აფხაზეთი: შვიდი კადეტი კორონავირუსით და უსიმპტომოდ. ისტორიები კლინიკიდან და კარანტინიდან
9 მაისს, აფხაზეთში, ცხრა კურსანტს დაუსვეს COVID-19-ის დიაგნოზი მას შემდეგ, რაც ისინი სახლში, რუსული სამხედრო სასწავლებლიდან დაბრუნდნენ. ყველა მათგანის შემთხვევაში, დაავადება უსიმპტომოდ მიმდინარეობს.
მანამდე, თითქმის სამი კვირის განმავლობაში, აფხაზეთში არც ერთი შემთხვევა არ იყო დაფიქსირებული. სულ, კორონავირუსის პანდემიის დაწყებიდან, აქ ათი შემთხვევაა დარეგისტრირებული. ორი პაციენტი გამოჯანმრთელდა, ერთი, 95 წლის ქალი კი გარდაიცვალა.
როგორც აცხადებენ, ერთ-ერთი კურსანტი უკვე სრულად გამოჯანმრთელდა და საავადმყოფოდან 16 მაისს გაეწერება.
კიდევ 200 ადამიანზე მეტი კარანტინში იმყოფება, რადგან ისინი შინ რუსეთიდან დაბრუნდნენ, სადაც სწავლობენ და მუშაობენ.
- კორონავირუსის უცნაური სტატისტიკა რუსეთში: ძალიან კარგი მედიცინა თუ პუტინს ხელისუფლებაში დარჩენა სურვილი?
- „37.5 მაქვს, რა გავაკეთო?“ – მოსკოვში, კორონავირუსის სამკურნალოდ – ფული და კავშირებია საჭირო
- პოლიტიკოსები კორონავირუსის შესახებ. რატომ აღმოჩნდა სომხეთი რეგიონული ლიდერი ინფიცირებულთა რიცხვით?
მკურნალობაზე
„აბსოლუტურად არანაირი სიმპტომი არ აქვს. არც ტემპერატურა, არც ხველა და სისუსტეც კი”, – გვიყვება ანა თავისი შვილის შესახებ, რომელიც მოსკოვის სამხედრო უნივერსიტეტის სტუდენტია.
20 წლის სალმანს COVID-19ის ანალიზმა დადებითი პასუხი 9 მაისს უჩვენა.
მანამდე, ორი დღით ადრე, ახალგაზრდა სახლში მოსკოვიდან დაბრუნდა. ის ერთ-ერთი 25-კაციანი ჯგუფის წევრი იყო, ყველა მათგანი რუსეთის თავდაცვის სამინისტროს სამხედრო უნივერსიტეტის კურსანტები არიან.
მათთვის ტესტირების ჩატარება მას შემდეგ გადაწყვიტეს, რაც გაირკვა, რომ COVID-19 დაუდგინეს ცხინვალში მათ თანაკურსელს. საბოლოოდ, ვირუსი შვიდ აფხაზ კურსანტს დაუდასტურდა.
ისინი კარანტინში, სოხუმში, სანატორიუმ „აიტარში“ იყვნენ და მაშინვე გადაიყვანეს ქალაქ გუდაუთის საავადმყოფოში, რომელიც სპეციალურად COVID-19-ის სამკურნალოდ გადააკვალიფიცირეს.
როგორც ანა გვიყვება, სიმპტომების არარსებობის მიუხედავად, მის შვილს ანტიბიოტიკებს აძლევენ, რადგან რენტგენზე ექიმებმა ფილტვებში მსუბუქი ჩრდილი დაინახეს.
ჰოსპიტალსა და სასტუმრო „აიტარში“ ყოფნა უფასოა. მაგრამ სამჯერადი კვებისთვის, დაახლოებით, დღეში, 6 ევროს იხდიან.
