"10 დიაგნოზი პატიმრობას შეუთავსებელს ხდის" - რა წერია სააკაშვილის სამედიცინო დასკვნაში
გაზიარება
გაზიარება
რა წერია სააკაშვილის სამედიცინო დასკვნაში
ცენტრმა “ემპათია” საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით სამედიცინო დასკვნა გამოაქვეყნა, რომლის მიხედვით, სააკაშვილს ოცზე მეტი დიაგნოზი თუ სიმპტომი აქვს – მათგან, დაახლოებით ათი პატიმრობასთან შეუთავსებელია.
“ემპათიაში” აცხადებენ, რომ ძირითადი დიაგნოზები არ საჯაროვდება.
დღესვე სააკაშვილის ადვოკატმა, შალვა ხაჭაპურიძემ სასამართლოს სააკაშვილის სასჯელისგან სრულად გათავისუფლების ან მისი გადავადების შუამდგომლობით მიმართა.
მიხეილ სააკაშვილის სამედიცინო ექსპერტიზა ათი ქართველი და ექვსი საერთაშორისო ექსპერტისგან შემდგარმა კომისიამ ჩაატარა. ექს-პრეზიდენტის ჯანმრთელობას ექიმები 2022 წლის 1 ივნისიდან 2022 წლის 28 ნოემბრამდე იკვლევდნენ და აკვირდებოდნენ. დასკვნა, რომელიც მომზადდა, 194 გვერდიანია და თან ახლავს 22 დანართი – ჯამში 2980 გვერდი.
დასკვნაში ვკითხულობთ, რომ მიხეილ სააკაშვილის ამჟამინდელი ჯანმრთელობის მდგომარეობა ფასდება როგორც მძიმე და პატიმრობასთან შეუთავსებელი – ცალკეული დიაგნოზები ცალკეც და ერთობლიობაში გამოიწვევს ჯანმრთელობის მდგომარეობის შეუქცევად მოშლას, სიცოცხლის ხანგრძლივობის შემოკლებას და სიკვდილსაც, თუკი მას არ მიეცემა შესაძლებლობა მიიღოს ადეკვატური დიაგნოსტიკისა და მკურნალობის უფლება.
ცენტრი “ემპათია” ხაზს უსვამს, რომ ამჟამად მიხეილ სააკაშვილს აღენიშნება სიმპტომები და დიაგნოზები ნეირო-ფსიქიკური, გასტრო-ენტეროლოგიური, საყრდენ-მამოძრავებელი სისტემისა და მხედველობის მხრივ.
მათივე ცნობით, სააკაშვილს აქვს დაუდგენელი ეტიოლოგიის ცხელება, ანორექსია, წონაში სწრაფი კლება, კუნთების, სახსრების ძვლების ტკივილი, კუნთების განლევა, რომელიც შესაძლოა წარმოადგენდეს “დაუდგენელი ინფექციური პროცესის ან/და შესაძლო ინტოქსიკაციის შედეგებსაც”.
როგორც დასკვნაში წერია, ექს-პრეზიდენტი სააკაშვილი დაპატიმრების წინ იყო პრაქტიკულად ჯანმრთელი – ჰქონდა მხოლოდ არტერიული ჰიპერტენზია, რის გამოც სიტუაციურად იღებდა სიმპტომურ პრეპარატებს და ასევე სვამდა გარკვეულ წამლებს პოსტ-კოვიდური შფოთვითი დეპრესიის წინააღმდეგ. პატიმრობაში ყოფნის ერთი წლის თავზე კი ის მზიმე ავადმყოფია, წერია დასკვნაში.
“ემპათიას” შეფასებით, სააკაშვილი არ უნდა დარცეს კლინიკა “ვივამედში” და არ უნდა დაბრუნდეს საპატიმროში, რადგან ამ დაწესებულებებში სრული ტოქსიკოლოგიური კვლევის ჩატარება შუძლებელია.
“ემპათია” დაჟინებით ითხოვს, რომ სააკაშვილს ჩაუტარდეს დიაგნოსტიკა ტოქსიკური აგენტების, მათ შორის, ქიმიური შენაერთებისა და რადიაქტიული ნივთიერებების მიმართულებით, რადგან სახეზეა გაურკვეველი ტიპის ინტოქსიკაცია, ამბობენ სპეციალისტები.
