აფხაზეთი: „როგორ დავრჩით პანდემიასთან ერთი ერთზე“

მარიანა კოტოვა

სოხუმი

რატომ არის ხელისუფლება დამნაშავე აფხაზეთში კორონავირუსით ინფიცირების ზრდაში

აფხაზეთში კორონავირუსით ინფიცირების რიცხვის მკვეთრი ზრდაა, კრიტიკული სიტუაციაა საავადმყოფოებში, ექიმები ხელისუფლებისა და საზოგადოებისადმი კოლექტიური მიმართვებით გამოდიან, თან მათაც და სხვებსაც უპასუხისმგებლობაში ადანაშაულებენ. აფხაზი ჟურნალისტი მარიანა კოტოვა იმის შესახებ, თუ რაში ადანაშაულებს ხელისუფლებას და რატომ არ მიიღებს მონაწილეობას საზოგადოების მიერ ფულის შეგროვების კამპანიაში.

როგორც აფხაზეთის მთავარი სანიტარული ექიმი ლუდმილა სკორიკი იტყობინება, კორონავირუსთან ბრძოლის ოპერატიული შტაბი დაიშალა.

გუდაუთის კოვიდის საავადმყოფოში ადგილები აღარ არის, – იტყობინება ჯანდაცვის სამინისტრო.

რუსო ტურისტებო, კეთილი იყოს თქვენი მობრძანება აფხაზეთში ვაქცინაციის შესახებ ცნობისა და უარყოფითი PCR-ტესტის პასუხის გარეშე, – აცხადებს ტურიზმის სამინისტრო.

25 ივლისს, დღე-ღამის განმავლობაში, აფხაზეთში (მოსახლეობა დაახლოებით 250 ათასი), კორონავირუსით ინფიცირების 136 ახალი შემთხვევა გამოვლინდა, ოთხი ადამიანი გარდაიცვალა. დაახლოებით, 400 პაციენტი საავადმყოფოში, მძიმე მდგომარეობაში იმყოფება. სულ, პანდემიის დაწყებიდან, აფხაზეთში ინფიცირების 21 061 შემთხვევა გამოვლინდა, მათგან 289 პაციენტი გარდაიცვალა, 16 763 გამოჯანმრთელდა.

საქველმოქმედო ფონდების გვერდები კი სოციალურ ქსელებში 24 საათის განმავლობაში COVID-19-ის საწინააღმდეგო ძვირადღირებული წამლების ძებნაში არიან და მოხალისეებს მოუწოდებენ, გაემგზავრონ ინფექციურ საავადმყოფოებში დასახმარებლად და ფული მოაგროვონ ექიმების მხარდასაჭერად.

ამ განცხადებებიდან არცერთს არ აღვიქვამ სერიოზულად. და ვხელმძღვანელობ საკუთარი პრინციპებით პანდემიასთან ბრძოლაში:

• არ ვმგზავრობ საზოგადოებრივი ტრანსპორტით

• მაღაზიებსა და დახურულ შენობებში შევდივარ მხოლოდ ნიღბით და თუკი პლაჟზე გავდივარ, მხოლოდ მოშორებით არსებულზე

• ვცდილობ გვერდი ავუარო ტურისტებს და ვაქცინაციისთვის წავალ მხოლოდ მაშინ, როდესაც ხალხის დიდი ჯგუფების ვიწრო ოთახებში შეკრებას შეწყვეტენ.

და, რა თქმა უნდა, არ დავეხმარები არც სამუშაო ძალით, არც ფულით სახელმწიფო კოვიდჰოსპიტლებსა და საავადმყოფოებს.

ამის ხუთი მიზეზი მაქვს.

