”თბილისი თავს იტყუებს, თითქოს გაიმარჯვა”. სოხუმში სტრასბურგის გადაწყვეტილება შეაფასეს
საქართველო და მისი დასავლელი პარტნიორები ცდილობენ წარმოაჩინონ, თითქოს რაღაც უპრეცედენტო ისტორიულ გამარჯვებას მიაღწიეს, – ასე შეაფასა სოხუმმა ევროპის ადამიანის უფლებათა სასამართლოს გადაწყვეტილება საქმეზე „საქართველო რუსეთის წინააღმდეგ“.
აფხაზეთის საგარეო საქმეთა სამინისტრო გამოეხმაურა ევროპარლამენტის სამხრეთ კავკასიასთან ურთიერთობის დელეგაციის ხელმძღვანელის მარინა კალიურანდის განცხადებას ადამიანის უფლებათა ევროპული სასამართლოს გადაწყვეტილებასთან დაკავშირებით, საქმეზე „საქართველო რუსეთის წინააღმდეგ“, რომელშიც კალიურანდმა რუსეთს მოუწოდა ”შეასრულოს თავისი საერთაშორისო ვალდებულებები და აფხაზეთის დამოუკიდებლობის აღიარება გააუქმოს”.
”სასამართლოს დასკვნები შორს აღმოჩნდა იმ შედეგებისგან, რომლიც ხილვა თბილისში სურდათ. ამის მიუხედავად, საქართველო და მისი დასავლელი პარტნიორები ცდილობენ წარმოაჩინონ, რომ რაღაც უპრეცედენტო “ისტორიულ გამარჯვებას” მიაღწიეს”, განაცხადა აფხაზეთის საგარეო საქმეთა სამინისტრომ.
სოხუმი ყურადღებას ამახვილებს იმ ფაქტზე, რომ საქმე განიხილეს “აგვისტოს მოვლენებში უშუალოდ მონაწილე სახელმწიფოების – სამხრეთ ოსეთისა და აფხაზეთის წარმომადგენლების მონაწილეობის გარეშე”.
”თავად ადამიანის უფლებათა ევროპული სასამართლოს გადაწყვეტილება მიღებული იქნა იმავე საეჭვო გზით. ზედმეტია იმის შეხსენება, რომ ამგვარი “სასამართლო განაჩენების” გამოტანის პრაქტიკა ეჭვქვეშ აყენებს ადამიანის უფლებათა ევროპული სასამართლოს გადაწყვეტილებების ობიექტურობას“, – ნათქვამია განცხადებაში.
- აგვისტო 2008. რუსეთ-საქართველოს ომის ქრონიკები
- როგორი უნდა იყოს აფხაზურ-ქართული დიალოგი და უნდა იყოს თუ არა საერთოდ. რას მსჯელობენ ამ თემაზე აფხაზეთში
- „იმ მინდორზე ოს ბიჭებთან ფეხბურთს ვთამაშობდით“. რეპორტაჟი გუგუტიანთკარიდან
სასამართლოს მიმართ საყვედურების მიუხედავად, გადაწყეტილების ზოგიერთი დასკვნა აფხაზეთის ხელისუფლებისთვის საკმაოდ მისაღები აღმოჩნდა.
კერძოდ, აფხაზეთის საგარეო საქმეთა სამინისტრო აღნიშნავს:
– ECHR– მ, მისი აზრით, აღიარა, რომ რუსეთის ფედერაცია ვერ აგებს პასუხს ადამიანის უფლებათა და ძირითად თავისუფლებათა კონვენციის დარღვევებზე 2008 წლის აგვისტოს ომის დროს მომხდარი ინციდენტების გამო;
– სასამართლომ მხარი არ დაუჭირა საქართველოს ხელისუფლების ბრალდებებს 2008 წლის 7 აგვისტოს სამხრეთ ოსეთის ტერიტორიაზე რუსეთის შეიარაღებული ძალების “შეჭრის” შესახებ;
– საქართველომ ვერ დაამტკიცა, რომ ადამიანის უფლებათა ევროპული კონვენცია გამოიყენება არა მხოლოდ მშვიდობიან დროს, არამედ საომარი მოქმედებების პირობებშიც. აღიარებულ იქნა, რომ 2008 წლის 8-12 აგვისტოს სამხრეთ ოსეთში და აფხაზეთში რუსეთის შეიარაღებული ძალების ქმედებების სამართლებრივი შეფასება ევროპელი მოსამართლეების იურისდიქციას არ ექვემდებარება;
– ECHR– მ არ დაადგინა რუსეთის შეიარაღებული ძალების მიერ მშვიდობიანი მოსახლეობის უფლებების დარღვევის არცერთი შემთხვევა 2008 წლის აგვისტოს მოვლენების დროს.
