრომ აფხაზეთის ყველა მცხოვრებს თხოვნით მიმართა და მოხალისედ მუშაობისკენ მოუწოდა გუდაუთის საავადმყოფოში, სადაც კორონავირუსით ინფიცირებულებს მკურნალობენ.

„პანდემიის დაწყებიდან, მედიკოსები გაძლიერებულ რეჟიმში მუშაობენ, იღლებიან და ავადდებიან. პერსონალი უბრალოდ არ გვყოფნის, რადგან ძალიან გაიზარდა ინფიცირებული თანამოქალაქეების რაოდენობა. გუდაუთის კოვიდ-კლინიკაში, უმცროსი სამედიცინო პერსონალის დეფიციტია, კერძოდ, სანიტრების“, – ნათქვამია ჯანდაცვის სამინისტროს მიმართვაში.

ექიმების გათავისუფლება „პანიკიორობის“ გამო

„სამწუხაროა, მაგრამ საავადმყოფოს მთელი მუშაობის განმავლობაში, ყველაზე ხშირად ისმის კრიტიკა, საყვედურები და ბრალდებები. სამედიცინო პერსონალს დახმარება ცოტა ვინმემ თუ შესთავაზა. ის კი რეალურად არის საჭირო – პერსონალი იღლება“, – ჯანდაცვის სამინისტრო საზოგადოებისგან ყურადღებას ითხოვს.

აფხაზეთში, ექიმები ყველას აფრთხილებდნენ იმის შესახებ, რომ საზღვრის უკონტროლო გახსნა, ინფიცირების ზრდას გამოიწვევდა.

ჯანდაცვის მინისტრის მოადგილემ, ალხაზ კონჯარიამ განაცხადა, რომ „საზღვრების გახსნის შემთხვევაში, ჯანდაცვის სისტემა დაიხრჩობოდა“ და მას მხარი ბევრმა მედიკოსმა დაუჭირა.

შიშის ერთ-ერთი მთავარი მიზეზი სწორედ სამედიცინო პერსონალის დეფიციტი იყო. აფხაზეთში რეანიმატოლოგების, ინფექციონისტებისა და თერაპევტების შეზღუდული რაოდენობაა. ექიმები ამბობდნენ, რომ დაავადებულთა რაოდენობის მასობრივი მატების შემთხვევაში, მკურნალობას ვეღარავინ მოახერხებდა.

თუმცა, პრემიერ-მინისტრმა ალექსანდრ ანქვაბმა მწვავედ გააკრიტიკა ექიმების განცხადება, მათ „პანიკიორები“ უწოდა და სამსახურის დატოვება შესთავაზა.

მინისტრის მოადგილე ალხას კონჯარია კი, რომელიც განცხადებით გამოვიდა, სამსახურიდან გაათავისუფლეს.

კორონავირუსის ახალი აფეთქების შესახებ შიში კიდევ ერთხელ გამოითქვა ოპერატიული შტაბის შეხვედრაზე, რომელშიც ადგილობრივი საავადმყოფოების მთავარი ექიმები მონაწილეობდნენ და რომელიც უკვე საზღვრის გახსნის შემდეგ გაიმართა.

„ჩვენთან, ჯერ კიდევ საზღვრის გახსნამდე მოხდა აფეთქება და გუდაუთის საავადმყოფო შევსებას იწყებს. ყოველდღიურად, ინფიცირების 8-10 შემთხვევას ვავლენთ და უკვე ამ ეტაპზე გვესმის, რომ დაავადებულთა ასეთ ნაკადთან გამკლავება ძალიან რთული იქნება“.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.

ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო