აფხაზეთმა რუს კრიმინალურ ავტორიტეტს ადრე გაცემული დიპლომატიური პასპორტი გაუუქმა
აფხაზეთმა ტატულიანს დიპლომატიური პასპორტი გაუუქმა
აფხაზეთის ხელისუფლებამ გააუქმა დიპლომატიური პასპორტი, რომელიც ადრე რუს ბიზნესმენ რუბენ ტატულიანზე ჰქონდა გაცემული. ტატულიანი კრიმინალურ წრეებში “რობსონის” სახელით არის ცნობილი.
ტატულიანი მჭიდრო კავშირით სარგებლობდა აფხაზეთის ყოფილ ე.წ. პრეზიდენტ ასლან ბჟანიასთან. სწორედ ამ ურთიერთობამ განაპირობა, რომ მან 2020 წელს მიიღო როგორც აფხაზეთის მოქალაქეობა, ისე დიპლომატიური სტატუსი.
ამჟამად ტატულიანი სამართალდამცავი უწყებების მიერ ძებნილია. რუსულ მედიაში მას ხშირად “კრიმინალურ ავტორიტეტად“ მოიხსენიებენ.
დიპლომატიური პასპორტის გაუქმების შესახებ ინფორმაცია რუსულ მედიაში გავრცელდა, თუმცა აფხაზეთის ოფიციალურ სტრუქტურებს ამ თემაზე კომენტარი არ გაუკეთებიათ.
რუბენ ტატულიანი წარსულში ერთ-ერთ ყველაზე გავლენიან პირად მიიჩნეოდა ქალაქ სოჭში. ის დუმის დეპუტატ ალექსანდრ კარელინის თანაშემწე იყო.
2017 წელს აშშ-ის ხელისუფლებამ ტატულიანს პერსონალური სანქციები დაუწესა. ამერიკული მხარე ეჭვობდა, რომ მას კავშირი ჰქონდა “კანონიერი ქურდების“ სინდიკატთან.
თუმცა ტატულიანი ამ ბრალდებებს უარყოფდა, საკუთარ თავს ბიზნესმენად და მეცენატად წარმოადგენდა და კრიმინალურ წრეებთან კავშირს კატეგორიულად გამორიცხავდა.
ტატულიანს ფართო კონტაქტები ჰქონდა როგორც რუსეთის, ისე უცხო ქვეყნების პოლიტიკურ წრეებთან. ამ კავშირების მეშვეობით მან ჯერ სომხეთის დიპლომატიური პასპორტი მიიღო (ტატულიანი ეთნიკურად სომეხია), მოგვიანებით კი, პრემიერ-მინისტრ ნიკოლ ფაშინიანის ხელისუფლებაში მოსვლის შემდეგ, ეს პასპორტი გაუუქმდა.
რამდენიმე წლის შემდეგ აფხაზეთის მაშინდელ ლიდერ ასლან ბჟანიასთან მეგობრობის ფონზე, ტატულიანმა კიდევ ერთი დიპლომატიური პასპორტი მოიპოვა — ამჯერად აფხაზური.
ადგილობრივი მედიის ცნობით, რუბენ ტატულიანი აფხაზეთში ვიზიტისას შინაგან საქმეთა სამინისტროს მხრიდან გამოყოფილი მანქანებით გადაადგილდებოდა, რომლებიც ციმციმებითა და სპეცნიშნულებით იყო აღჭურვილი.
ეს ვითარება აღშფოთებას იწვევდა აფხაზურ ოპოზიციაში. მისი ერთ-ერთი ლიდერი, ადგურ არძინბა, ტატულიანთან საჯარო კონფლიქტშიც კი აღმოჩნდა.
2023 წლის შემოდგომაზე ტატულიანის წინააღმდეგ რამდენიმე სისხლის სამართლის საქმე აღიძრა რუსეთში, მათ შორის ორგანიზებული დანაშაულებრივი ჯგუფის შექმნისა და განსაკუთრებით მასშტაბური თაღლითობის მუხლებით.
ტატულიანი ამჟამად ძებნილია, მისი ადგილსამყოფელი კი ამ დრომდე უცნობია.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
