დიდი ბრიტანეთის სანქციების სიაში საქართველოს ოთხი მოქალაქე და ოკუპირებულ რეგიონებთან დაკავშირებული პირები მოხვდნენ
დიდი ბრიტანეთის სანქციები
დიდმა ბრიტანეთმა რუსეთის წინააღმდეგ სანქციების ახალი პაკეტი გამოაცხადა, რომლის ფარგლებშიც შეზღუდვები 31 ფიზიკურ პირს, ორგანიზაციასა და გემს დაუწესდა.
ბრიტანეთმა სანქციების სიაში შეიყვანა საქართველოს ოთხი მოქალაქე: რუსეთში მოღვაწე ჟურნალისტი ნიკოლოზ მჟავანაძე; პრორუსი ბიზნესმენი, პარტია „სოლიდარობა მშვიდობისთვის“ თავმჯდომარე მამუკა ფიფია, ამავე პარტიის წევრი გიორგი ირემაძე და პრორუსი ანალიტიკოსი პაატა აბულაძე. ბრიტანეთის მთავრობის განცხადებით, ეს პირები სანქცირდებიან კრემლის დეზინფორმაციის გავრცელების გამო.
ამასთან, სანქციების სიაში მოხვდა სამი პირი, რომლებიც საქართველოს ოკუპირებულ რეგიონებთან, აფხაზეთსა და ე.წ. სამხრეთ ოსეთთან არიან დაკავშირებული. ესენი არიან ოკუპირებული ცხინვალის რეგიონის ე.წ. პრეზიდენტი მარატ კამბოლოვი, მისი წინამორბედი ალან გაგლოევი და რუსი პოლიტტექნოლოგი სერგეი ტოლმაჩოვი.
მარატ კამბოლოვი ოკუპირებული ცხინვალის ე.წ. პრეზიდენტია, ალან გაგლოევი კი ოკუპირებული ცხინვალის ყოფილი ე.წ. პრეზიდენტი. რაც შეეხება სერგეი ტოლმაჩოვს, ის არის რუსი პოლიტტექნოლოგი. მედიის ინფორმაციით, სერგეი ტოლმაჩოვი ოკუპირებული აფხაზეთის ე.წ. პრეზიდენტის ბადრა გუნბას საარჩევნო კამპანიის მართვაში იყო ჩართული.
ბრიტანეთის მთავრობის განცხადებით, სანქციები დაწესდა იმ საქმიანობის გამო, რომელიც საფრთხეს უქმნის უკრაინის სუვერენიტეტს, ტერიტორიულ მთლიანობასა და დამოუკიდებლობას.
“რუსეთის აგრესია უკრაინის წინააღმდეგ უფრო ფართო ტენდენციის ნაწილია, რომელიც მისი მეზობელი ქვეყნების სუვერენიტეტის, ტერიტორიული მთლიანობისა და საერთაშორისო დონეზე აღიარებული საზღვრებისადმი უპატივცემულობაში გამოიხატება. მათ შორისაა საქართველოს რეგიონების – აფხაზეთისა და სამხრეთ ოსეთის – ოკუპაციის გაგრძელება.
დიდი ბრიტანეთი გმობს რუსეთის მცდელობებს, გაამყაროს საკუთარი უკანონო კონტროლი საქართველოს ოკუპირებულ რეგიონებზე, მათ შორის 18 სექტემბერს სამხრეთ ოსეთში ჩატარებული ე.წ. „საპრეზიდენტო არჩევნების“ და დე ფაქტო ანექსიისკენ გადადგმული შემდგომი ნაბიჯების მეშვეობით.
დიდი ბრიტანეთი მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას მის საერთაშორისო დონეზე აღიარებულ საზღვრებში და აგრძელებს რუსეთისთვის პასუხისმგებლობის დაკისრებას მისი ქმედებების გამო”, – აღნიშნულია განცხადებაში.
1 ოქტომბერს გამოცხადებული სანქციების უფრო ფართო პაკეტი ასევე მოიცავს ზომებს რუსეთის შემოსავლების წინააღმდეგ, მათ შორის ე.წ. ჩრდილოვანი ფლოტის, კრემლის დეზინფორმაციული ქსელებისა და უკრაინელი მშვიდობიანი მოსახლეობის წინააღმდეგ ჩადენილ დანაშაულებში მონაწილე პირების წინააღმდეგ.
