დაღუპულები და უგზო-უკვლოდ დაკარგულები: მხარეები სომხეთ-აზერბაიჯანის საზღვარზე ბრძოლების შედეგებზე
16 ნოემბერს, აზერბაიჯანისა და სომხეთის საზღვარზე ბრძოლების მიმდინარეობისას მხარეებმა ცოცხალი ძალაც დაკარგეს. ყარაბაღის მეორე ომის დამთავრების შემდეგ ყველაზე მასშტაბურ შეტაკებებში 8 სამხედრო მოსამსახურე დაიღუპა, 13 ტყვედ ჩავარდა, 24 კი უგზო-უკვლოდ დაიკარგა. ბრძოლა რუსული მხარის ჩარევის შემდეგ შეჩერდა.
ინფორმაცია ერევნიდან
თავდაცვის სამინისტროს განცხადება
სომხეთის თავდაცვის სამინისტრო იტყობინება, რომ 17 ნოემბრის 10:00 საათის მდგომარეობით, სიტუაცია საზღვრის აღმოსავლეთ მიმართულებით, რომელიც „გუშინ აზერბაიჯანის შეიარაღებული ძალების ქვედანაყოფების შეტევის სამიზნე გახდა, შედარებით სტაბილურია, ცეცხლის შეწყვეტის შესახებ შეთანხმება მთლიანობაში დაცულია“.
სამხედრო უწყების ცნობით, 16 ნოემბრის ესკალაციის შედეგად, სომხური მხრიდან დაიღუპა ერთი სამხედრო მოსამსახურე, 13 ტყვედ ჩავარდა, კავშირი გაწყდა 24 მებრძოლთან, რომელთა საძიებო სამუშაოებიც მიმდინარეობს. როგორც გუშინ აცხადებდნენ, სომხეთმა ბრძოლების მიმდინარეობისას ორი სამხედრო პოზიცია დაკარგა, ისინი აზერბაიჯანის კონტროლქვეშ გადავიდა.
თავდაცვის სამინისტრო ასევე იტყობინება, რომ რუსული მხარის შუამავლობით ამ დროისთვის მოლაპარაკებები მიმდინარეობს სიტუაციის დასარეგულირებლად და ტყვედ ჩავარდნილი სომეხი სამხედროების დასაბრუნებლად.
საგარეო საქმეთა სამინისტროს განცხადება
წინა დღის მოვლენების შესახებ რუსეთისადმი მიმართვასთან დაკავშირებით სომხეთის საგარეო საქმეთა სამინისტროს პრესმდივანმა განაცხადა, რომ პირდაპირი და მრავალდონიანი დისკუსიები მიმდინარეობს.
ვაან უნანიანმა საზოგადოებას შეახსენა, რომ გუშინ სატელეფონო საუბარი შედგა სომხეთის პრემიერ-მინისტრსა და რუსეთის პრეზიდენტს შორის, რომლის დროსაც ნიკოლ ფაშინიანმა ვლადიმირ პუტინს შექმნილი სიტუაცია აუხსნა. და ამ კონტექსტში „ორი ქვეყნის ლიდერებმა შესაძლო ერთობლივი ნაბიჯები განიხილეს“, რომელთა განხორციელება განმტკიცებულია ორმხრივი შეთანხმებებით სტრატეგიულ მოკავშირეებს – რუსეთსა და სომხეთს – შორის.
პრესმდივანი შეეხო გაეროს უშიშროების საბჭოსთვის მიმართვის საკითსაც. ვაან უნანიანის თქმით, სომხეთის საგარეო საქმეთა სამინისტრომ უკვე მოახდინა გაეროს უშიშროების საბჭოს თავმჯდომარის ინფორმირება შექმნილი ვითარების შესახებ:
„სომხეთის რესპუბლიკის ტერიტორიული მთლიანობისა და სუვერენიტეტის დაცვის მიზნით, განიხილება საერთაშორისო სამართლისა და დიპლომატიური პრაქტიკის ყველა ინსტრუმენტის გამოყენება“.
ინფორმაცია ბაქოდან
თავდაცვის სამინისტროს განცხადება
აზერბაიჯანის თავდაცვის სამინისტრომ 16 ნოემბრის ბრძოლების დროს დანაკარგების შესახებ განაცხადა.
„აზერბაიჯანული მხრიდან შვიდი ადამიანი დაიღუპა, კიდევ 10 სამხედრო მოსამსახურე დაიჭრა“, – ნათქვამია თავდაცვის უწყების განცხადებაში.
16 ნოემბრის საღამოს, აზერბაიჯან-სომხეთის საზღვარზე ბრძოლები რუსეთის თავდაცვის მინისტრის, სერგეი შოიგუს აზერბაიჯანის თავდაცვის მინისტრთან, ზაქირ ჰასანოვთან მოლაპარაკებების შემდეგ შეწყდა.
„სატელეფონო საუბრის დროს ზაქირ ჰასანოვმა აღნიშნა, რომ სომხეთის მიერ საზღვარზე განხორციელებული პროვოკაციები მტკიცედ იქნა აღკვეთილი.
სერგეი შოიგუმ მზადყოფნა გამოთქვა, გასწიოს ძალისხმევა საბრძოლო მოქმედებების შესაჩერებლად და სიტუაციის სტაბილიზაციისთვის“, – ნათქვამია აზერბაიჯანის თავდაცვის სამინისტროს საღამოს განცხადებაში.
საგარეო საქმეთა სამინისტროს განცხადება
ამასობაში, აზერბაიჯანის თავდაცვის სამინისტრომ საზღვარზე მომხდარ შეტაკებებთან დაკავშირებით განცხადება გაავრცელა.
„ბოლო დღეების განმავლობაში სომხური მხრიდან შეინიშნება მიზანმიმართული პროვოკაციები. ეს სომხეთის ხელისუფლების მორიგი სამხედრო ავანტიურაა.
ასე მაგალითად, სომხეთის ყოფილი თავდაცვის მინისტრის ვიზიტი რუსი მშვიდობისმყოფელების მიერ დროებით კონტროლირებულ აზერბაიჯანის ტერიტორიაზე და იქ სამხედრო თათბირების გამართვა, სომხეთის შეიარაღებული ძალების პირადი შემადგენლობის დაახლოებით 60 პროცენტის კონცენტრაცია გზაზე, რომელიც ლაჩინის რაიონში აზერბაიჯანული არმიის პოზიციებთან მიდის, აგრეთვე სომხეთის შეიარაღებული ძალების მიერ აზერბაიჯანის არმიისთვის ინტენსიური ცეცხლის გახსნა ქალბაჯარისა და ლაჩინის რაიონებში, მოწმობს იმას, რომ სომხური მხარე სიტუაციას მიზანმიმართულად ამწვავებს.
ეს ყველაფერი იმას მოწმობს, რომ სომხეთი არ არის დაინტერესებული რეგიონში მშვიდობისა და უსაფრთხოების უზრუნველყოფით, ასევე, აზერბაიჯანთან საზღვრის დელიმიტაციით. ხაზს ვუსვამთ, რომ დაძაბულობა რეგიონში – სომხეთის მორიგი სამხედრო-პოლიტიკური პროვოკაციაა. ძირითადი პასუხისმგებლობა ახლანდელ დაძაბულობაზე ეკისრება უშუალოდ სომხეთის სამხედრო-პოლიტიკურ ხელმძღვანელობას“, – ნათქვამია აზერბაიჯანის საგარეო უწყების განცხადებაში.
