მოსაზრება: რატომ გართულდა საქონლის ექსპორტი აფხაზეთიდან რუსეთში
ფსოუს გამშვებ პუნქტზე რუსეთში მანდარინის გატანის პრობლემა შეიქმნა. ციტრუსით დატვირთულ მანქანებს რიგში რამდენიმე დღე უწევთ დგომა. ამის მიზეზი რუსეთის საბაჟოს მიერ კონტროლის გამკაცრებაა.
ცნობილი აფხაზი პოლიტიკოსი და ბლოგერი თენგიზ ჯოპუა პრობლემასა და მის მიზეზებს მიმოიხილავს.
საზღვრის პრობლემა ”მოულოდნელად” რუსეთის ფედერალური საბაჟო სამსახურის როსტოვის საბაჟო დეპარტამენტის სტრუქტურული რეფორმის შემდეგ წარმოიშვა. სინამდვილეში, იქ განსაკუთრებული არაფერი მომხდარა – საკონტროლო გამშვები პუნქტი “ადლერი” კრასნოდარის საბაჟოს დაქვემდებარებაში გადავიდა, მას საბაჟო კოდი შეეცვალა და ქაღალდების უაზრო გროვის გადაწერა გახდა საჭირო.
სანამ პრობლემას და მის მიზეზებს ჩავუღრმავდები, მინდა დავსვა კითხვა – რა იქნა შეთანხმება მოკავშირეობისა და სტრატეგიული პარტნიორობის შესახებ აფხაზეთსა და რუსეთს შორის?
რა დაემართა დებულებებს აფხაზეთიდან რუსეთის ტერიტორიაზე საქონლის უბაჟოდ გატანის თაობაზე?
- მოსაზრება: აფხაზეთს რუსული ფული სჭირდება, მაგრამ ის შეიძლება ძალიან ძვირი დაუჯდეს
- აფხაზი პოლიტიკოსი: აფხაზეთი რუსეთ-ბელარუსის საკავშირო სახელმწიფოს წევრი უნდა გახდეს
- აფხაზეთი: საპენსიო სასჯელი
და რა ხდება “სპეციალურ საბაჟო ორგანოსთან” დაკავშირებით, რითაც წარსული და ამჟამინდელი ხელისუფლება თავს იწონებდა?
საზღვარზე შექმნილი ვითარება გაკვეთილია მათთვის, ვინც 2015 წლიდან რუსეთთან სავაჭრო-პოლიტიკური რეჟიმის მარეგულირებელ შეთანხმებებს უყოყმანოდ აწერდა ხელს და მათ სასიცოცხლო აუცილებლობას დუჟმორეული ამტკიცებდა.
იმავდროულად, მანდარინის გადატანის ღირებულება ფსოუს საბაჟო პუნქტდან და ადლერის საგუშაგოზე ამ წლების განმავლობაში კილოგრამზე არანაკლებ 12 რუბლი (დაახლოებით 16 ცენტი) იყო. ხალხს ეს თანხა უნდა ეხადა ისე, თითქოს შეთანხმებები არ არსებობდა.
ახლა კი უკვე წამოჭრილი პრობლემის შესახებ. რას აკეთებს ხელისუფლება? მოითხოვს ე. წ. “ტოლკაჩების” [არაფორმალური თანაშემწეები, რომლებიც ხალხს საზღვარზე საქონლის გადატანაში ეხმარებიან] მომსახურების ღირებულების შემცირებას ექვს რუბლამდე (დაახლოებით 8 ცენტი) ერთ კილო მანდარინზე. სინამდვილეში ფასი 8 რუბლამდე დაეცა, მაგრამ პროდუქტის საზღვარზე გადატანას “მოულოდნელად” პრობლემები შეექმნა. და ეს სირთულეები გაგრძელდება, სანამ ფასი 12 რუბლს არ დაუბრუნდება.
მახსოვს, რომ საზღვრიდან “ტოლკაჩების” გაძევება 2015 წელს აფხაზეთის ყოფილ პრეზიდენტს, ხაჯიმბასაც სურდა . მაგრამ მთავრობა ისეთი სუსტი აღმოჩნდა, ჩრდილოვანი სექტორი კი ისეთი ძლიერი, რომ არაფერი გამოუვიდა. ახლაც არაფერი გამოვა. ჩვენ ხალხს მხოლოდ ტყუილად ვაწვალებთ.
აფხაზეთი თავად კორუფციაში ცხოვრობს და ჩვენ გვინდა, რომ რუსეთმა სხვაგვარად იცხოვროს?
გადაადგილების ნახევრადლეგალური სქემა აფხაზეთის სოფლის მეურნეობის სექტორს ძვირი უჯდებოდა, მაგრამ შესაძლებელს ხდიდა რთული ბიუროკრატიული დაბრკოლებების გადალახვას და საქონლის მიწოდებას მომხმარებლამდე. ამ “სქემის” გარეშე ყველას “თეთრად მუშაობა”მოუწევს და ეს გრძელი და მტკივნეული გზაა. ეს ყველამ იცის მაგრამ ამის გამოსწორება არავის აინტერესებს.
ეკონომიკის სამინისტრომ უნდა აუტალახოს კარები მოსკოვს – მთავრობაში, საბაჟო სამსახურში, როსპოტრებნადზორში [საქონლისა და მომსახურების ხარისხის კონტროლის სამსახური რუსეთში] და კონტროლის უფრო გამარტივებული ფორმები მოითხოვოს. საბოლოოდ, საზღვარზე არსებული ვითარება აშკარად არ შეესაბამება ჩვენს ქვეყნებს შორის სავაჭრო-პოლიტიკურ რეჟიმს, რომელიც ფორმალურად მოქმედებს. მაგრამ მანდარინები საზღვარზე ჩვენს ხელისუფლებას არ გადააქვს და რატომ უნდა იდარდოს ამაზე?
სანამ რამეს მოიმოქმედებ, უნდა გესმოდეს, რასთან გაქვს საქმე, შეაფასო შენი შესაძლებლობები და დაფიქრდე იმ მექანიზმზე, რომლითაც შენი მოქალაქეების ინტერესების რეალიზება მოხდება. წინააღმდეგ შემთხვევაში, ეს მხოლოდ პოპულიზმი იქნება, რომელსაც პოლიტიკური ეფექტი მხოლოდ მოკლე დროით ექნება, მას შემდეგ უკვე პოლიტიკურ ზარალს მოიტანს.
