ნიკო კვარაცხელიას მკვლელობის შემკვეთებად ძმები კაკულიები და ყოფილი პრემიერის შვილი, ბუსა ჟვანია დაასახელეს

ნიკო კვარაცხელიას მკვლელობა

ახალგაზრდა პროგრამისტის, ნიკო კვარაცხელიას შეკვეთით განზრახ მკვლელობის ორგანიზებისთვის ბრალი წარედგინათ ყოფილი პრემიერ-მინისტრის, ზურაბ ჟვანიას შვილს, ბესარიონ (ბუსა) ჟვანიას და ძმებ კაკულიებს. პროკურატურის განცხადებით, ჟვანიას მიმართ გამოცხადდება ძებნა, ხოლო აღკვეთის ღონისძიების სახით პატიმრობის შეფარდების მოთხოვნით სასამართლოს კანონით განსაზღვრულ ვადაში მიმართავენ. რაც შეეხება ძმებ კაკულიებს, ისინი სასჯელს სხვა საქმისთვის იხდიან.

პროკურატურა ამტკიცებს, რომ ძმებმა დავით და გურამ კაკულიებმა მკვლელობა კანონიერ ქურდ გია კვარაცხელიაზე შურისძიებისა და კრიმინალურ სამყაროში ავტორიტეტის გამყარების მიზნით დაგეგმეს. ბრალდების ვერსიით, მათ გეგმა გაანდეს ბესარიონ ჟვანიას, რომელმაც, უწყების მტკიცებით, დაიწყო დანაშაულის უშუალო შემსრულებლების მოძიება.

ნიკო კვარაცხელია კანონიერი ქურდის, გია კვარაცხელიას შვილია, ხოლო ძმები დავით და გურამ კაკულიები ასევე კანონიერი ქურდის, დავით კაკულიას შვილები არიან. პროკურატურის ინფორმაციით, სწორედ გია კვარაცხელიას ადანაშაულებდნენ დათო კაკულიას მკვლელობაში, რომელიც 2001 წელს მოსკოვში ააფეთქეს. მათივე მტკიცებით, ნიკო კვარაცხელიას მკვლელობა სწორედ მამაზე შურისძიებას უკავშირდება.

ნიკო კვარაცხელიას დედა, იზა ომაძე უკვე 5 წელია ითხოვს მკვლელობის შემკვეთების დასჯას, რამდენიმე დღის წინ კი მან ამ მოთხოვნით აქციებიც დააანონსა. სწორედ ამას დაემთხვა პროკურატურის დღევანდელი ბრიფინგი.

გამოძიების ინფორმაციით, ჟვანია დაუკავშირდა თავის ნაცნობებს, ალეკო ჭელიძესა და გიორგი კავილაძეს, და შესთავაზა მათ, ძმები კაკულიების დაკვეთით, კვარაცხელიას ჯგუფურად მკვლელობა. პროკურატურის განცხადებით, ისინი შეთავაზებას დათანხმდნენ.

ბრალდების მიხედვით, 2021 წლის ივლისსა და აგვისტოში ჭელიძე და კავილაძე რამდენჯერმე გაემგზავრნენ სომხეთში, სადაც იმყოფებოდნენ დავით და გურამ კაკულიები, რათა მიეღოთ მითითებები და დაეგეგმათ მკვლელობის ორგანიზება.

მოგვიანებით, სექტემბრის დასაწყისში, კაკულიებმა, პროკურატურის თანახმად, უკანონოდ გადმოკვეთეს საქართველოს სახელმწიფო საზღვარი. გამოძიება ამტკიცებს, რომ ეს ფაქტი ცნობილი იყო ბესარიონ ჟვანიასთვის, რომელმაც ისინი ილია ჭავჭავაძის გამზირზე, მისი ოჯახის საკუთრებაში არსებულ სახლში დააბინავა. იმავე მისამართზე, უწყების ცნობით, სისტემატურად მიდიოდნენ ჭელიძე და კავილაძე, ხოლო კაკულიებმა მათ გადასცეს სპეციალურად კომუნიკაციისთვის განკუთვნილი მობილური ტელეფონი.

პროკურატურამ ასევე გაავრცელა საქმეში არსებული ვიდეოჩანაწერები, რომლებიც, მათი განცხადებით, ადასტურებს ბრალდების ვერსიას.

ალეკო ჭელიძე და გიორგი კავილაძე უკვე მსჯავრდებულები არიან კვარაცხელიას ჯგუფურად განზრახ მკვლელობის, ასევე ჯგუფურად ცეცხლსასროლი იარაღისა და საბრძოლო მასალის მართლსაწინააღმდეგოდ შეძენა-შენახვა-ტარების ბრალდებებზე. მათ 17 და 16 წლით თავისუფლების აღკვეთა აქვთ მისჯილი.

ნიკო კვარაცხელიას ოჯახმა ბათუმში დაღუპული არასრულწლოვნების ძმებს სტიპენდია დაუნიშნა

ერთადერთი, რითაც ჩვენს ოჯახს შეუძლია გამოხატოს თქვენდამი თანადგომა, “ნიკოს სტიპენდიაა”

ნიკო კვარაცხელია იყო 22 წლის პროგრამისტი და პირველი ქართული სოციალური პლატფორმის, Feedc-ის დამფუძნებელი. მას დიდ მომავალს უწინასწარმეტყველებდნენ ტექნოლოგიების სფეროში.

მკვლელობა მოხდა 2021 წლის 15 სექტემბერს, თბილისში, ვერაზე, ანჯაფარიძის ქუჩაზე. ნიკოს საკუთარ ავტომობილთან ახლოს, დაახლოებით 10-ჯერ ესროლეს. სათვალთვალო კამერების ჩანაწერებში ჩანდა, როგორ ელოდებოდა მკვლელი მსხვერპლს და როგორ დაცხრილა ის დღისით, ხალხმრავალ ადგილას. ნიკო კვარაცხელია საავადმყოფოში მიყვანის შემდეგ გარდაიცვალა.

მკვლელობის შემდეგ სამართალდამცავებმა დაადგინეს ორი ეჭვმიტანილის ვინაობა: აკო ჭელიძე და გიორგი კავილაძე. ისინი შემთხვევის ადგილიდან ნაქირავები მანქანით მიიმალნენ.

2022 წლის აპრილში თბილისის საქალაქო სასამართლომ ორივე პირი დამნაშავედ ცნო: აკო ჭელიძეს (უშუალო მკვლელს) და გიორგი კავილაძეს (თანამონაწილეს) მიესაჯათ 17-17 წლით თავისუფლების აღკვეთა.