აფხაზეთში ოპოზიცია გენერალური პროკურატურის რეაქციას შიდა პოლიტიკურ ბრძოლაში ჯარის ჩართვის გამო ითხოვს, რადგან სწორედ ჯარისკაცები და სამხედრო ტექნიკა გამოიყენეს 30 მაისს ოპოზიციის მიტინგის დროს პრეზიდენტის სასახლის შემოღობვისთვის. მსგავსი რამ აფხაზეთის კანონმდებლობით აკრძალულია.
რამდენიმე ოპოზიციურმა ორგანიზაციამ გენერალურ პროკურატურას შემოწმების მოთხოვნით მიმართა. ისინი ასევე სთხოვენ პარლამენტს, გაიმართოს თავდაცვის მინისტრის, ვლადიმირ ანუას მიერ სამსახურებრივი უფლებამოსილების გადამეტების შესახებ ღია მოსმენები.
მომხდართან დაკავშირებით გენერალურ პროკურატურას შეფასება ჯერ არ გაუკეთებია, მაგრამ, იქიდან გამომდინარე, რომ ყველა წინა მსგავს მიმართვაზე მათ უპასუხეს, რომ „კანონდარღვევა არ არის“, ოპოზიციას არც ამჯერად აქვს იმედი.
თუმცა, ოპოზიციის ლიდერი ადგურ არძინბა პროკურატურისთვის მიმართვას უშედეგოდ მაინც არ განიხილავს.
„აფხაზეთის ისტორია დღეს არ მთავრდება. რასაც ახლა ვაკეთებთ, არის საფუძველი იმისა, რომ მომავალში ჩინოვნიკები პასუხისმგებელნი იყვნენ თავიანთ ქმედებებზე. დროთა განმავლობაში ეს ყველაფერი გახდება ბრალდების საფუძველი – თუ გენერალური პროკურორი არ უპასუხებს, თუ თავდაცვის მინისტრი კანონს დაარღვევს, ნებისმიერ შემთხვევაში პასუხისმგებლობა დადგება, მაგრამ არა ახლა ან ორ წელიწადში. ჩვენ უნდა დავასრულოთ დაუსჯელობა.” – განაცხადა ადგურ არძინბამ ტელეგრამ-არხთან ინტერვიუში.