„ჰოსპიტალში ყველა წამალია. ჩვენ არაფრის ყიდვა არ მოგვთხოვეს, – გვიყვება სალმანის დედა ანა, – ხელისუფლება ასევე მუდმივად კავშირზეა ჩვენთან, დარეკა პრემიერ-მინისტრმა ანქვაბმა, დაინტერესდა ჩემი შვილის ჯანმრთელობის მდგომარეობით, ასევე, გვქონდა თუ არა მასთან კონტაქტი ჩვენ ან რომელიმე ადგილობრივ მცხოვრებს“.
ანას თქმით, კადეტების მთელი ჯგუფი ერთი თვითმფრინავით ჩამოფრინდა, შემდეგ, სპეციალური ავტომობილებით ისინი რუსეთ-აფხაზეთის საზღვართან მიიყვანეს, საიდანაც ბიჭები ავტობუსით წაიყვანეს სასტუმრო „აიტარში“. მშობლებთან ჩახუტების უფლება მათ არ მისცეს.
„კოლონას ჩემს შვილთან ორი მეტრით უფრო ახლოს მისვლის ნებართვა ვთხოვე, რათა მას დავენახე, მაგრამ ამის უფლება არ მოგვცეს“, – ჰყვება ანა.
„სალმანი მომიყვა, რომ მათი ჯგუფიდან, ვიღაცებს უფრო ადრე გამოუვლინდათ სისუსტე და თავის ტკივილი, ზოგიერთებმა ყნოსვის შეგრძნება დაკარგეს. მათ სანიტარიულ პუნქტს მიმართეს, მაგრამ უპასუხეს, ჯანმრთელები და ძლიერები ხართ და თუკი ტემპერატურა არ გაქვთ, გამოკეთებას საკუთარ ოთახში დაელოდეთო. მათ აკვირდებოდნენ, მაგრამ საავადმყოფოში არ გადაიყვანეს, რადგან მიაჩნდათ, რომ ამის აუცილებლობა არ იყო“, – ამბობს ანა.
სალმანს გამოფრენამდე ერთი კვირით ადრე დაეწყო თავის ტკივილი, მაგრამ დედამისს ბოლომდე იმედი ჰქონდა, რომ ეს სტრესზე რეაქცია იყო და არა ვირუსი.
როგორც ანა გვიყვება, მას სურდა, რომ მისი შვილი სახლში ჩამოსულიყო და ახლოს ჰყოლოდა. მაგრამ ამავდროულად ეჩვენებოდა, რომ რუსული მედიცინა უკეთესად გაუმკლავდებოდა დაავადებას იმ შემთხვევაში, თუკი სალმანი დაინფიცირდებოდა.
მაგრამ მისი მოსაზრება შეიცვალა ექიმ-იმუნოლოგ ალისა მატუასთან ურთიერთობის შემდეგ – პირველ რიგში იმიტომ, რომ მასთან მუდმივ კონტაქტზეა.
„ის გვიყვება ჩემი შვილის მდგომარეობის, მკურნალობის შესახებ. მეეჭვება, რომ ასეთ კონტაქტში ვყოფილიყავით ნებისმიერ ექიმთან მოსკოვში. ვიგრძენი, რომ ჩვენი ექიმები ჩვენს შვილებს ისე ეპყრობიან, როგორც ახლობლებს“, – ამბობს ანა.
მაგრამ, მიუხედავად ამისა, ის ცდილობს გააკონტროლოს მკურნალობა, ეკითხება ნაცნობ ექიმებს რუსეთში, რამდენად სწორია აფხაზი ექიმების დანიშნულებები.
სალმანი ამბობს, რომ გუდაუთის საავადმყოფოში კომფორტულად, კარგად არის და გემრიელად აჭმევენ, მედდები კი ყავას უდუღებენ და ხილით უმასპინძლდებიან.
ანა შვილის დიაგნოზს არ მალავს. ის მუდმივ კონტაქტშია სხვა კურსანტების მშობლებთან, რომლებიც ასევე მკურნალობას გადიან ჰოსპიტალში და მათთანაც, რომელთა შვილებიც კარანტინში არიან. „ბევრი რამ არის დამოკიდებული ჩვენს განწყობასა და დამოკიდებულებაზე“, – ამბობს ის.