“წინააღმდეგ შემთხვევაში, ინტოქსიკაციის ალბათობის გათვალისწინებით, დასკვნის მიხედვით, მოსალოდნელია კომა და სიკვდილი” – აღნიშნულია დასკვნაში.
ბოლო ორი თვეა მიხეილ სააკაშვილის მდგომარეობა განსაკუთრებით დამძიმდა, ამას ადასტურებენ მისი ექიმები, ოჯახის წევრები, ადვოკატები და თანაგუნდელები, რომლებიც კლინიკა “ვივამედში” მის სანახავად შეუშვეს.
6 ოქტომბერს, სახელმწიფო დაცვის სპეციალური სამსახურის უფროსმა თემურ ჯანაშიამ, რომელმაც სააკაშვილი ნახა, განაცხადა, რომ “მიხეილ სააკაშვილი ფაქტობრივად, ადამიანი აღარ არის, აქვს 38-მდე სიცხე, წნევა 170, საკვებს და წამლებს ვერ იღებს, არის ლოგინში.”
ამერიკელმა ექსპერტმა შაჰინ ლახანმა საქართველოს მესამე პრეზიდენტის მონახულების შემდეგ განმარტა, რომ ყველა კვლევა აჩვენებს მწვავე დეფიციტს, ყველა იმ “სასიცოცხლო მაჩვენებლისა, რაც ნორმალურ ადამიანს, ნორმალური ჯანდაცვის პირობებში არ უნდა ჰქონდეს.”
28 ნოემბერს თბილისის საქალაქო სასამართლოში სააკაშვილის წინააღმდეგ ახალი პროცესი დაიწყო (ე.წ. საზღვრის კვეთის საქმე – სააკაშვილის საქართველოში გასულ ოქტომბერს სახელმწიფო საზღვრის უკანონოდ გადაკვეტის შედეგად შემოვიდა). პროცესზე ტავად სააკაშვილიც უნდა მიეყვანათ, თუმცა, ჯანმრთელობის გაუარესებული მდგომარეობის გამო, ექს-პრეზიდენტმა სხდომაზე დასწრება ვერ შეძლო. მოსამართლე ნინო ჩახნაშვილმა სხდომა თარიღის განსაზღვრის გარეშე გადადო.
“ნაციონალური მოძრაობის” წევრი ხატია დეკანოიძე ამბობს, რომ ექიმები სააკაშვილს სასამართლო პროცესზე დასწრების რეკომენდაციას არ აძლევენ, რადგან მისი მდგომარეობა ეტაპირების დროს, შესაძლოა, უფრო დამძიმდეს.
პასუხისმგებლობას ვერ იღებს ვერც პენიტენციური სამსახური.
პრეზიდენტმა, სალომე ზურაბიშვილმა 24 ნოემბერს განაცხადა, რომ მიხეილ სააკაშვილის ჯანმრთელობის მდგომარეობა ქვეყნის რეპუტაციისთვის მნიშვნელოვანია და თუ ჯანმრთელობის მდგომარეობა “ამ დონეზეა დაზიანებული”, სასამართლომ უნდა მიიღოს ღირსეული გადაწყვეტილება.
საქართველოს სახალხო დამცველთან არსებული კონსილიუმის შეფასებითაც, რომელიც მიმდინარე წლის აპრილში გამოქვეყნდა, საქართველოს პატიმარი ექსპრეზიდენტის, მიხეილ სააკაშვილის ჯანმრთელობის მდგომარეობა მნიშვნელოვნადაა დამძიმებული. ოჯახი, მის საზღვარგარეთ სამკურნალოდ გადაყვანას ითხოვს.
აშშ-ის ელჩმა კელი დეგნანმა საქართველოს მთავრობას მოუწოდა, საქართველოს მესამე პრეზიდენტის, მიხეილ სააკაშვილის ჯანმრთელობის საკითხზე სახალხო დამცველის რეკომენდაციებს სერიოზულად მიუდგეს.
უკვე 1 წელზე მეტია, მიხეილ სააკაშვილი, დაპატიმრებულია. ექსპრეზიდენტი დააპატიმრეს მას შემდეგ, რაც ის 2021 წლის 1 ოქტომბერს, ფარულად დაბრუნდა საქართველოში.
