„საშინელება და საკუთარი ხალხის გენოციდი“ - რუსი ექიმები ხელისუფლების მოქმედებებს აფასებენ
გაუთვლელმა საშვების სისტემამ, მოსკოვში, მეტროს შესასვლელებში, ასობით ადამიანის თავშეყრა გამოიწვია. ასევე, აღდგომას, მოსალოდნელია დიდი რაოდენობით ხალხის შეკრება ეკლესიებსა და მათ მიმდებარე ტერიტორიაზე.
ამ ყველაფერმა ერთად, 10-14 დღეში, შესაძლოა, რუსეთში, კორონავირუსის აფეთქების ახალი ტალღა გამოიწვიოს
წყარო – რადიო თავისუფლება
რუსეთში, ერთ დღე-ღამეში, კორონავირუსით 4 785 ადამიანი დაინფიცირდა. სულ, 18 აპრილის მონაცემებით, ქვეყანაში ინფიცირებულია 36 793 ადამიანი. მათგან 313 გარდაიცვალა.
საშვების სისტემა, რომელმაც ადამიანებს ჯგუფებად შეკრება აიძულა
14 აპრილს, მოსკოვის ხელისუფლებამ კორონავირუსის წინააღმდეგ ბრძოლის ზომების გამკაცრების შესახებ განაცხადა. ერთ-ერთი მათგანი, რუსეთის დედაქალაქში გატარების სისტემის შემოღება გახდა.
საშვი უნდა მიეღო ყველას, ვინც ქალაქში გადაადგილდება – სამსახურის საქმეზე, მიდის ექიმთან, უნდა მოინახულოს ხანდაზმული ნათესავები (65 წელზე უფროსი ასაკის ადამიანებს სახლიდან გასვლის უფლება არ აქვთ).
- რუსეთი: ვირუსის გავრცელება პიკს უახლოვდება, მედიცინა მზად არ არის, ხელისუფლება კი იზოლაციის შესუსტებაზე ფიქრობს
- კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი
- ჩრდილოეთ ოსეთი: გადაჭედილი სპირტის საწყობები და აფთიაქები, სადაც ანტისეპტიკური საშუალებები არ არის
საერთო ჯამში, მოსკოვში, დაახლოებით, 2 მილიონი საშვი გასცეს და შემდეგ დაიწყეს მათი შემოწმება.
ქალაქის ყველა შესასვლელსა და მეტროს სადგურებზე პოლიციის პატრულები დააყენეს, რომლებიც საშვებსა და პასპორტებს ამოწმებდნენ.
შედეგად, მოსკოვის შემოსასვლელში წარმოიქმნა მრავალსაათიანი საცობი. მეტროს სადგურებში კი ხალხის დიდმა ჯგუფებმა მოიყარა თავი, სადაც ადამიანები ერთმანეთისგან რაიმე სახის დისტანციის შენარჩუნებას ფიზიკურად ვერ ახერხებდნენ.
სოციალური ქსელები გაივსო ფოტოებითა და ვიდეოებით, სადაც ჩანდა გზებზე საცობები და ადამიანებით გადავსებული მეტროს სადგურები.
ამასთან, ადამიანები, რომლებიც ამ დღეს ქალაქში გადაადგილებას ცდილობდნენ, ყველაზე საჭირონი იყვნენ – ექიმები, კურიერები და კომუნალური სამსახურების თანამშრომლები.
საყოველთაო აღშფოთების შემდეგ, ხელისუფლებამ შემოწმება შეწყვიტა, მაგრამ ზიანი უკვე შეუქცევადად იყო მიყენებული.
„ორკვირიანი კარანტინი უაზრო აღმოჩნდა“
მედიცინის მეცნიერებათა კანდიდატმა, უმსხვილესი სამედიცინო კომპანია „მედსის“ წამყვანმა სპეციალისტმა, დავიდ მატევოსოვმა, „რადიო თავისუფლებასთან“ ინტერვიუში, ასე შეაფასა მოსკოვის მეტროში განვითარებული მოვლენები:
„ეს ამაღელვებელია, ეს საშინელებაა, ეს ჯოჯოხეთი და საკუთარი ხალხის გენოციდია, არ ვიცი, კიდევ რა სიტყვები გამოვიყენო. თითქმის ორკვირანახევრიანი კარანტინი – წყალში გადაყრილი აღმოჩნდა. ჩვენ ახლა სრული ნიველირება მოვახდინეთ ყველაფრის, რასაც ეს 2.5 კვირა ვაკეთებდით. ეს გავაკეთეთ ჩვენივე სისულელის გამო.
ექიმების მთელი შრომა, მთელი საგანმანათლებლო მუშაობა, მთელი ეს მოწოდებები „სახლში დარჩენისკენ“, ყველაფერს ხაზი გადაესვა ერთი კალმის მოსმით და ხელისუფლების ნაჯახისებური მეთოდებით“.
პროგნოზი: შემდეგი საფრთხე – აღდგომა
ეროვნულ დონეზე, სპეციალისტები შიშობენ ხალხმრავლობაზე, რომელიც აღდგომას არის მოსალოდნელი. მოსკოვში, მსახურება მრევლის გარეშე ჩატარდება, მაგრამ ეკლესიები ღია იქნება რუსეთის რეგიონების ნახევარზე მეტში.
მოსკოვის საპატრიარქო ამ საკითხზე საერთო გადაწყვეტილებამდე ვერ მივიდა და რეგიონულ ეპარქიებს უფლება მისცა, თავად გაერკვიათ, როგორ მოქცეულიყვნენ. საერო ხელისუფლებამ კი არ ჩათვალა ჩარევა საჭიროდ.
ამან შეიძლება იქამდე მიგვიყვანოს, რომ მაისის დასაწყისში, საინკუბაციო პერიოდის ვადის ამოწურვისას – ეპიდემია მთელ ქვეყანაში გაძლიერდეს.
სპეციალისტები ფიქრობენ, რომ 7-14 დღის შემდეგ, რუსეთში, ახალი აფეთქებაა მოსალოდნელი.