კარანტინზე
კანი რუსეთში, პეტერბურგში მდებარე სამხედრო სასწავლებლის სტუდენტია. უკვე დაახლოებით ერთი კვირაა ის და მისი თანაკურსელი კარანტინში არიან სასტუმრო „აიტარის“ ორადგილიან ნომერში. თამაშობენ ნარდს, კარტს, უბრალოდ საუბრობენ ან ინტერნეტით გაჰყავთ დრო.
მათ კარზე, დღის განმავლობაში ოთხჯერ აკაკუნებენ, რათა გადასცენ საუზმე, სადილი, ვახშამი და გაუზომონ ტემპერატურა.
„ჩვეულებრივი თერმომეტრი არ არის, უკონტაქტოა, ადამიანი მოშორებით დგას და უბრალოდ ჩვენკენ აქვს მომართული აპარატი. მთელი ამ დროის განმავლობაში, ტემპერატურა ერთხელაც არ გამომვლენია“, – გვიყვება კანი.
მან და მისმა კოლეგებმა პეტერბურგიდან წამოსვლამდე COVID-19-ზე ანალიზი გაიკეთეს. პასუხი უარყოფითი იყო, თავს კი კარგად გრძნობდნენ, ამიტომ, როგორც კანი ამბობს, მას საკუთარ ჯანმრთელობასთან დაკავშირებით არანაირი ეჭვი არ ჰქონია.
თვითიზოლაციაში საკუთარი სურვილით
ლაურა ტარნავა მოსკოვიდან 28 მარტს ჩამოვიდა. იმ დროს, საზღვარგარეთიდან ჩამოსულებისგან საინკუბაციო პერიოდის განმავლობაში, თვითიზოლაციაში ყოფნას არ ითხოვდნენ. მაგრამ აკვირდებოდა რა მსოფლიოში მიმდინარე მოვლენებს, ლაურამ გადაწყვიტა, არ გაერისკა ახლობლების ჯანმრთელობით და საკუთარ ბინაში მოიწყო თვითიზოლაცია.
და როგორც თავად ამბობს, არცთუ უსარგებლოდ.
„ვუყურე ფილმებს, რომელთა რიგმაც დიდი ხანია ვერ მოაღწია, წავიკითხე წიგნები, რომლებიც უიმედოდ ელოდნენ თაროებზე საკუთარ დროს, მაგალითად, ჩეხოვი. პროდუქტი ბინის კართან მოჰქონდათ მეგობრებსა და ნათესავებს. ძალიან კომფორტულად ვიყავი“, – ამბობს ლაურა.
ახლა ის უკვე მშვიდად გადაადგილდება ქალაქში, იმის შიშის გარეშე, რომ ვინმეს დააინფიცირებს. ამბობს, რომ აფხაზეთში სტაბილური სიტუაცია იქნება, სანამ საზღვარზე მკაცრი კარანტინია და ყველა რისკჯგუფი იზოლირებული.
ამ დროისთვის, აფხაზეთში, საკარანტინო რეჟიმი მოქმედებს. საგანმანათლებლო დაწესებულებები, საზოგადოებრივი კვების ობიექტები და თეატრები არ მუშაობს. აკრძალულია მასობრივი ღონისძიებები. ბაზრები კი კვირაში სამი დღე მუშაობს.
აფხაზეთის ორივე შესასვლელი, რუსეთისა და საქართველოს მხრიდან სრულად ჩაკეტილია, მხოლოდ კანონით ნებადართული განსაკუთრებული გამონაკლისები შეიძლება დაიშვას.
ოფიციალური ინფორმაციით, აფხაზეთში, ყოველდღიურად, COVID-19-ზე ტესტირებას გადის 7-დან 40-მდე ადამიანი.
