"აფხაზეთის მუზეუმში შამილ ბასაევის პორტრეტის გამოფენა მიუღებელია" - მოსკოვის აღშფოთების გამო ბასაევის პორტრეტი ჩამოხსნეს
მოსკოვმა აფხაზეთში გამოფენა შამილ ბასაევთან ერთად დახურა
აფხაზეთის ეროვნულ მუზეუმში ჩეჩენი საველე მეთაურის, შამილ ბასაევის პორტრეტი გამოფინეს, რამაც მოსკოვის უკმაყოფილება გამოიწვია. ინფორმაცია რუსულ მედიაში ვრცელდება.
“აფხაზეთის გმირები”, ასე ჰქვია გამოფენას, რომელიც აფხაზეთში გაიხსნა.
შამილ ბასაევი 1992 წელს, აფხაზეთის ომში საქართველოს წინააღმდეგ, რუსების მხარეს იბრძოდა, რის გამოც მას ე.წ. უმაღლესი ეროვნული ჯილდო, “აფხაზეთის გმირის” მედალიც გადასცეს. მისი პორტრეტი მუზეუმში სწორედ “აფხაზეთის გმირების” სახელობის გამოფენის ფარგლებში ჩამოკიდეს.
შამილ ბასაევი ასევე შემოქმედია რუსეთის ისტორიაში რამდენიმე ყველაზე მასშტაბური ტერაქტისა. მის სახელს უკავშირდება 1995 წელს ბუდიონოვსკზე თავდასხმა, 2002 წელს დუბროვკის თეატრალურ ცენტრში მძევლების აყვანა, 2004 წლის ბესლანის სკოლის ტერაქტი და 2004 წელს მოსკოვის მეტროსა და თვითმფრინავებში აფეთქებების მოწყობა.
ბასაევი 2006 წელს გარდაცვალებამდე რუსეთში “ნომერ 1-ელ ტერორისტად” იყო გამოცხადებული. იგი მოხსენიებული იყო გაეროს, აშშ-სა და ევროკავშირის მიერ ტერორისტად გამოცხადებულთა სიაშიც.
რუსულმა ტელეგრამ არხმა Hard Blog-მა ფოტო გამოაქვეყნა, სადაც “აფხაზეთის გმირების” ხუთი პორტრეტია გამოსახული, მათ შორის შამილ ბასაევის.
“ეს იგივე შემთხვევაა, როცა მადლიერების ნაცვლად სახეში გვაფურთხებენ […] სახელმწიფო, რომელმაც ასე კარგად მოირგო ჩვენს ბიუჯეტში, რომელიც იღებს არა მარტო ინვესტიციებს რუსეთისგან, არამედ სამხედრო დახმარებას და საგარეო პოლიტიკაში მხარდაჭერას, აცხადებს: “ჩვენ არ გვაინტერესებს ვინ ხარ შენ.” ფაქტობრივად, ეს არის ტერორიზმის საჯარო გამართლება სამართლებრივი თვალსაზრისით და ღვთისგმობა მორალური და ეთიკური თვალსაზრისით.
რუსეთის საგარეო საქმეთა სამინისტრო, როგორ ხარ? არაფერი გაწუხებს? ბესლანში ტერაქტის ორგანიზატორი მეზობელ სახელმწიფოში გმირად ითვლება. ამას არ აღიქვამთ, როგორც სახეში შეფურთხებას?“ – წერს არხი.
ამ გამოფენის შესახებ წერს Z-გამოცემა Царьград ТВ-ც. მათ შენიშნეს, რომ მუზეუმის ვებგვერდზე, განყოფილებაში “მუზეუმის სტუმრები“ საუბარია დაწესებულების დირექტორსა და აფხაზეთის მხარეს ბასაევის ბატალიონში მებრძოლ ოსმან შამბას შეხვედრაზე.
ხელისუფლების მომხრე ბლოგერები და მედია ხაზს უსვამენ, რომ აფხაზეთის სახელმწიფო მუზეუმი რუსეთის ფინანსური ინვესტიციებით 2013 წელს აღდგა.
“თუ აფხაზეთი თითქოს არის რუსეთის ფედერაციაზე მთლიანად დამოკიდებული “მარიონეტი“, მაშინ ჩნდება კითხვა: რისთვის არის საჭირო ასეთი მარიონეტი, თუ ის ვერანაირად ვერ კონტროლდება? იქნებ ოთხივე მხრიდან გავუშვათ ხელი? საქართველოში დაბრუნებას ვგულისხმობ – იქ ისინი გასწავლიან სამშობლოს სიყვარულს”, – თქვა პოლიტოლოგი გეორგი ბოვტმა.
მოგვიანებით, რუსეთის საელჩომ არაღიარებულ აფხაზეთში აცნობა RBC-ს, რომ ბასაევის პორტრეტით გამოფენა დროებით დაიხურა.
რუსეთის საელჩომ განაცხადა, რომ ჩეჩენი საველე მეთაურის გამოსახულების ჩვენება “მიუღებელია”. საელჩომ ასევე განმარტა, რომ მუზეუმის ხელმძღვანელობამ “უნდა გამოასწოროს მდგომარეობა რაც შეიძლება მალე.”
აფხაზეთში ამბობენ, რომ ეს კამპანია მოსკოვის მხრიდან რესპუბლიკაზე ზეწოლის ნაწილია.
კერძოდ, დღეს, 25 სექტემბერს, აფხაზეთის პარლამენტი სასამართლო გადაწყვეტილებების ურთიერთაღიარების შესახებ რუსეთ-აფხაზური შეთანხმების რატიფიცირების საკითხს განიხილავს. ბევრი ექსპერტი აფხაზეთში ფიქრობს, რომ ეს შეთანხმება არ არის დაბალანსებული და არ ასახავს აფხაზური მხარის ინტერესებს.
“შამილ ბასაევის პორტრეტი რამდენიმე წელია აფხაზეთის მუზეუმებშია გამოფენილი, მოსკოვში კი ეს მხოლოდ ახლა შენიშნეს. რატომ? აფხაზეთ-რუსეთის ურთიერთობებში კრიზისია (თუმცა ორივე მხარე სიტყვიერად უარყოფს ამას), ხვალ მნიშვნელოვანი კენჭისყრაა პარლამენტში და კრემლი იძლევა სიგნალს: მოიქეცით როგორც გეუბნებით, თორემ კიდევ ბევრ რამეს შეგახსენებთ. “, – წერს ცნობილი აფხაზური ტელეგრამ არხი.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
exchange
