"აფხაზეთს არ სჭირდება ჩრდილოეთ კორეის კანონები" - რატომ არ დაეთანხმა პარლამენტი სპეცსამსახურებს

აფხაზეთის სპეცსამსახურებს დამატებითი უფლებები არ მიუღიათ

წინადადება სახელმწიფო უსაფრთხოების სამსახურს დამატებითი უფლებამოსილების მინიჭებისა და კანონში შესაბამისი ცვლილებების შეტანის შესახებ პრეზიდენტის ინიციატივით აფხაზეთის სახალხო კრებას წარედგინა. თუმცა, პარლამენტმა ხმების უმრავლესობით (16 წინააღმდეგი, ხუთმა თავი შეიკავა, ორმა მხარი დაუჭირა) უარყო პროექტი.

იდეა მდგომარეობდა იმაში, რომ სპეცსამსახურებს მისცემოდა უფლება, გამოეცა ოფიციალური გაფრთხილება იმ ქმედებების პრევენციის შესახებ, რომლებიც ქმნიან პირობებს დანაშაულის ჩადენისთვის. თუმცა, იურისტებმა მკაცრად გააკრიტიკეს ეს ბუნდოვანი ფორმულირება.

სახელმწიფო უსაფრთხოების სამსახურს უკვე აქვს უფლება გამოიძიოს დანაშაულები, რომლებიც საფრთხეს უქმნის სახელმწიფოს უსაფრთხოებას. კანონი ასეთი დანაშაულის 18 სახეობას ასახელებს, მაგრამ ცვლილებების მიღება შესაძლებელს გახდიდა ამ სიას დაემატებოდა თითქმის ნებისმიერი სახის კრიტიკა აფხაზეთის მიმართ.

„მაგალითად, სახელმწიფო უსაფრთხოების სამსახურმა შეიძლება ჩათვალოს, რომ ოპოზიციონერი პოლიტიკოსის გამოსვლა ან სტატია, ან უბრალოდ, უბრალო ადამიანების კომენტარები სოციალურ ქსელებში ქმნის პირობებს დანაშაულის ჩადენისთვის.

რა შეიძლება ჩაითვალოს „დანაშაულის ჩადენის პირობებად“? ეს ზემოდან მითითებების გათვალისწინებით და უთანხმოების წინააღმდეგ ბრძოლის მიზნით დადგინდება“, – ასე ახასიათებენ კანონპროექტს სოციალურ ქსელებში განხილვისას.

• ვინ და რატომ ებრძვის არასამთავრობო ორგანიზაციებს აფხაზეთში
• “ჩვენ არავის ვალი არ გვაქვს” – მოსაზრება აფხაზეთიდან
• კომენტარი აფხაზეთიდან: “არ გვინდა, სხვა ქვეყნის ქსეროასლი გაგვხადონ”

„აფხაზეთში რეპრესიული მეთოდების პოპულარიზაციის მცდელობა“ – იურისტებისა და უფლებადამცველების კომენტარები

დეპუტატმა ვიანორ ბებიამ ინიციატივას “ჩრდილოეთ კორეის კანონი” უწოდა.

მისი კოლეგა ინარ გიცბა კი მიიჩნევს: „არსებობს მოსაზრება, რომ ეს კანონი მიზნად ისახავს კონსტიტუციური უფლებების შეზღუდვას – სიტყვისა და აზრის თავისუფლებას. ეს ხელს შეუწყობს ავტორიტარულ რეჟიმს“.

ადამიანის უფლებათა კომისარი ასიდა შაკრილი: „ბოლო დროს დაჟინებით მეორდება მცდელობები აფხაზეთში რეპრესიული მეთოდების ხელშეწყობის, ნორმების დაკანონებისა, რომლებიც ანადგურებს აფხაზური საზოგადოების პრინციპებსა და ღირებულებებს. ასევე ზღუდავს უფლებებსა და თავისუფლებებს.

საუბარია დაშინების მეთოდების ლეგალიზების გეგმებზე – გასაუბრებაზე გამოძახება, სახელმწიფო უსაფრთხოების სამსახურში დაკითხვა და გაფრთხილება ადამიანებთან მიმართებაში, ვინც საკუთარ აზრს გამოხატავს. დეპუტატებმა უარი თქვეს სახელმწიფო უსაფრთხოების სამსახურის უფლებამოსილების დაუსაბუთებელ გაფართოებაზე და აფხაზ საზოგადოებას არ მისცეს საშუალება, ჩაეფლო სიცრუის, დენონსაციის, შიშისა და უიმედობის ატმოსფეროში, რაც მან ტრაგიკულად გადაიტანა სტალინისა და ბერიას დროს.

პარლამენტმა დაადასტურა, რომ აფხაზური საზოგადოება არ აპირებს დესტრუქციული ავტორიტარული მმართველობის სისტემის აღორძინებას და გაძლიერებას. და ეს იწვევს ოპტიმიზმს და აძლიერებს დემოკრატიის რწმენას.

საზოგადო მოღვაწე, ჰუმანიტარული პროგრამების ცენტრის თანადირექტორი ლიანა ყვარჩელია: „აღმასრულებელი ხელისუფლება საფრთხეს უქმნის აფხაზეთის პოლიტიკურ სისტემას. იქმნება საპოლიციო რეჟიმის პირობები. ჯერ დაიწყეს უცხოური აგენტებით – მათ გაუადვილდათ არასამთავრობო ორგანიზაციებით დაწყება. მიაკერეს მათ ყველანაირი იარლიყი, გაუფუჭეს საოგადოებაში რეპუტაცია და გაატარეს კანონი, როცა ყველა მორჩილია.

ეს მხოლოდ პირველი ეტაპია. კანონის მიღების შემთხვევაში უკვე ადვილია მასში ცვლილებების შეტანა და რეესტრის გაუთავებლად გაფართოება არა მხოლოდ იურიდიული პირების და მედიის, არამედ ფიზიკური პირების ხარჯზეც.

ეს არის თავდასხმა თავისუფლებაზე სხვადასხვა მხრიდან. პატივისცემა დეპუტატებს! მნიშვნელოვანი დღე იყო!

ყველაფერი საეჭვოდ გაუმჭვირვალე ხდება. იმედი მაქვს, დეპუტატები დაუბრუნდებიან პარლამენტის სხდომების პირდაპირი ტრანსლაციებს.”