მაინინგი აფხაზეთს ენერგოკრიზისით ემუქრება
აფხაზეთი ენერგეტიკული კრიზისის ზღვარზეა. სპეციალისტები ამბობენ, რომ აფხაზეთს არ ჰყოფნის ელექტროენერგია, რათა უზრუნველყოს მოსახლეობისა და ეკონომიკის გაზრდილი მოთხოვნა. მთავარი მიზეზი – კრიპტოვალუტის მაინინგია, რომელსაც ენერგიის უზარმაზარი რაოდენობა მიაქვს. ხელისუფლებამ მაინინგი წელიწადნახევრის წინ აკრძალა, მაგრამ აკრძალვის პრაქტიკაში განხორციელება ამ დრომდე ვერ მოხერხდა. ახლა ხელისუფლება მის ლეგალიზებას ფიქრობს.
არ არის საკმარისი ელექტროენერგია
აფხაზეთის ენერგეტიკული კომპანიის, „ჩერნომორენერგოს“ ოპერატიულ-სადისპეტჩერო სამსახურში ამტკიცებენ, რომ იქ მომუშავე მაინინგ-აღჭურვილობის საერთო სიმძლავრე, სულ მცირე 40-45 მეგავატს შეადგენს.
„ამ სიმძლავრეს, მთელი წლის განმავლობაში, სადღეღამისო მოხმარების პირობებში, შეუძლია, დაახლოებით, 400 მილიონი კვტ.სთ. წაიღოს, რაც აფხაზეთში პროგნოზირებული ელექტროენერგიის დეფიციტის დიდი ნაწილია. 2020 წლის დარჩენილ თვეებში, პროგნოზირებადმა დეფიციტმა, შეიძლება, 704 მილიონი კვტ.სთ. შეადგინოს“, – განაცხადა „ჩერნომორენერგოს“ ოპერატიულ-ტექნიკურმა დირექტორმა რუსლან ქვარჩიამ.
• მოსაზრება: აფხაზეთის ეკონომიკას ძნელბედობის ჟამი დაუდგა
რა არის მაინინგი
მაინინგი – ეს არის ელექტრონული ვალუტა Bitcion-ისა და სხვა კრიპტოვალუტის მოპოვების პროცესი სპეციალური აღჭურვილობით.
ეს ხორციელდება ბევრი ერთმანეთთან კავშირის არმქონე კომპიუტერის დახმარებით, რომლებიც მათემატიკურ გამოთვლით ამოცანებს ხსნიან სპეციალური პროგრამის საშუალებით.
მოპოვების პროცესი ყველაზე ეფექტური მაინინგის დიდი „ფერმების“ დახმარებით არის.
აკრძალულია, მაგრამ შეიძლება
2018 წლის ბოლოდან, აფხაზეთში, ხელისუფლების გადაწყვეტილებით, მაინინგი აკრძალულია. მაგრამ ამავდროულად, ჯერ კიდევ არ მიუღიათ კანონდამრღვევების წინააღმდეგ სანქციების ზუსტი სისტემა. ერთადერთი, რის უფლებასაც კანონმდებლობა იძლევა – საწარმოსთვის ელექტროენერგიის გათიშვაა. თუმცა, განსაკუთრებულ ეფექტს ასეთი ზომა არ იძლევა, რადგან გარკვეული დროის შემდეგ, საწარმოს არალეგალურად კვლავ უერთებენ ენერგეტიკულ სისტემას.
მაინინგით დაკავებული საწარმოების უმრავლესობა, აკრძალვის გამო, ფაქტობრივად არ იხდის მოხმარებული ელექტროენერგიის საფასურს. მათთვის, ვინც ამას მაინც აკეთებს, კვტ.სთ. მოხმარებული ელექტროენერგია 45 კაპიკიდან (ტარიფი ფიზიკური პირებისთვის) 85 კაპიკამდე (ტარიფი იურიდიული პირებისთვის) ჯდება.
უმოქმედო აკრძალვა, დაბალი ტარიფების გათვალისწინებით, ფაქტობრივად მაინინგ საწარმოების ზრდის სტიმულირებას ახდენს. ამავდროულად, ხელისუფლებამ, რომელმაც მაინინგი აკრძალა, არ დააწესა აკრძალვა აფხაზეთში მაინინგისთვის საჭირო აღჭურვილობის შემოტანაზე.
შედეგად, 2020 წლის პირველ ექვს თვეში, აფხაზეთში, ლეგალურად შეიტანეს ორჯერ მეტი კრიპტოაღჭურვილობა, ვიდრე მთელი 2019 წლის განმავლობაში.
ამასობაში, ტელეგრამ-არხის „Апельсин“-ის ინფორმაციით, უახლოეს პერიოდში, აფხაზეთის ხელისუფლება კრიპტოვალუტის მაინინგის ლეგალიზებას გეგმავს. მაინერებისთვის ელექტროენერგიის სპეციალური ტარიფი დაწესდება და ის იურიდიული პირებისთვის დღეს არსებულ ტარიფზე გაცილებით მაღალი იქნება. ამავდროულად, ნავარაუდევია აკრძალვის დაწესება აფხაზეთში მაინინგისთვის საჭირო აღჭურვილობის შემოტანაზე.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