იმიტომ რომ, უფრო ნაკლები ფული მაქვს, ვიდრე მათ, ვინც ბიუჯეტიდან ფულს საქალაქო დღესასწაულებისკენ მიმართავს გახურებული პანდემიისას.
უფრო ნაკლები ფული მაქვს, ვიდრე მათ, ვინც გახურებული პანდემიისას ქორწილებში დადის და მათ აორგანიზებს.
როდესაც ვისმენ, ბიუჯეტიდან რამდენი ფული წავიდა კოვიდის საწინააღმდეგო წამლების შესაძენად – საკუთარი ფულის თვლას ვიწყებ, რომელიც კოვიდის წამალზე დამეხარჯა და თვეებზე, რამდენი ხნის განმავლობაშიც მომიწევს კრედიტის გადახდა, რომელიც კოვიდის საწინააღმდეგო წამლის შესაძენად ავიღე.
როდესაც მთხოვენ ფულით დავეხმარო სახელმწიფო დაწესებულებებს, ვიხსენებ, როგორ ცდილობენ დეპუტატები ჩემი ან ჩემი მეგობრების სადილის საფასურის გადახდას. არადა, მათი ხელფასი ხომ უფრო ნაკლებია, ვიდრე ჩვენი. მაგრამ ეს მე ვითვლი და არა ისინი, რამდენჯერ შემიძლია თვეში სახლს გარეთ სადილობა გაკოტრების რისკის გარეშე.
კოვიდის ჰოსპიტლების ანგარიშზე 1 რუბლსაც კი არ ჩავრიცხავ, იმიტომ რომ, თითოეული კაპიკი საკუთარი შრომით გამოვიმუშავე. და სახელმწიფოსთან გასაყოფიც არაფერი მაქვს, გადასახადების გარდა, და არც ვაპირებ.

ირგვლივ ყველა შეგნებულობისკენ, ნიღბების ტარებისკენ, ხელების დაბანისა და დისტანციის დაცვისკენ მოგვიწოდებს. თქვენი ჯანმრთელობა თქვენს ხელშია. ექიმები ყვირიან: გაუფრთხილდით საკუთარ თავს, თქვენი გადარჩენის ძალა აღარ გვაქვს.

მაგრამ თუკი სახელმწიფო ყოველთვის და ყველაფერში ადამიანების შეგნებულობას დაეყრდნობოდა, ამ მსოფლიოში არ იქნებოდა ციხეები, გამოსასწორებელი დაწესებულებები და ნარკოლოგიური კლინიკები.

სახელმწიფო – ესაა ინსტიტუტი, რომელიც არეგულირებს იმ ადამიანების ბროუნის მოძრაობას, ვისაც არ სჯერა კანონების, ვირუსებისა და სინდისის.

პანდემია, როგორც გამადიდებელი შუშა, გვიჩვენებს ყველა ადამიანურ სისუსტეს და სახელმწიფოს სისუსტეს, რომელიც, როგორც გაირკვა, ვერ ახერხებს გაუმკლავდეს „უბრალო“ ადამიანს, რომელმაც გადაწყვიტა ქორწილის გამართვა იმ დროს, როდესაც საკუთარი დადებითი ანალიზის პასუხიც კი იცოდა COVID-19-ზე. შემდეგ კი საავადმყოფოს საწოლზე დააწვინა თავისი ყველაზე ახლობელი ადამიანები.

ერთ-ერთი ასეთი ღონისძიების შემდეგ, 70 ადამიანი ჩაწვა. მაგრამ ეს ინფორმაცია არ ხვდება ოფიციალურ ქრონიკებში. კვლავ გრძელდება ქორწილებიც და კონცერტებიც, ადამიანები კი აგრძელებენ ავადობას, ძვირადღირებული წამლის სასწრაფოდ შეძენის შესახებ განცხადება კი სოციალურ ქსელში დაქრის.

ისევე როგორც „გარდაცვალების მაუწყებელი ცნობები“ ჯერ არახანდაზმული ადამიანების სახელებით, რომლებიც იცოცხლებდნენ, მათი მეზობლებისთვის პატივი რომ არ ეცათ მათ ქორწილებსა და დასაფლავებებზე დასწრებით.

ახლა კი მათ პატივსაცემად მივა ვინმე, აი, კოვიდის ასეთი წრებრუნვაა აფხაზეთში.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო