არქივი- 17.03.2021

AstraZeneca: ყველაფერი ვაქცინის შესახებ ბოლო დისკუსიებზე

ჯემნიუსი

ევროპის 13-მა ქვეყანამ, მათ შორის, საფრანგეთმა, გერმანიამ, ესპანეთმა და იტალიამ კორონავირუსის საწინააღმდეგო AstraZeneca-ს ვაქცინის გამოყენება შეაჩერეს და დამატებით ინფორმაციას ელიან მის უსაფრთხოებასთან დაკავშირებით. ამის მიზეზი გახდა ინფორმაცია იმის შესახებ, რომ ის თრომბს იწვევს. თუმცა, მისი მწარმოებელი ოქსფორდის უნივერსიტეტი, საერთაშორისო მარეგულირებელი ორგანოები და ჯანდაცვის მსოფლიო ორგანიზაცია აცხადებენ, რომ ამ ინფორმაციის არანაირი მტკიცებულება არ არსებობს.

ევროკავშირის სხვა წევრები, მათ შორის, ბელგია და პოლონეთი აგრძელებენ AstraZeneca-ს გამოყენებას. დიდი ბრიტანეთის ხელისუფლებამ ასევე განაცხადა, რომ არ აპირებს ვაქცინაციის შეჩერებას.

დიდ ბრიტანეთში უკვე 11 მილიონზე მეტმა ადამიანმა მიიღო AstraZeneca-ს ვაქცინის სულ მცირე ერთი დოზა და არანაირი ნიშანი არ ყოფილა მომატებული სიკვდილიანობის ან თრომბის წარმოქმნის.

ვაქცინის გამოყენებას აგრძელებენ ჩეხეთსა და უკრაინაში. 15 მარტს, AstraZeneca-თი დაიწყეს ვაქცინაცია საქართველოში.

ევროპის წამლების სააგენტო (EMA) თავის საბოლოო დასკვნას 18 მარტს გამოაქვეყნებს, მაგრამ მისმა ხელმძღვანელმა, ემერ კუკმა უკვე განაცხადა, რომ „მყარად არის დარწმუნებული“ პრეპარატ AstraZeneca-ს სარგებლიანობაში.

„თრომბი, რომელიც ზოგიერთ ქვეყანაში გამოვლინდა, ათწლეულების განმავლობაში, საკმაოდ ხშირად გვხვდება მოსახლეობას შორის“, – განაცხადა კუკმა.

ჯანდაცვის მსოფლიო ორგანიზაციამ ქვეყნებს მოუწოდა, არ შეაჩერონ ვაქცინაცია, რადგან „არანაირი მტკიცებულება არ არსებობს იმის, რომ წარმოქმნილი თრომბები ვაქცინასთან არის დაკავშირებული“.

ქვემოთ მოცემული გრაფიკა აჩვენებს, როგორ მიმდინარეობს ვაქცინაცია მსოფლიოში. გამოთვლა გაკეთებულია მოსახლეობიდან 100 ადამიანზე ვაქცინის დოზების რაოდენობით. ვაქცინების უმეტესობისთვის საჭიროა მინიმუმ ორი დოზის გაკეთება.

ვაქცინების დოზების რაოდენობა, გამოთვლილი 100 მოსახლეზე გაანგარიშებით

რას ამბობენ ქვეყნები, რომლებმაც AstraZeneca-ს გამოყენება შეაჩერეს

პირველი ქვეყანა, რომელმაც ეს გადაწყვეტილება მიიღო, დანია იყო. მას მიჰყვნენ ნორვეგია და ისლანდია, შემდეგ – გერმანია, საფრანგეთი, იტალია, კვიპროსი, ესპანეთი, ლატვია და შვედეთი.

„იყო რამდენიმე უჩვეულო და საგანგაშო შემთხვევა, რომლებიც ამართლებენ ამ პაუზასა და ანალიზს. ეს დაკარგული დრო არ არის“, – თქვა ფრანგმა იმუნოლოგმა ალენ ფიშერმა, რომელიც მთავრობის საკონსულტაციო საბჭოს ხელმძღვანელობს.

ამავდროულად, ვაქცინაციის შეჩერების გადაწყვეტილებამ, ევროპაში ბევრი პოლიტიკოსისა და ექიმის სერიოზული კრიტიკა გამოიწვია.

გერმანელმა ეპიდემიოლოგმა კარლ ლაუტერბახმა განაცხადა, რომ ეს პოლიტიკური გადაწყვეტილებაა. „იმ მონაცემების თანახმად, რომელიც უკვე არსებობს, ვაქცინაციის უპირატესობა საგრძნობლად აღემატება რისკებს, განსაკუთრებით, ხანდაზმული ადამიანებისთვის“, – უთხრა მან რადიო Deutschlandfunk-ს.

პოლონეთის ვაქცინაციის საბჭოს ხელმძღვანელმა, მიხალ დვორჩიკმა თქვა, რომ ქვეყნები, რომლებმაც ამ პრეპარატის გამოყენება შეაჩერეს, „აჰყვნენ პანიკას ზოგიერთი მედიასაშუალების მიკერძოებული ინფორმაციის გამო“.

„სარგებელი აღემატება რისკებს“ ევროპაში დაავადებულთა რიცხვის მატების ახალი აფეთქების ფონზე

ევროპის დიდი ნაწილი მთელი ძალით ცდილობს შეაჩეროს კორონავირუსის პანდემიის ახალი ტალღა. ბევრმა ქვეყანამ ისევ გაამკაცრა შეზღუდვები.

გერმანიაში, 20%-ით გაიზარდა ინფიცირების ახალი შემთხვევების რაოდენობა გასული ერთი კვირის განმავლობაში. საფრანგეთის პრემიერ-მინისტრმა, ჟან კასტეკსმა განაცხადა, რომ ქვეყანა პანდემიის „ერთგვარ მესამე ტალღაში“ იმყოფება.

ნორვეგიის დედაქალაქმა ოსლომ უფრო მკაცრი შეზღუდვების შესახებ განაცხადა. იტალია და ნიდერლანდები კვლავ მკაცრ აკრძალვებს აწესებენ, მათ შორის, განიხილავენ გადაადგილების მკვეთრად შეზღუდვის შესაძლებლობას.

COVID-19 – ინფიცირების შედარებითი სტატისტიკა

16 მარტს, დღე-ღამის განმავლობაში, საფრანგეთში, კორონავირუსით ინფიცირების თითქმის 30 ათასი ახალი შემთხვევა დაფიქსირდა (მესამე ადგილი მსოფლიოში). იტალიაში – 20 396 (მეხუთე ადგილი მსოფლიოში), გერმანიაში – 9 290 ახალი შემთხვევა (მე-11 ადგილი მსოფლიოში).